Read Batak Dairi Johanes 8 Bible Online

Johanes 8 - Batak Dairi bible

Johanes 8

²Sibarembeknna nola ma, laus nola mo Jesus mi Bages Dèbata; nterrem mo kalak roh mendapetkenSa. Kundul mo Jesus lako mengajari kalak i.

³Sinderrang bagidi, itaruhken guru-guru agama dekket Parisè mo taba Jesus sada kalak daberru siterdapet merlangkah julu meddem. Idokken kalak i mo cènder daberru i, i tengah-tengah,

⁴nai nina kalak i mo taba Jesus, “Guru, terdapet ngo daberru èn merlangkah julu meddem.

⁵Ibas Bukku si Musa lot ngo pati-patiin Dèbata mendokken; mula lot daberru terdapet bagèen, kennah ibentiri ngo dekket batu sampè matè. Bagèndari pè bakunè ngo pendapet ndènè?”

⁶Tapi ikusoken kalak i pè bagidi, lako mengenggep Jesus ngo, asa ndorok isalahken kalak i Ia. Tapi dak tungkuk sambing ngo ukum Jesus ninganna menurati tanoh i merkitè jari-jariNa.

⁷Jadi kumarna dak iempet kalak i mengkuso, ipedorgah Jesus mo takalNa, nina mo, “Barang isè kènè oda merdosa, ia mo perlebbè mementirken batu taba daberru idi.”

⁸Nai tungkuk nola mo Jesus mennurati tanoh i.

⁹Mendengkoh kata Jesus i sinterrem i, laus-laus sada mo kalak i mennadingken Jesus, situa-tuana mo perlebbè. Nai pellin Jesus nai ngo kessa tading i sidi bak daberru idi cènder i bekkasna.

¹⁰Dorgak mo Jesus, idokken mo taba daberru i, “Enggo mikè kalak idi nangè? Oda lot memmaing hukumna bamu?”

¹¹“Oda lot Guru!” nina daberru i mengaloi. “Oo, Aku pè oda Kuhukum kono. Bagèndari pè laus mo kono, tapi ulang nèngè empet merdosa mi podiin èn,” nina Jesus.]

¹²Nai iulaki Jesus mo mengajari kalak i, nina mo, “Aku ngo penendang dunia èn. Barang isè mengèkutken Aku, oda harapen merdalan ibas sigellap; bana ngo tupèh penendang simemerrèken nggelluh.”

¹³Nai nina Parisè i mo tabaSa, “Dirimu ngo iindangken kono. Jadi oda bennar pengin- dangkenMu idi.”

¹⁴Ialoi Jesus mo, “Tukasi pè diringKu Kuindangken, sènteng ngo pengindangkenKu; ai Kubettoh ngo barang i dikè nai Aku roh janah mikè Aku laus. Oda ngo ibettoh kènè barang idikè nai Aku, janah laus mikè Aku.

¹⁵Ihukumi kènè ngo jelma mengèkutken perdagingen, tapi ukum Aku isè poda Kuhukumi.

¹⁶Mula menghukum pè Aku, adil ngo penghukumKu, ai oda ngo punjung sadaKu. Bapa i simengutus Aku ngo denganKu.

¹⁷Ibas patiin si Musa tersurat bagèen: Sah ngo kesaksiin, mula lot dua kalak saksi.

¹⁸Jadi mengkesaksiken Aku pè lot ngo dua kalak — imo Aku dekket Bapa i simengutus Aku.”

¹⁹“Idikè ngo BapaMu?” nina kalak i. Jadi ialoi Jesus mo, “Ai so itandai kènè Aku. BapangKu pè, oda ma ngo itandai kènè. Ukum itandai kènè Aku, Bapa pè pasti ngo itandai kènè.”

²⁰Karinana idi idokken Jesus, tikan mengajari Ia i Bages Dèbata i gembar pèti-pèti bekkas pèlèen. Tapi isè poda pang menangkupSa kumarna makdèng dapet tikkina.

