Read Batak Dairi 1 Korintus 11 Bible Online

1 Korintus 11 - Batak Dairi bible

1 Korintus 11

¹Aku mo codi kènè, bagè aku mencodi Kristus i!

²Kupoji ngo kènè, kumarna dak tong ièngèt kènè aku janah dak ijèmak kènè ngo peddah sikuberrèken idi bai ndènè.

³Tapi naing ngo bettohen ndènè dok atèngku imo: Kristus ngo ekuten karina anak laki, janah sinibalèna ngo ekuten sinibages; nai Dèbata ngo ukum ekuten Kristus.

⁴Barang isè daholi mertangkuluk tikan mersodip, barang merjamita, mengelèai Kristus ngo ia.

⁵Tapi mula daberru oda mersaong tikan mersodip barang merjamita, mengelèai sinibalèna ngo ia, ai sinibalèna i ngo takalna. Tosè ngo i bagè sienggo icukur takal daberru i.

⁶Ai mula oda uè mersaong daberru, lotiin mo igonting bukna i. Tapi mula igonting barang icukkur buk daberru i, gabè kinilèa ngo i bana, kerna nai mersaong mo ia.

⁷Ukum daholi oda pella perlu mertangkuluk, ai codi mi rupa dekket kehejiin Dèbata ngo ia, tapi ukum daberru, imo mennuduhken kesangapen daholi,

⁸ai oda ngo ihanaken daholi i tarap daberru nai, tapi daberru i ngo ihanaken arap anak laki nai.

⁹Janah oda ngo itempa anak laki i kumarna keperluun daberru, tapi daberru itempa barang ihanaken mahan keperluun mi anak laki.

¹⁰Kerna nai, lako pesennangken ukur malaèkat patut mo mersaong daberru idi, ai pertandaan ngo i memmagahken tunduk ia bai sinibalèna.

¹¹Tukasi pè bagidi, ukum kita sibagè kalak Kristen, oda lot anak laki kum oda lot daberru, janah oda ngo lot daberru idi mula oda lot anak laki.

¹²Ai tukasi pè daberru i mulana i itempa arap anak laki, tapi enggo kessa i, tubuh arap daberru nai nola ngo anak laki; janah karinana idi bai Dèbata nai ngo rohna.

¹³Timbangi kènè mo lebbè; selloh ngo barang oda sada kalak daberru mersodip mi Dèbata oda pella mersaong?

¹⁴Ibas bakkonta kin pè enggo mo ipeddahken Dèbata, mula nggeddang buk daholi, kurang selloh ngo janah oda patut.

¹⁵Tapi ukum daberru, mengkerohken pemmojiin ngo bana mula nggeddang bukna.

¹⁶Tapi tah lot kalak menduhuli kami terrèngèt idi, pellin èn ngo kudokken bana: Kami sendiri dekket karina Kuria i bagidi ngo kecemmalen nami, laènken i oda lot nè.

¹⁷Ukum sinaing kudokken bagèndari nola, oda nèngè kupoji kènè, kerna lot oda kukellemmoken, imo: Oda mengkerohken merandal perpulungen ndènè, tapi mi simerroha ngo.

¹⁸Ai perlebbè kudengkoh berritana, merpihak-pihak kènè tikan merpulung i Kuria. Tuhu ngo sendah i.

¹⁹Nemmuken mak terjua kennah tubuh ngo bai ndènè perselisihen, asa taridah isè ngo tuhu-tuhu Kristen.

²⁰Tapi tikan merpulung kènè oda ngo tandaan bagè kipangan hidangen Perpadanen Tuhan.

²¹Kerna tikan merpulung i kènè, mersibuat lahna ngo, gabè lot dèba oda kennaan barang kadè, keppèken dèba sampè mabuk.

²²Kasa nola bagidi? Otang lot ngo bages ndènè bekkas mangan dekket mènum? Barang tah pis ngo mata ndènè midah Kuria Dèbata, dekket asa pemmèlaken kalak sincor; bakunè mo ndia ningku taba kènè? Kupoji mo kènè? Oda! Barang bakunè pè oda kupoji kènè!

²³Ai bai Tuhan nai ngo kujalo sikuajarken bai ndènè imo: I berngin tikan terselbuh Jesus Tuhanta i, ibuat mo roti,

²⁴enggo kessa idokken mejalo metangkup taba Dèbata, ipenggelli mo roti i dekket tanganNa, nai nina mo, “DagingKu ngo èn siniberrèken mengkepkep kènè. Bakin kènè mo bagi lako mernèngèt Aku.”

²⁵Bagidi ma ngo tikan mènum anggur i kessa pul mangan, ibuat mo perrènumen i ninganna idokken, “Padan sirembaru ngo èn, isahken merkitè darohKu. Baing kènè mo bagidi lako mernèngèt Aku gennep iènum kènè anggur i.”

²⁶Ai gennep ipangan kènè roti janah iènum kènè anggur sibagèen, mennukutken permatè Tuhan i ngo kènè, soh mi lebbè balik nola Ia.

²⁷Kerna nai, barang isè kipangan roti Tuhan idi barang mengènum anggur Tuhan i dekket cara siso patut, merdosa ngo ia mi daging dekket daroh Tuhan i.

²⁸Jadi kennah lebbèen mo itimbangi dirina, baru pè asa ipangan roti i dekket iènum anggur i.

²⁹Ai barang isè kipangan roti i dekket mengènum anggur i, keppèken oda ihumulken bahasa daging bak daroh Tuhan i ngo idi, gabè mengaitken hukum Dèbata mi dirina ngo ia, mula ipangan janah iènum.

³⁰Kumarna naidi ngo asa nterrem kènè sakiten dekket ndotè; lot dèba matè.

³¹Tapi mula lebbèen siperrèso dirinta, oda ngo ihukum Dèbata kita.

³²Mula salah keppè kita nina Dèbata, Iligas mo kita, asa ulang pella ihukum nè kita rebbak dekket dunia ènda.

³³Kumarna i alè dengan, mula pulung kènè lako kipangan hidangen Tuhan, kennah mersipèmaan mo kènè.

³⁴Mula tah lot mellèhè, lebbè mangan mo ia ibagesna asa ulang gabè mengalengi hukum ni Dèbata kènè i perpulungen idi. Ukum terrèngèt sidèbanna, lebbè roh pè aku asa kubagahken bai ndènè.