Read Batak Dairi Johanes 7 Bible Online

Johanes 7 - Batak Dairi bible

Johanes 7

¹Enggo kessa i, iagahi Jesus mo nagerri Galilea. Oda uè ia mi nagerri Juda, kumarna mertaki ngo pengulu-pengulu Jahudi naing memmunuhSa.

²Enggo ndessing tikanna i Ari Raya Undung-undung.

³Nai idokken dengan sibeltek Jesus mo tabaSa, “Tadingken mo bekkas èn, janah laus mo kono mi Juda, asa idah sisinMu niulakenMu idi.

⁴Isè poda lot memmoniken nibahankenna, mula naing termurmur ia. Mula enggo ibahanken kono bagidi, kennah ngo ibettoh suberri dunia èn!” (

⁵Ai denganNa sibeltek pè oda ngo percaya baNa.)

⁶“Oda dèng dapet tikkingKu,” nina Jesus taba kalak idi, “tapi ukum bai ndènè, gen- nep tèk ngo ndorok.

⁷Oda ngo ikecegoken dunia èn ukum kènè, tapi ukum Aku ikecegoken ngo, Kumarna dak Kupincang dunia èn terèngèt kejahatenna.

⁸Laus mo kènè mi pèsta idi. Ukum Aku, oda dèng laus, kerna makdèng dapet kettikangKu.”

⁹Bagidi mo pendokken Jesus taba denganNa sibeltek, nai tading i Galilea ngo ukum Ia.

¹⁰Enggo kessa laus denganNa sibeltek mi pèsta idi, laus ma mo Jesus mboni-mboni mi pèsta i, isè poda bettoh-bettohen.

¹¹Dak itulusi perkuasa kalak Jahudi ngo Ia i pèsta i ninganna ikuso-kusoken, “Idikè ngo Ia?”

¹²Nai mèduk ngo kalak menerèngètisa merkitè kosik-kosik. Dèba mendokken, “Kalak bujur ngo ia.” Lot ma dèba mendokken: “Oda! Mengelalingken jelma nterrem ngo ia.”

¹³Tapi isè poda pang menerèngètisa ntarar i tengah jelma nterrem, kumarna mbiar ngo kalak idi midah penguasa-pe- nguasa kalak Jahudi.

¹⁴Tupung pertengahen pèsta i, ibengketti Jesus mo Bages Dèbata, janah mengajar mo ia i sidi.

¹⁵Lengang kalohoon mo penguasa-penguasa kalak Jahudi, nina kalak i mo, “Idikè nai ngo bagi pemettoh kalak èn, ai so barang mersikkola Ia?”

¹⁶Ialoi Jesus mo, “Karina siKupeddahken idi, oda ngo peddahKu sendiri i, tapi peddah Dèbata simengutus Aku i ngo.

¹⁷Barang isè menguèi lemmo atè Dèbata, ibettoh ngo tah bangKu nai sendiri siKupeddahken i, barang tah bai Dèbata nai.

¹⁸Ai barang isè mengerana ipas dirina nai, imo magahken sèkel ia asa ipesangap dèba dirina. Tapi barang isè mennulusi kessangapen bai sipasulakkensa imo kalak bujur; oda lot akkal-akkal bana.

¹⁹Otang enggo lot pati-patiin si Musa bai ndènè? Tapi isè poda kènè mengulaken pati-patiin i. Kasa naing ibunuh kènè Aku?”

²⁰Ialoi jelma nterrem i mo, “Ah, kalak sasèk ngo kono! Isè sinaing memmunuh Kono?”

²¹Ialoi Jesus mo, “Pellin sada ngo Kuulaken bahaan tikan ari Sabat lengang kènè karinana.

²²Ibaing si Musa ngo pati-patiin bai ndènè asa mersittak (mertakkil). Janah kumarnaken naidi itakkil kènè mula pè tupung ari Sabat. (Oda ngo nemmu si Musa perlebbè menghatorken menittak jelma, tapi empungta sinderrang madèng lot si Musa ngo.)

²³Mula isittak kènè jelma tupung ari Sabat lako mengèkutken pati-patiin si Musa, kasa mellaga kènè taba Aku kumarna kupemmalum bolet jelma i tupung ari Sabat?

²⁴Ulang mo kènè menghukum-hukumi sitaridah sambing, tapi hukum mo ibagasen adil janah bennar.”

²⁵Nai lot mo barang piga-piga kalak i Jerusalem mendokken: “Otang kalak èn ngo si dak tong itulusi naing ibunuh?

²⁶Tapi tengen mo! Mengerana ngo Ia ntarar i lebbè-lebbè sinterrem, keppè isè poda pang mendokken barang bakunè tabaSa! Tah mada ngo enggo satdar penguasa-penguasanta, kalak ènda ngo Raja Sipaluah niperbagah-bagah Dèbata?

²⁷Tapi mula roh Raja Sipaluah niperbagah-bagah Dèbata, isè poda bettoh-bettohen barang i dikè nai pekirohNa. Tapi ukum kalak ènda, sibettoh ngo barang i dikè nai asal-usulna.”

