Read Batak Dairi Johanes 9 Bible Online

Johanes 9 - Batak Dairi bible

Johanes 9

¹Nai nderrang merdalan i Jesus, idah mo sada kalak sipètung, janah kessa nai tubuh ngo Ia pètung.

²Ikusoi sisinna i mo Jesus, “Guru, kasa pètung kalak ènda tubuh? Mada ngo kumarna dosana, barang kumarna dosa partuana?”

³Ialoi Jesus mo, “Oda ngo kumarna dosana, barang kumarna dosa partuana, asa pètung ia tubuh. Tapi, asa ntangkas ngo idah jelma kuasa Dèbata merdalan ibas dirina.

⁴Sidekkah mahar, kennah siulaken ngo bahaan simengutus Aku. Tapi sigejap nai ngo kessa asa gellap, isè poda ndorok mahan bahaan nèngè.

⁵Aku ngo penendang dunia èn, sidekkah i dunia èn dèng Aku.”

⁶Enggo kessa idokken Jesus bagidi, ièduri mo tanoh memmahan kubang merkitè tanoh bak èdurna i. Nai Idaloh mo mata sipètung i merkitè kubang i,

⁷nai nina mo taba sipètung i, “Lako mo merduhap mi Bendar Siloam.” (Siloam lapatenna ‘Ipasulak’). Nai laus mo ia merduhap, jadi mèter merpendidah mo ia lako balik.

⁸Gabè nina kalak gembar bagesna mo dekket kalak simengidahsa mengido-ngido idi kin mo, “Otang ia ngo dak kundul mengi- do-ngido tikala i?”

⁹Dèba mendokken, “Ia ngo.” Tapi lot ma ngo dèba mendokken, “Aku ngo i.”

¹⁰“Bakunè ngo perjadina, asa gabè merpendidah kono?” nina kalak i mbangsa.

¹¹Ialoi mo, “Kalak simergerar Jesus i ngo memmaing tanoh gabè kubang, nai idalohken mo kubang i mi matangku ninganna idokken, ‘Laus mo kono merduhap mi Bendar Siloam.’ Nai laus mo aku. Jadi enggo kessa merduhap aku, mèter merpendidah mo matangku.”

¹²“Idikè ngo ia?” nina kalak i tabasa. Ialoi mo, “Oda kubettoh,” nina.

¹³Iarahken kalak idi mo sipètung idi kin mendahi Parisè.

¹⁴Tupung ngo ari Sabat tikan Jesus pegabèken tanoh jadi kubang i merkitè èdurNa, memmaingken asa gabè merpendidah mata sipètung i.

¹⁵Nai ikusoi kalak Parisè i mo ia, barang bakunè carana asa gabè merpendidah ia. Ialoi mo, “Idalohken ngo kubang mi matangku, nai merduhap mo aku, jadi mèter merpendidah mo aku.”

¹⁶Dèba Parisè mendokken tabasa, “Oda bai Dèbata nai asalna simenghanaken èn, ai ilausken ngo pati-patiin agama tersèngèt ari Sabat.” Tapi dèba mendokken, “Bakunè mo pemmaing perdosa ndorok mengulaken kellengangen bagèen?” Gabè pejaè-jaè mo pendapet kalak i samahsa.

¹⁷Nai, ikusoi Parisè nola mo sipètung idi kin sikali nai, “Nimu ndai, kalak idi ngo memmaing merpendidah matamu i! Mula bagidi, bakunè ngo pendokkenmu tersèngèt Ia?” Ialoi mo, “Nabi ngo ia.”

¹⁸Tapi oda ngo percaya penguasa-penguasa kalak Jahudi i, ia ngo sipètung idi kin sienggo gabè merpendidah i. Jadi asa percaya kalak idi, idiloi mo partua sipètung i,

¹⁹nai ikusoi mo, “Tuhu ngo èn anakmu sinidokkenmu pètung tubuh i kin? Bakunè nola ngo asa gabè merpendidah ia bagèndari?”

²⁰Ialoi partuana i mo, “Tuhu ngo èn anak nami, janah tuhu ngo pètung kin ia tubuh.

