Read Batak Dairi Ulaan Apostel 16 Bible Online

Ulaan Apostel 16 - Batak Dairi bible

Ulaan Apostel 16

¹Iterusken si Paulus mo perdalanenna mi kuta Derbe kessa i mi Listra. Lot mo i sidi sada kalak simengèkutken Jesus mergerar si Timoteus. Berru Jahudi ngo inangna sienggo percaya taba Jesus; tapi ukum bapana kalak Junani ngo.

²I tengah-tengah si percaya i kuta Listra dekket Ikonium, termurmur ngo kiniselloh si Timoteus.

³Jadi ipergeddo si Paulus ngo asa dekket nemmu si Timoteus mahan denganna mi perdalanen. Saut mo dekket ia, tapi lebbè itakkil ngo ia kumarna kalak Jahudi silot i aur i, ai karina ngo memettoh kalak Junani bapana.

⁴I gennep kuta niagahen kalak idi i, ibagahken kalak i ngo keputusen runggu apostèl-apostèl dekket pengendeng-pengendeng si ni Jerusalem simahan ulanken janah jamotenken kalak idi.

⁵Jadi makin ntegguhna mo kepercayaen kuria i karina, janah dak mertambah-tambah ngo bilangenna gennep ari.

⁶Kumarna oda ipadiat Tendi Dèbata ijamitaken si Paulus dekket si Silas kata Dèbata i Asia, gabè iterusken kalak i mo pedalanenna mi Frigia dekket Galatia.

⁷Nai soh kessa mo kalak i mi perbalengen tanoh Misia, ioji kalak i mo merdalan mi suberri aur Bitinia tapi oda ipadiat Tendi Jesus kalak i.

⁸Nai gabè merdalan mo kalak i mengarbis aur Misia, jadi soh mo kalak i mi Troas.

⁹Bernginna idi i Troas idah si Paulus mo sada alaten. Ibas alaten idi idah mo sada kalak Makedonia dak mengendik-ngendiksa mendokken, “Suberrang mo kono mi Makedonia mengurupi kami.”

¹⁰Idah si Paulus kessa mo alaten i, mèter itaki kami mo berkat mi Makedonia, ai dokatè nami, Dèbata ngo mendokken kami laus mi sidi lako magahken Sukuten Kelluahen i.

¹¹Nai mèter merbungki mo kami i Troas nai memènter mi Samotrake janah sibarembenkenna mi Nèapolis.

¹²I sidi nai berkat mo kami mi Pilipi imo kuta simbelgahna i nagerri Makedonia, janah termasuk gemgemmen Rom ngo i. I sidi mo kami barang piga-piga ari.

¹³Tupung ari Sabat laus mo kami mi ruar kuta i, mi biding laè, lako mennulusi bekkas mersodip kalak Jahudi, ai dok atè nami tentu lot i sidi. Nai kundul-kundul mo kami ninganna mengeranai dekket daberru-daberru sienggo mertumpu i sidi.

¹⁴Lot mo i sidi sada kalak daberru mergerar sm Lidia. Sada kalak pertiga-tiga kaèn mbalo ngo ia i Tiatira, janah merkebiaren midah Dèbata. Jadi ibuka Tuhan i mo pennarihenna, gabè iradum-radumi mo jamita si Paulus i.

¹⁵Nai gabè iperridi mo si Lidia dekket karina kalak i si sada jabu, janah gabè iarahken mo kami mi bagesna, nina mo, “Mula tuhu ngo enggo percaya aku taba Jesus dokatè ndènè, kiserrang mo kènè lebbè mi bagesku.” Pella dak ièlèk-èlèk kami.

¹⁶Tikan sikali tupung laus kami mi bekkas mersodip i, pesimbak mo kami dekket sada kalak daberru hamba janah nangguru pertendung ngo ia. Merkitè tendungna i, mbuè ngo laba dapet indukna.

¹⁷Dak ièkut-èkut ngo si Paulus bak kami ninganna mendilo-ndiloken, “Naposo Dèbata simeheji i ngo kalak èn, lako magahken dalan kelluahen ndènè!”

¹⁸Dak iempet daberru i ngo katana bagidi barang piga-piga ari. Tapi gabè ncego mo atè si Paulus, itulihken mo ia janah idokken, “Merkitè-kitè gerar Jesus Kristus, kudokken karuar kono i daberru idi nai!” Nai mèter karuar mo gejapkenna i silanna i bai daberru idi nai.

