Read Batak Dairi 1 Korintus 1 Bible Online

1 Korintus 1 - Batak Dairi bible

1 Korintus 1

¹Kènè dengan Kuria ni Tuhanta si ni Korintus! Enggo idilo Dèbata kènè gabè ummatNa kerna milik Kristus ngo kènè, rebbak dekket karina kalak barang i dikè sambing simersembah Tuhanta Jesus Kristus, Tuhan kalak idi bak Tuhanta ma. Aku, si Paulus dekket denganta si Sostenes, merketoken katerra pè iberrèken Dèbata Bapa dekket Tuhan Jesus Kristus mo pasu-pasu dekket damèNa bai ndènè. Aku rasul Kristus Jesus mennurat surat èn, sinipebangkit Dèbata sendiri janah mengèkutken lemmo atèNa.

⁴Dak mendokken melias atè ngo aku taba Dèbatangku kumarnaken kènè, ai enggo ijalo kènè basa-basa Dèbata merkitè-kitè Jesus Kristus.

⁵Kumarna enggo gabè milik Kristus kènè, jadi gabè kaya ngo kènè ibas segalana. Ai enggo mbages nahu ndènè terrèngèt segalana, dekket pandè ngo kènè mengajarken perbinettohen i.

⁶Tanda enggo ikeddarohken kènè ngo sukuten terrèngèt Kristus i,

⁷gabè oda nèngè kurangen kènè ibas matcam bagè sibasa-basa Dèbata, ninganna kènè memèma-mèma pekkiroh Tuhanta Jesus Kristus janah idah karina kalak.

⁸Kristus i sendiri ngo pehotken kènè soh mi puncana; asa ulang mertikas kènè idapet mula roh kessa Ia.

⁹Kettoken ngo Dèbata sienggo mendilo kènè mi persaoren dekket anakNa Jesus Kristus, Tuhanta idi.

¹⁰Tapi kupido bai ndènè alè dengan merkitèken gerar Tuhanta Jesus Kristus, tettap mo kènè karinana sada kata; asa ulang lot perselisihen i tengah-tengah ndènè. Kennah mersada kata kènè, sada ukur janah sada pikiren.

¹¹Kerna terbertik ngo soh bangku arap dengan simpangaan si Kloë, terrèngèt perselisihen ndènè.

¹²Sikudokken imo, “Lot iantara kènè mendokken, sisiin si Paulus ngo aku,” dèba mendokken, “sisiin si Apolos ngo aku,” dèba nai mendokken sisiin si Kepas ngo aku; dèba ma mendokken “sisiin Kristus ngo ukum aku.”

¹³Ai terpella-pella ngo Kristus idi? Otang oda nung si Paulus tersilang mengkepkep kènè? Otang oda ngo mi bagasen gerar si Paulus kènè iperridi?

¹⁴Tuahna mo oda lot kuperridi barang isè bai ndènè nai laènken si Krispus dekket si Gayus.

¹⁵Ulang mo lot mendokken asa gabè pengèkutku ia makinken asa kuperridi ia. (

¹⁶Oo, uè, dekket ngo keppè simpangaan si Stefanus kuperridi. Nai laènkenna i, ukum kuèngèt oda lot nèngè barang isè kuperridi).

¹⁷Ipasulak Kristus aku oda ngo lako perridiken, tapi lako merrèken Sukuten Kelluahen bai Dèbata nai ngo; idi pè oda ngo kubakin pantas-pantas jelma mengerrana. Ai ukum kerna kepantasen ngo kubakin, gabè moru mo kuasa permatè Kristus i silang i.

¹⁸Kemmotoon ngo permatè Kristus i kayu silang i ukum taba kalak sinaing ihukum Dèbata. Tapi kuasa kegegohen Dèbata ngo idi ukum banta nipaluah Dèbata.

¹⁹Tersurat ngo ibas Bibèl bagèen, “Kusursari ngo perbinettohen kalak sipandè janah Kutumpatken ngo kepistaren kalak simpantas.”

²⁰Asa kadè mo gunana kalak singgeddang radumen? Kadè gunana kalak simpantas? Kadè guna simbages nahu sibagèndèen? Ai gabè kemmotoon ngo kepantasen jelma idi ibakin Dèbata!

²¹Barang bakunè pè kepandèen jelma, oda tertandansa Dèbata ukum merkitè kepandènna idi. Tapi kemmulihken kebijaken Dèbata gabè ipaluah ngo jelma sipercaya tabaSa, merkitèken sukuten kemmotoon dokatè dunia èn.

²²Mengido tanda kellengangen ngo ukum kalak Jahudi mahan bukti, janah ukum kalak Junani menulusisa merkitè perbinettohen dunia èn.

²³Tapi ukum kami, pellin Kristus simatè tersilang idi ngo kusukutken kami. Terselkah ngo ukur Jahudi kumarna i janah kemmotoon ngo i bai kalak siso bangsa Jahudi.

²⁴Tapi ukum bai kalak sienggo nidilo Dèbata — barang Jahudi pè i barang siso Jahudi — sukuten idi imo kuasa dekket kebijaken ni Dèbata.

²⁵Ai bijaken dèng ngo mula pè tengngennen bagè kemmotoon sitaridah bai Dèbata, ulang pada kebijaken jelma; janah gegohen dèng ngo mula pè pè lot tengngennen ndotè bai Dèbata ulang pada kegegohen jelma.

²⁶Alè dengan! Perdatèken kènè mo lebbè bakunè kènè sinderrang idilo Dèbata kènè. Oda kènè kalak bijak, oda piga merkuasa, oda piga kalak raja, ukum mengèkutken kejelmaan.

²⁷Ai sengaja ngo ipilih Dèbata simoto dokatè dunia èn, janah sindotè dokatè dunia èn lako pemmèlaken kalak simergegoh dokatè dunia èn.

²⁸Kalak simerlèa, hina dekket siso merlapaten iètong dunia èn idi ngo ipilih Dèbata, asa gabè isomadaken nipesangap dunia èn kin,

²⁹merkitè bagidi sada kalak poda ndorok gegah i hadeppen Dèbata.

³⁰Dèbata ngo memmakin asa gabè sada kita ibagasen Kristus Jesus. Merkitè Jesus Kristus ngo kita gabè bijak. Janah merkitè Ia ngo memmakin asa gabè merdemmu kita dekket Dèbata. Kristus ma ngo memmakin kita bennar, asa gabè ummat Dèbata kita. Kristus ma ngo paluahken kita ibas dosanta nai.

³¹Asa saut bagè sitersurat ibas Bibèl, “Barang isè naing moji dirina, kennah ibagasen sienggo nibaingken Dèbata idi mo ia memmoji dirina.”