Read Batak Dairi 1 Korintus 10 Bible Online

1 Korintus 10 - Batak Dairi bible

1 Korintus 10

¹Kènè alè dengan, naing mo tangkas bettohen ndènè katèngku simasa bai empungta arnia sinderrang mengèkutken si Musa. Karinana ngo nemmuken kalak idi ilènggemmi hembun janah njuah-njuah lako merlantes Laut Mbara i.

²Lako mengèkutken si Musa, iperridi ngo kalak i karinana ibagasen hembun dekket mi tengah laut.

³Janah dos ngo pangaan pertendiin ipangan kalak idi,

⁴janah dos ma ngo ènumen pertendiin iènum kalak i karinana, ai rebbak mènum ngo kalak idi i delleng batu pertendiin simendengani kalak i; Kristus ngo delleng batu idi.

⁵Tukasi pè bagi, buèen ngo kalak i oda ikellemmoken Dèbata, kerna nai ngo asa gabè radas janah mersara-sara bangkèna i padang gurun.

⁶Karinana idi mahan codiin penjerraan mo banta, asa ulang cubellekken kita mengulaken jahat bagè ulah-ulah ni kalak idi.

⁷Janah ma, asa ulang kita menembah sembahen, bagè nibaingken dèba ibas kalak idi nai. Asa tersurat ma ngo ibas Bibèl, “Kundul ngo kalak i mangan mènum, nai kèkè nola mo tumataki menembah gana-gana.”

⁸Ulang mo kita luhlah bagè dèba kalak i mengulaken luhlah, gabè radas kalak i duapuluh tellu ribu kalak sidarinkenna i.

⁹Ulang siunjuni Tuhan i, bagè dèba kalak i mengunjuni tikala i, gabè mermatèen dèba kalak i itebbi nipè darih.

¹⁰Ulang mo kita ngutnguten, bagè dèba kalak i singutnguten di, gabè ibunuh Malaèkat Kemmatèen idi kalak i.

¹¹Codiin ngo karina simasa bai kalak idi i, janah gabè lumba-lumba banta ngo i asa isuratken; ai enggo makin njolmit kita mi ajal dunia èn.

¹²Èn pè, barang isè dokatèna enggo nteg- guh ia cènder, mermanat mo ia asa ulang ndabuh.

¹³Ai nasa pengojiin sinirasaken ndènè, pellin pengojiin biasa ngo i bai jelma. Tapi kettoken ngo Dèbata, ai oda ipaduè kènè ioji lebbih daripada gegoh ndènè. Sinderrang sempa taba kènè pengojiin i, mènter iurupi ngo kènè asa tergongken kènè.

¹⁴Kernana i alè dengan sinikekellengen! Kecegoken kènè mo mersembah taba gana-gana bak bègu.

¹⁵Mengerrana aku ta- ba kènè bagè cara taba kalak jelma bijak. Timbangi kènè mo katangku i.

¹⁶Sinder- rang kita mènum anggur ibas caban pasu-pasu idi nai, merkitè mendokken mejalo metangkup taba Dèbata, otang menuduhken kesadanta dekket Kristus mi bagasen kemmatèenna i ngo idi? Janah sinderrang sipella-pella roti i janah rebbak kipangan, otang mennuduhken kesadanta mi badan Kristus idi ngo i?

¹⁷Kumarna sada ngo roti, janah karina ngo kita kipangan i roti sisada i nai, jadi kita sinterrem èn gabè sada badan ngo karinana.

¹⁸Perdatèken kènè mo kalak Jahudi. Kalak i sikipangan pangaan sinipèlèken i babo langgaten pemèlèen. Gabè sada ngo kalak i dekket langgaten bekkas pencibalen pèlèen i.

¹⁹Kadè tujuan ranangku ènda? Oda lot kadè lapaten sembahen barang pè pangaan sinipèlèken bai sembahen i.

²⁰Oda lot tujuun nipèlèkenna i bai Dèbata, laènken mi sembahen ngo. Jadi oda lemmo atèngku mersaor kènè dekket tendi jahat.

²¹Oda ndorok rebbak iènum kènè arap perrènumen Tuhan i nai bak i perrènumen tendi jahat i nai! Ulang mangan kènè i langgaten Tuhan, mangan ma i langgaten tendi jahat!

²²Barang gabè njais mo kita taba Tuhan? Barang gegohen ngo kita dok atènta asa Tuhan?

²³Nina dèba jelma, “Ndorok ngo kita karina memahan barang kadè sambing dok atèna.” Tuhu ngo i, tapi oda karina sinibahanken idi merguna. “Ndorok ngo sibakin barang kadè sambing dok atènta,” — tapi oda karinana idi pesellohken nggelluhta.

²⁴Ulang mo lot barang isè mengkerencetken siperlu bana sambing, tapi gennep mo mengkerencetken siperlu bai sidèban.

²⁵Ndorok ngo ipangan kènè barang gulè kadè sambing idèa dèba ipajek gulè. Ulang pella risiki kènè mula pè lot sèk ibagasen ukur ndènè.

²⁶Kerna tersurat ngo ibas Bibèl, “Tuhan i ngo sidasa dunia èn bak sagumanna pengisina pè.”

²⁷Mula idilo siso Kristen kènè mangan janah iuèi kènè dilo-dilo idi, pangan kènè mo barang kadè pè ihidangken bai ndènè, ulang pella risiki kènè barang i dikè nai pa- ngaan idi, tah bakunè sèk atè ndènè.

²⁸Tapi mula lot mendokken bai ndènè, “Sienggo ipèlèken ngo pangaan ènda mi sembahen,” ulang pangan kènè idi, kerna mennarihken kepentingen kalak idi dekket bagi ma sèk atè ndènè.

²⁹Tapi oda ngo kerna sèk ukurmu sikudokken, tapi sèk ukur ni kalak idi ngo. Tah bakunè lot mengkuso, “Kasa nola gabè ibatasi gerrek atè ndèba kebèbasenku?

³⁰Ai mula kupangan pangaan janah lebbèen kudokken mejalo metangkup taba Dèbata, kasa mo pella irèhèi dèba aku kipangan idi, ai enggo mo kudokken mejalo metangkup taba Dèbata?”

³¹Èn pè, barang kadè pè ulaan ndènè — mangan barang mènum pè kènè — bakin kènè mo i karina pesangapken Dèbata.

³²Ulang mo bakin kènè pertuktuken memmaingken merdosa kalak, tah Jahudi pè i barang siso Jahudi, barang i kuria ni Dèbata.

³³Bagè aku mo kènè. Kuuasahaken ngo asa lolo kalak karina merkitè-kitè pemmahanku, janah oda kubaing merpengait. Asa merkitè bagidi, ndorok maluah kalak idi karina.