¹⁹Tapi idah induk somangna i kessa mo oda lot nèngè laba iakap bai daberru idi nai, itangkup kalak i mo si Paulus dekket si Silas, iruah kalak i mo mi kerungguun mi hadeppen penghukum.

²⁰Iaduken mo si Paulus dekket si Silas taba pengerajai, nina mo, “Gontar ngo ibaing kalak Jahudi èn kutanta!

²¹Ipeddahken ngo siso ndorok ulanken janah ngganè ngo i banta kalak Rom. Oda ndorok terjalo kita barang pe menguei kecemmalen bagi.”

²²Nai gabè dekket ngo jelma nterrem mengalo taba si Paulus bak si Silas, iribaki penghukum i mo oles kalak i sidua, janah isuruh mo mengeligasi.

²³Enggo kessa narih toko dekkahna iligasi, ipemasuk mo kalak i mi kurungen. Idokken ma mo taba perjaga kurungen i, asa tuhu-tuhu ijaga kalak i.

²⁴Kumernaken perèntah idi, gabè ipemasuk nola mo kalak i mi kurungen perbagasen, janah ibèangken ngo nèhè kalak i.

²⁵Mayak tengah mberngin mersodip mo si Paulus dekket si Silas janah merendè memoji-moji Dèbata ipedengkoh-dengkoh si ni kurungen i.

²⁶Nai sintempu mo masa rènur mergegoh kalohoon sanga tumuyu-tuyu batu cendi kurungen i. Nai mèter mbuka mo gejapkenna idi pèntu kurungen i, janah ntalkas mo karina rantè bak bèangen ni sidi.

²⁷Ndungo janah tersengget mo penjaga kurungen i. Idah kessa mo dalngah ngo keppè pèntu kurungen i, iberkat mo peddangna naing mendelles, ai idokdok enggo mperrus karina siterkurung ni sidi.

²⁸Tapi ipegang si Paulus mo sorana mendiloken, nina mo, “Ulang idelles ko dirimu, ai isèn ngo kami karina!”

²⁹Nai ipido mandur kurungen i mo togok, lojang mo ia mi bagasen, mèter isembah mo si Paulus dekket si Silas ninganna menggirgir.

³⁰Iarahken mo kalak i mi ruar janah mengkuso mo ia taba kalak i, nina mo, “Kènè alè Tuan, bakunè ngo kubakin asa maluah aku?”

³¹Nai ialoi si Paulus bak si Silas mo, “Kepercayai mo Tuhan Jesus — asa maluah kono dekket pengisi bagesmu!”

³²Nai iajarken si Paulus bak si Silas mo kata Tuhan i bai mandur kurungen i, dekket taba karina jelma silot i bagesna.

³³Nai mèter ialengi mandur kurungen i mo kalak i bernginna idi, ipebersih mo ugah pengeligasen i. Jadi mèter iperridi kalak i mo ia rebbak dekket karina pengisi bagesna.

³⁴Nai iarahken mo si Paulus dekket si Silas mi bagesna janah ihantari mo pangaan taba kalak i sidua. Lolo kalohoon ngo atèna dekket karina pengisi bagesna kumarna enggo percaya ia taba Dèbata.

³⁵Siceggen sibarembenkenna nola, ipasulak penghukum i mo upasna mi kurungen mendokken, taba mandur kurungen i asa ipaluah si Paulus dekket si Silas i.

³⁶Ibagahken mandur kurungen i mo berita i taba si Paulus, nina mo, “Enggo iperèntahken penghukum maluah mo kènè. Nteng, karuar mo kènè, janah njuah-njuah mo!”

³⁷Tapi idokken si Paulus mo taba upas i, “Kalak Rom ngo kami. Enggo iligasi kami i hadeppen sinterrem janah ikurung, oda lebbè iperèso. Keppè bagèndari idokken asa laus kami bagi sipsip? Oda uè kami! Dokken mo roh penghukum i lako paluahken kami.”

³⁸Nai ibagahken upas i mo kata i taba penghukum i. Enggo kessa ibettoh penghukum i, kalak Rom ngo keppè si Paulus dekket si Silas mbiar mo kalak i.

³⁹Roh mo kalak i mengidoken asa ulang pella ilugun si Paulus bak si Silas pemmakinna i. Jadi iarahken mo kalak i mi ruar, janah ièlèk-èlèk mo kalak i sidua, asa itadingken kuta i.

⁴⁰Itadingken si Paulus bak si Silas mo kurungen i, laus mo kalak i mendahi si Lidia. Perridah kessa mo kalak i dekket sipercaya i, mendokken kata apo-apo mo kalak i, nai berkat mo si Paulus dekket si Silas.