²¹Nai nina Jesus nola mo taba kalak i, “Laus mo Aku, jadi itulusi kènè mo Aku, tapi matè mo kènè ibagasen dosa ndènè. Oda terdahi kènè ukum bekkas sidahinKu i.”

²²Gabè nina penguasa-penguasa Jahudi mo, “Mada ngo ndia naing mendelles Ia, asa idokken oda terdahi kènè ukum bekkas sidahinKu idi?”

²³Nai nina Jesus mo taba kalak idi, “Ukum kènè, i terruh èn nai ngo kènè, tapi ukum Aku i dates nai ngo. I dunia èn nai ngo ukum kènè; tapi ukum Aku oda ngo i dunia èn nai.

²⁴Kumarna nai ngo asa Kudokken taba kènè: Matè mo kènè ibagasen dosa ndènè. Tuhu ngo, matè mo kènè ibagasen dosa ndènè, mula laju oda percaya kènè, ‘Aku ngo Ia sinidokkenna AKU LOT.’ ”

²⁵“Ai isè ngo kono situhunna?” nina kalak i mengkusoi. Ialoi Jesus mo, “Kadè poda gunana nèngè mengerrana dekket kènè!

²⁶Sandok singgo Kuranaken taba kènè i ngo Aku. Matcam dèng ngo nemmu bagèna sinaing tersèngètenKu bak sipincangenKu terrèngèt kènè. Ai pellin sikudengkoh bana nai simengutus Aku i ngo Kusukutken mi dunia èn, ai kettoken ngo Ia.”

²⁷Oda iantusi kalak i magahken tupung menerèngèti tersèngèt Bapa i ngo ia taba kalak i.

²⁸Kerna naidi idokken Jesus nola mo taba kalak i, “Enggo kessa pè ipedates kènè sikali èn Anak Jelma i, ibettoh kènè mo, ‘Aku ngo Ia sinigeraren AKU LOT,’ janah satdar mo kènè i sidi, oda lot barang kadè Kubahanken ukum ipas lemmo-lemmo atèngKu nai sendiri. Pellin niajarken Bapa taba Aku i ngo kessa kuranaken.

²⁹Janah dakdak ngo rebbak dekket Aku Ia simengutus Aku i. Oda nung ibelli pellin sadaKu, ai dak nipergeddo atèNa ngo Kuulaken.”

³⁰Enggo kessa idokken Jesus karinana i, mèduk mo percaya kalak tabaSa.

³¹Nai nina Jesus mo taba kalak Jahudi sienggo gabè percaya baNa, “Mula sètia kènè mengulaken peddahKu, tuhu mo kènè sisinKu.

³²Nai itandai kènè mo Dèbata situhunna, janah kemulihken i, gabè ipaluah mo kènè.”

³³“Pemparen si Abraham ngo kami,” nina kalak i. “Oda nung dèng kami ihamba barang isè pè! Kadè ngo maksudMu mendokken, ‘Gabè ipaluah mo kènè?’ ”

³⁴“Situhunna ngo siKudokken èn,” nina Jesus taba kalak i. “Hamba dosa ngo barang isè mengulaken dosa.

³⁵Sada kalak hamba oda lot tettap bekkasna ibagasen bilangen ripè.

³⁶Kerna i mula ipaluah Anak i kènè, tuhu-tuhu mo kènè maluah.

³⁷Kubettoh ngo kènè pemparen si Abraham. Tapi naing ibunuh kènè ngo Aku, kumarna oda uè kènè percaya mi peddahKu.

³⁸Kuranaken ngo siKuidah bai Bapa idi nai; janah kènè pè iulaken kènè ngo barang kadè idokken bapa ndènè.”

³⁹Ialoi kalak i mo, “Si Abraham ngo bapa nami.” “Ukum tuhu-tuhu ngo kènè dukak-dukak si Abraham,” nina Jesus, “Tentu iulaken kènè ngo bagè pengulaken si Abraham.

⁴⁰Pellin memagahken kebennaren sikudengkoh bai Dèbata nai ngo aku mendahi kènè, keppèken naing ibunuh kènè ngo Aku. Ukum si Abraham, oda ngo uè ia memmaing bagidi!

