Read Batak Dairi Ulaan Apostel 4 Bible Online

Ulaan Apostel 4 - Batak Dairi bible

Ulaan Apostel 4

¹Sinderrang mengerana dèng si Petrus dekket si Johanes taba jelma nterrem i, roh mo imam-imam ekuten bagi ma ekuten perjaga Bages Dèbata bak kalak Sadusè.

²Mellagab mo kalak i, kumarna idokken si Petrus dekket si Johanes tersèngèt Jesus sienggo balik nggelluh i kemmatèen nai. Janah èn mo membuktiken magahken kalak simatè mengolihi nola nggelluh.

³Nai itangkup kalak i mo rasul sidua kalak i, janah ipemasuk mi kurungen, kumarna enggo berngin, gabè i kurungen i mo kalak i soh mi sibarembenkenna.

⁴Tapi mèduk ngo gabè percaya simendengkoh jamita apostèl i. Gabè tambah mo bilangen kalak i, enggo lot kira-kira lima ribu kalak pellin daholi.

⁵Sibarembenkenna idi, pulung mo i Jerusalem anggota runggu agama pengulu-pengulu Jahudi dekket guru-guru agama.

⁶Pejumpa mo kalak i i sidi dekket Imam Huntuun si Hanas bak si Kayafas, si Johanes dekket si Aleksander, bagidi ma ngo dekket karina sincelket Imam Huntuun i.

⁷Nai iembah kalak i mo si Petrus dekket si Johanes mi hadeppen kalak i, nai ikusoi mo, “Bakunè ngo pemmaing ndènè lako pemmalumken nitempuk sigading i? Merkitè kegegohen kadè barang merkitè kuasa isè ngo kènè petupaken i?”

⁸Nai ikuasai Tendi Perbadia mo si Petrus, ialoi mo, “Kènè alè karina pengulu-pengulu bangsa Israel dekket karina kènè pengetuai-pengetuai runggu!

⁹Mula kennah iperrèso mo kami sidari èn kumarna simendè kubaing kami mengurupi sada kalak nitempuk sigading, janah naing ibettoh kènè merkitè kuasa isè kalak idi ipemalum,

¹⁰bettoh kènè mo dekket karina kènè bangsa Israel. Cènder pè bagèndari kalak èn i hadeppen ndènè i sènda kumarna enggo malum iakap, imo kumarna kegegohen dekket kuasa Jesus Kristus kalak Nazaret sienggo ipersilangken kènè i ngo. Tapi enggo ipegelluh Dèbata nola Ia.

¹¹Jesus i ngo nidokken ayat ipas Bibèl bagèen: ‘Batu nipatakken ndènè tukkang bages idi, i ngo gabè batu cendi persoki.’

¹²Pellin merkitè Jesus ngo kessa maluah jelma. Kerna sada kalak poda lot jelma i suberri dunia èn, barang merkitè gerar isè pè sienggo menjalo kuasa bai Dèbata nai lako paluahken kita.”

¹³Gabè lengang mo anggota runggu i mengidah keberaniin si Petrus dekket si Johanes i, terlebbih-lebbih kumarna ibettoh kalak idi, ukum apostèl sidua kalak idi jelma biasa ngo, siso pella ndates sikkolana. Nai ibettoh kalak idi mo, duana apostèl i, sisiin Jesus ngo.

¹⁴Tapi oda terdokken kalak i ranana, kerna cènder ngo i hadeppen kalak i jelma sienggo nipemmalumna i, rebbak dekket si Petrus dekket si Johanes.

¹⁵Nai ipasulak kalak i mo mi ruar apostèl sidua kalak i sigejap, jadi mersungkuun mo kalak i samahsa,

¹⁶nina kalak i mo, “Bakunè mo sibaing taba kalak ènda? Karina pengisi Jerusalem ngo enggo bettoh-bettohen kellengangen mbellen èn, kalak i sidua ngo menghanaken. Oda terperso kita i.

¹⁷Tapi asa ulang makin sar mi jelma nterrem, siasup mo kalak i sidua, asa ulang nèngè iranaken kalak i barang mendahi isè pè merkitè gerar Jesus.”