²¹Tapi ukum tersèngèt bakunè nola asa gabè merpendidah ia, oda kubettoh kami. Janah barang isè memmaing ia ndorok merpendidah, ipè oda ma kubettoh kami. Ia mo kusoi kènè, ai enggo mbelgah ia; enggo ndorok ipetterrang sendiri i.”

²²Idokken partuana idi pè bagidi, kumarna mbiar ngo ia midah pe- nguasa-penguasa kalak Jahudi; ai enggo sada kata kalak i mendokken, barang isè mendokken Jesus i Raja Sipaluah niperbagah-bagah Dèbata, kennah iliplip ngo ia ibas agama nai.

²³I ngo sebabna asa idokken partuana i, “Enggo mbelgah ia, jadi ia mo kusoi kènè.”

²⁴Nai idiloi kalak i nola mo sipètung tubuh idi kin, janah idokken mo mbangsa, “Kupessumpah kami mo kono i hadeppen Dèbata, asa ibagahken kono situhunna, ai kubettoh kami jelma perdosa ngo kum ia.”

²⁵Ialoi mo, “Barang perdosa Ia barang oda, oda kubettoh i. Tapi sada ngo sikubettoh; pètung kin ngo aku, tapi ukum bagèndari enggo gabè merpendidah aku.”

²⁶Nai idokken kalak i dèng ma mo, “Bakunè ngo ibaing taba kono? Kadè ibaing asa gabè merpendidah matamu idi?”

²⁷Ialoi mo, “Enggo kubagahken idi taba kènè, tapi oda tok kènè. Kasa naing dengkohen ndènè dèng nola? Mada ngo kènè pè naing gabè sisinNa ma?”

²⁸Mellaga mo kalak i tabasa, nina mo, “Kono ngo sisinNa; kum kami oda. Sisiin si Musa ngo kami.

²⁹Kubettoh kami ngo, lot rana Dèbata tersèngèt si Musa. Tapi ukum ia, oda kubettoh kami barang idikè nai asal-usulNa.”

³⁰Nai ialoi mo kalak i, “Lengang ukurku, mula idokken kènè oda ibettoh kènè barang idikè nai asal usulNa, keppèken enggo ibuka matangku pètung idi kin gabè merpendidah.

³¹Sibettoh ngo, oda idengkohken Dèbata ukum kalak perdosa; pellin kalak simenguèi janah kalak sipessangapken Dèbata sambing ngo kessa idengkohken.

³²Kessa nai ntembem dunia èn, oda nung dèng terdengkoh, ndorok ibaing jelma merpendidah kalak pètung tubuh.

³³Ukum mak roh bai Dèbata nai ia, oda terbakinsa mahanken bagidi.”

³⁴Nai nina kalak i mo tabasa, “Bolet ngo kono tubuh ibagasen dosa, naing ajarenmu nola ngo kami?” Nai iliplip kalak idi mo ia i agamana nai.

³⁵Idengkoh Jesus mo enggo iliplip kalak Jahudi sipètung tubuh idi kin i kuria nai. Nai pesimbak mo Jesus dekketsa, jadi nina mo tabasa, “Percaya ngo kono taba Anak Jelma?”

³⁶Nai ialoi mo, “Isè ngo Ia ndia? Petandaken mo bangku, asa ndorok percaya aku tabaSa.”

³⁷Nai nina Jesus mo, “Oda pellin idah kono ia, tapi simengerrana dekket kono bagèndari, idi mo ia.”

³⁸Nai mènter nina sipètung idi kin mo, “Percaya ngo aku Tuhan,” janah mènter mersembah mo ia mi hadeppen Jesus.

³⁹Nai nina Jesus mo, “Roh aku mi dunia èn, lako merembah hukum ngo; imo gabè merpendidah kalak sipètung, janah gabè pètung kalak simerpendidah idi kin.”

⁴⁰Jadi mengkuso mo kalak Parisè simendengkoh nidokken Jesus nisidi, “Mada ngo dekket kami pètung ibas pendokkenmu idi kin.”

⁴¹Ialoi Jesus mo kalak i, “Ukum pètung kin kènè, oda ngo merdosa kènè; tapi kumarna idokken kènè, ‘Oda ngo kènè pètung,’ gabè hot mo dosa ndènè.”