Read Batak Dairi 1 Korintus 12 Bible Online

1 Korintus 12 - Batak Dairi bible

1 Korintus 12

¹Bagèndari alè dengan terrèngèt sibasa-basa niberrèken Tendi Dèbata. Dok atèngku naing mo ntangkas bettohen ndènè terrèngèt idi.

²Èngèt kènè mo lebbè sinderrang madèng itandai kènè Tuhan, bagè siterteggu janah terrabin ngo kènè lako mengèkutken gana-gana sipekkak idi.

³Jadi kubagahken mo bai ndènè ukum kalak sienggo idengani Tendi Dèbata oda nggèut ia mendokken, “Ituras mo Jesus i!” Nai ukum kalak siso idengani Tendi Dèbata, oda ma ngo uè mendokken, “Jesus ngo Tuhan!”

⁴Mermatcam bagè ngo sibasa-basa bai Tendi Dèbata nai, tapi karinana ngo iberrèken Tendi sisada idi.

⁵Mermatcam bagè ngo ulaan mengkebasi Tuhan idi i Kuria, tapi sada ngo Tuhan.

⁶Mermatcam bagè ngo mengulaken ulaan Tuhan i, tapi sada ngo Dèbata simemerèken gegoh lako mengulaken idi.

⁷Tapi lako menumpaki kita ngo mengula Tendi Dèbata mi gennep-gennep kita.

⁸Bai sisada iberrèken ngo merkitè Tendi i mpantas mengerana. Taba sisada nai, iberrèken Tendi sisada i ngo perbinettohen lako peterrangken terrèngèt Dèbata.

⁹Bai sisada nola, iberrè Tendi sisada i ngo kepercayaen, nai taba sidèbanna ma iberrèken Tendi i ngo kuasa lako pemmalumken.

¹⁰Taba sisada, iberrèken kuasa lako memmakin tanda kellengangen janah taba sisada nola ma iberrèken alamat lako magahken hendak Dèbata. Taba sidèban nola iberrèken ngo penandaiin tah siapai bai Tendi Dèbata nai, janah siapai oda bai Tendi Dèbata nai. Lot ma ngo iberrèken mengkataken merbagè-bagè kata sidèban, janah lot ma iberrèken perbinettohen lako petterangken kata sidèban i.

¹¹Tapi karinana idi iberrèken merkitè-kitè Tendi sisada i, ai pellaèn-laèn ngo pemmèrrèkenna mi gennep jelma merguru mi lemmo atè Tendi idi.

¹²Terpecodi ngo Kristus idi bagè cara badan jelma. Sada ngo badan i, tapi mbuè ngo sendihina. Tapi barang bakunè pè buèna sendihi idi, iterdun ngo ia gabè sada badan.

¹³Bagi ma ngo kita karina, barang kalak Jahudi pè i, barang siso kalak Jahudi, tah hamba pè i, barang siso hamba; karinana ngo kita iperridi Tendi sisada i, asa gabè sada badan kita mi Kristus i. Janah iiani Tendi sisada i ngo kita karinana.

¹⁴Ai badan i pè oda ngo ia pellin sada sendihi sambing, tapi mbuè ngo sendihina.

¹⁵Umpamana tah idokken nèhè, “Kerna oda tangan aku, jadi oda ikira masuk badan aku,” oda ngo tuhu mak terkira ia masuk badan.

¹⁶Janah mula idokken coping, “Kerna oda mata aku, jadi oda ikira aku masuk badan.” Oda ngo tuhu mak terkira coping masuk badan.

¹⁷Mula pellin mata kin karinana badan i, bakunè mo badan idi ndorok mendengkoh? Barang mula coping karinana badan i, bakunè mo ndorok merpenganggoh?

¹⁸Tapi siidah ngo iatur Dèbata karinana perbakkasen sendihi badan i mengèkutken lemmo atè Dèbata.

¹⁹Ukum sada sendihi kin ngo kessa daging i, apai mo siterdokken simergerar badan?

²⁰Asa mula pè mbuè sendihi, sada ngo badan.

²¹Kerna nai oda terdokken mata taba tangan, “Oda man kadèngku kono!” barang takal taba nèhè, “Oda man kadèngku kono!”

²²Tapi soh mo tupèh perluna sendihi daging i tukasi pè bagè kurang hargana dokatè;

²³Balikna nola ngo tupèh, ai sendihi simerlèa dokatè, keppèken terlebbih ngo penghargainta bana. Sendihi singgodona dokatè, idi nola ngo sisarihken lebbèen.

²⁴Sendihi simerandalna idahen, gabè oda nèngè perlu nisarihken. Enggo mo ipettemmu Dèbata badanta i, janah mersangapen ngo ibakin sendihi simerlèa i.

²⁵Asa merkitè bagidi, oda merselisih nèngè badan i samahsa, ai enggo mersièngèt ulanna gennep sendihi idi.

²⁶Janah mula ncio iakap sisada, rebbak mengakapken ncio ngo karinana sendihi idi. Mula sada sendihi ipoji, rebbak mersampang atè ngo karinana sendihi i.

²⁷Karinana kènè rebbak gabè badan Kristus ngo, tapi samah-samah sendihi ngo kènè ibas badan i.

²⁸Bagidi ma ngo ibas Kuria pè. Enggo itentuken Dèbata ulaan mi gennep jelma; perlebbè rasul-rasul peduaken nabi-nabi; petelluken pengajari barang guru, nai menjalo kuasa memmaing kellengangen, menjalo kuasa pemmalumken, barang tah mengurupi sidèban, barang lako pemimpin, barang tah mengerranaken ibas kata sidèban.

²⁹Oda ngo karinana kalak idi rasul, barang nabi, barang guru. Oda ngo karinana menjalo kuasa memmaing kellengangen,

³⁰barang lako pejuahken sicioon, barang lako mengerrana ibas kata sidèban, barang peterrangken kata sidèban idi.

³¹Kerna nai tulusi kènè mo sibasa-basa simehamatna! Nai kubagahken nola mo bai ndènè simendèna kalohoon.