¹⁸Nai idiloi kalak i nola mo mengolihi apostèl sidua kalak i mi bages, iperèntahken mo, mak ndorok nèngè apostèl i menggegoli barang mengajari pè merkitè-kitè gerar Jesus.

¹⁹Tapi ialoi si Petrus dekket si Johanes mo, “Kènè mo mengeradumi, apaina ngo sènteng i hadeppen Dèbata; menguèi perèntah ndènè ngo barang menguèi perèntah Dèbata.

²⁰Ai oda tersipken kami, mak kennah kuranaken kami, kadè sienggo kuidah janah sienggo kudengkoh kami.”

²¹Jadi kumarna oda lot dalanna lako menghukum si Petrus dekket si Johanes, gabè pellin asup mo kessa ipememmes kalak i, nai ipaluah mo kalak i sidua, ai mbiar ngo kalak i midah jelma nterrem sidak memoji-moji Dèbata kemulihken tanda kellengangen i.

²²Merdemmu ma kalak sinipemalum idi pè engo lebbih empat puluh tahun umurna.

²³Enggo kessa ipaluah kalak i si Petrus dekket si Johanes, balik mo kalak i mendahi denganna, isukutken mo taba kalak i karina sinidokken imam-imam ekuten dekket pengulu-pengulu Jahudi taba kalak i.

²⁴Idengkoh karina denganna i kessa mo sinisukutken kalak idi, gabè sada atè mo kalak i rebbak mersodip taba Dèbata, “Alè Tuhan Dèbata Kono ngo meghanaken langit dekket tanoh èn, bak laut soh mo karina sinna.

²⁵Merkitè-kitè TendiMu, enggo kin ngo idokken kono taba empung nami si Daud naposomi; nimu ngo, ‘Kasa mengoga-ngoga kalak siso menandai Tuhan, kasa siso merguna ipikiri karina bangsa.

²⁶Kèkè ngo raja-raja ni tanoh èn, janah merpulung ngo penggemnggemmi lako juhap mengalo Tuhan Raja Sipaluah i!’

²⁷Ai tuhu ngo enggo merpulung i kuta èn, si Herodes dekket si Pontius Silatus merrunggu dekket kalak siso menandai Tuhan rebbak dekket kalak Israel lako mengalo Jesus naposomu simbadia i; janah sienggo nipebangkitmu gabè Raja Sipaluah.

²⁸Mersada taki ngo kalak i lako pesautken sienggo nitentukenmu kin kennah saut masa. Janah kono ngo menentuken i merkitè kuasa bak harkatMu sendiri.

²⁹Bagèndari pè alè Tuhan tengen mo asup-asup kalak idi. Duè mo kami naposomen oda mbiar lako mennukutken kataMu i.

³⁰Janah dak berrèken mo pengurupiMu pemalumken kalak simersakit dekket tanda kellengangen merkitèken kuasa dekket kegegohen i bagasen gerar Jesus naposoMu simbadia i.”

³¹Enggo kessa pul kalak i mersodip, mèter dumegger mo bekkas kalak idi i. Nai dom kuasa Tendi Perbadia mo kalak i karina, gabè mersampang atè mo kalak i karina lako mengeranaken kata Dèbata.

³²Karina kalak i sipercaya i, sada kata sada orjok ngo. Oda lot sada kalak pè giam sikelloten mendokken, milikna sadasa kessa hartana, tapi gabè rebbak sisada harta ngo kalak idi iètong.

³³Nai gabè mergegoh kalohoon mo apostèl-apostèl i mengindangken enggo balik nggelluh Jesus i. Nai gabè ikellemmoken sinterrem mo kalak i, janah ipasu-pasu Dèbata.

³⁴Ai sada kalak poda kalak i kurangen i barang kadè pè, kerna mula lot kalak i merbages barang merjuma, idèa ngo i; jadi iembah kalak i ngo tokorna i,

³⁵ipessoh ngo tokorna i taba apostèl. Nai ipembagiken apostèl i mo kèpèng i taba kalak simemerluken.

³⁶Bagidi ma mo lot sada kalak Lewi mergerar si Josep kalak pulo Kiprus, nigeraren Apostèl i Barnabas (lapatenna pengapoi).

³⁷Idèa mo tanoh bagianna, iembah mo kèpèng tokorna i janah iberrèken taba apostèl i.