⁴¹Jadi iulaken kènè ngo rembang bagè niulaken bapa ndènè.” Nai ialoi kalak i mo, “Ai oda ngo anak gampang kami. Sada ngo bapa nami imo Dèbata.”

⁴²Nai nina Jesus mo taba kalak i, “Ukum tuhu ngo Dèbata Bapa ndènè, ngkelleng mo nemmu atè ndènè midah Aku, ai tuhu ngo roh bai Dèbata nai Aku. Oda roh Aku arap lemmo-lemmo atèngKu sendiri nai. Ia ngo pasulakken Aku.

⁴³Kadè sebabna asa oda iarti kènè siKudokken? Kumarna oda tahan kènè mendengkohken katangKu.

⁴⁴Sibolis ngo bapa ndènè, janah iulaken kènè ngo nipergeddo bapa ndènè i. Imulana nai ngo pemunuh Sibolis i, ai oda nung ia merpihak mi kebennaren, kerna oda lot kebennaren bana. Mula merluap ia, titikna ngo i kerna bagidi ngo bakkona.

⁴⁵Tapi kumarna Kubagahken bai ndènè tersèngèt kebennaren, ingo sebabna asa oda percaya kènè bangKu.

⁴⁶Isè kènè peddapetken Aku merdosa? Mula Kusukutken situhunna, kasa oda percaya kènè taba Aku?

⁴⁷Barang isè roh bai Dèbata nai, idengkohken ngo kata Dèbata. Tapi kumarna oda roh bai Dèbata nai kènè, idi ngo maing asa oda idengkohken kènè aku.”

⁴⁸Gabè nina kalak Jahudi mo taba Jesus, “Otang tuhu ngo sikudokken kami kalak Samaria ngo Kono, janah isellapi sètan ngo kono?”

⁴⁹Ialoi Jesus mo, “Oda isellapi sètan Aku. Tapi Kupesangap ngo BapangKu, kènè ngo pellèa-lèaken Aku.

⁵⁰Oda ngo kutulusi kesangapen diringku, lot ngo simemmakin mersangap Aku, janah Ia ngo mendabuh hukum.

⁵¹Situhunna ngo siKudokken èn: Barang isè mengu`i ranangKu, oda ngo matè ia soh mi amman sumendah.”

⁵²Nai mènter idokken kalak Jahudi mo taba Jesus, “Bagèndari mo Enggo ntangkas kubettoh kami, enggo tuhu isellapi sètan kono! Si Abraham pè matè ngo, bagi ma ngo bak karina nabi-nabi. Idokken Kono nola, ‘Barang isè menguèi katangKu oda matè ia soh mi amman sumendah nimu.’

⁵³Mula si Abraham enggo matè, bagidi ma ngo bak nabi-nabi idi pè matè ngo, nai isè ngo Kono dok atèmu? Belgahen ngo kono dok atèmu asa empung nami si Abraham!”

⁵⁴Ialoi Jesus mo, “Mula Aku pessangapken diringKu, siso mada ngo sangapku. Bapangku ngo pessangapken Aku; imo nidokken ndènè Dèbata ndènè,

⁵⁵padahal, oda itandai kènè Ia. Tapi Kutandai ngo Ia. Mula Kudokken oda Kutandai Ia, perluap mo Aku bagè kènè. Kutandai ngo Ia, janah kuuèi ngo kataNa.

⁵⁶Sèkel kalohoon ngo bapa ndènè si Abraham naing mengidah aringKu i. Jadi enggo mo idah tuhu, nai dom mo sampang atèna!”

⁵⁷Nai idokken kalak Jahudi mo taba Jesus, “Oda dèng ngo giamken dom limapuluh tahun umurMu, mèter idah kono mo si Abraham?”

⁵⁸Ialoi Jesus mo, “Ntangkas mo Kubagahken bai ndènè; madèng kin pè tubuh si Abraham, enggo mo lot Aku.”

⁵⁹Nai mèter ibuat kalak Jahudi mo batu naing mementiri Jesus; tapi galip mo Jesus, janah laus ia i Bages Dèbata nai.