²⁸Sinderrang mengajar Jesus i Bages Dèbata nggang mo idiloken, “Tuhu-tuhu ngo ibettoh kènè isè Aku janah i dikè nai asal usulKu? Roh aku oda ngo ipas lemmo-lemmongKu nai. Tapi lemmo atè sipasulakken aku i ngo, tapi oda ngo itandai kènè ukum Ia.

²⁹Ukum aku kutandai ngo Ia, ai Ia ngo pasulakken Aku asa roh.”

³⁰Jadi segat-segaten mo kalak idi, naing itangkup mo Jesus, tapi ise poda lot mengellaluken tanganNa, kerna makdèng dapet tikkina.

³¹Tapi mèduk ngo bai kalak nisidi nai gabè percaya tabaSa janah mendokken, “Mula roh Raja Sipaluah niperbagah-bagah Dèbata idi, harapen ma ngo ndia terhanakensa tanda kellengangen buèen dèng dari pada sienggo nihanaken kalak ènda?”

³²Idengkoh Parisè mo kosik-kosik jelma nterrem i tersèngèt Jesus. Kerna naidi ipasulak kalak i bak imam-imam ekuten mo barang piga-piga kalak penjaga Bages Dèbata lako menangkup Jesus.

³³Idokken Jesus mo, “Sigejap nai ngo kessa rebbak Aku dekket kènè, ai molih mo Aku mendahi simengutus Aku.

³⁴Itulusi kènè mo Aku, tapi oda jupa kènè Aku: Ai oda terdahi kènè bekkas sidahinKu idi.”

³⁵Nai mersidokenken mo penguasa-pe- nguasa kalak Jahudi samahsa, “Naing laus mikè ndia Ia, asa mèter oda jupa kita Ia? Mada ngo naing laus Ia ndia mendahi kalak Jahudi ni ruar nagerri imo i tengah-tengah kalak Junani, janah gabè mengajari kalak Junani?

³⁶Kadè ngo ndia maksudNa: Itulusi kènè mo Aku, tapi oda jumpa kènè Aku, dekket ai oda terdahi kènè bekkas sidahinku idi?”

³⁷Ari perpodi i mata pèsta idi, cènder mo Jesus tupung mata pèsta i, narih nggang mo idiloken, “Barang isè muasen, roh mo ia mènum taba Aku.

³⁸Ai tersurat ngo ibas Bibèl bagèen: Barang isè percaya taba Aku, marir ngo ibas pusuh peratèenna nai laè mul simemerèken kenggelluhen.” (

³⁹Tendi Dèbata ngo nidokken Jesus isidi, sinaing jaloon kalak sipercaya tabaSa. Ai oda dèng ngo iberrèken tikala i Tendi Dèbata, kerna madèng ipesa- ngap Jesus merkitè permatèNa.)

⁴⁰Mbuè ngo kalak mendengkoh nidokken Jesus i. Nai lot mo kalak ipas simendengkoh idi nai mendokken, “Tuhu ngo Nabi kalak èn!”

⁴¹Lot ma ngo dèba mendokken, “Èn ngo Ia Raja Sipaluah niperbagah-bagah Dèbata.” Tapi lot ma ngo dèba mendokken, “Ah, mèter i Galilea nai mo asalna Raja Sipaluah idi?

⁴²Ai tersurat ngo ipas Bibèl ukum Raja Sipaluah i, arap usur si Daud nai ngo rohna, janah bekkasna tubuh pè i Betlehem ngo, imo lebbuh si Daud.”

⁴³Ujungna gabè petongkah sora mo jelma ni sidi tersèngèt Jesus.

⁴⁴Lot ngo dèba naing menangkupSa, tapi isè poda mengellaluken ta- nganNa.

⁴⁵Nai balik mo penjaga-penjaga Bages Dèbata pasulaken sinaing menangkup Jesus i mendahi imam-imam ekuten bak kalak Parisè. Nai ikusoi kalak i mo pasulaken i, “Kasa oda iembah kènè Ia mi sèn?”

⁴⁶Ialoi perjaga-perjaga i mo, “Ah, oda nung dèng lot kalak mengerana bagèSa!”

⁴⁷“Haah, tah mada ngo kènè pè enggo iajar-ajari?” nina Parisè i.

⁴⁸“Lot idah kènè sada kalak pè giam penguasa-penguasa kalak Jahudi barang Parisè pè percaya tabaSa?

⁴⁹Tapi merjaya ngo jelma nterrem èn siso menandai pati-patiin si Musa!”

⁵⁰Sada ibas kalak Parisè idi nai imo si Nikodemus, sienggo nung roh mendahi Jesus. Nai nina si Nikodemus, siroh berngin-berngin mendahi Jesus mo taba denganna Parisè sidèban:

⁵¹“Mengèkutken hukum, oda ndorok sihukumi kalak, ukum makdèng nitangkasen ia, janah mula madèng nidengkoh bak niperrèso kadè sienggo ibahanken.”

⁵²“Iaah, tah mada ngo kalak Galilea kono? Perrèso mo lebbè Bibèl! Idahenmu mo oda lot nabi i Galilea nai!” nina kalak i mengaloisa. [

⁵³Nai mersidahi sapona mo kalak i karina.