Read Batak Dairi 1 Korintus 14 Bible Online

1 Korintus 14 - Batak Dairi bible

1 Korintus 14

¹Dak mo usahaken kènè mengkekelengi sidèban. Keperluken kènè mo sibasa-basa niberrèken Dèbata, imo magahken taki bak hendak Dèbata bai jelma.

²Ai ukum kepandèen merkata sidèban, oda ngo jelma nipermongkamina; tapi mengerrana mi Dèbata ngo, oda lot jelma mengantusi siniruapkenna, ai Tendi Dèbata ngo makin asa iruapken kata i, pellin Dèbata ngo kessa memettohsa.

³Tapi ukum kalak simenjamitaken kata Dèbata, pesakatkensa taba jelma; lako petegguhken, pehèdu-hèduken dekket peloloken ukur.

⁴Ukum kalak simengerana ibas kata sidèban dirina ngo nipetteguhna, tapi ukum kalak simenjamitaken kata Dèbata, Kuria i ngo nipelliasna.

⁵Sampang ngo atèngku mula karina kènè mengerrana ibas kata sidèban, tapi simerandalna kaloon imo menjamitaken hendak Dèbata bai jelma, ai merkessurungen ngo kalak simenjamitaken hendak Dèbata ulang pada kalak perkata sidèban. Laèn mo mula ndorok ia petterangken niruapkenna kata sidèban i, asa iantusi karina kuria i.

⁶Umpamana mula roh aku mendahi kènè, janah mengerrana aku ibas kata sidèban, kadè mo gunana idi bai ndènè? Cituk poda lot gunana! Laèn mo mula kubagahken terrèngèt alamat bai Dèbata nai, barang kupetterrang terrèngèt Dèbata, barang kupessakat sukuten bai Dèbata nai, barang mengajari aku.

⁷Codinna, goci barang oning-oning ndorok mersora tukasi pè pè oda merkessah, ukum oda ngo ranggut sorana idi, bakunè mo ndorok nibettoh lagu kadè sinibaingna i?

⁸Barang pè sarunè umpamana isempul bagidi sambing, mènter lot nola mo kalak kebbas lako geraha?

⁹Bagi ma mo mula mengerrana kènè ibas kata sidèban. Ukum oda ngo ntangkas iruapken, isè poda me- ngantusi sinidokken ndènè i. Nai bagè angin menempul sambing mo rana ndènè i.

¹⁰Mermatcam bagè ngo perkataan i dunia èn, tapi karinana ngo kata i lot lapatenna.

¹¹Mula oda kuantusi rana niruapken dèba, otang dosken kalak sidèban ngo ia bangku, bagi ma mo aku merradepkensa.

¹²Asa kènè pè alè dengan, kubettoh perlu ngo bai ndènè sibasa-basa bagidi bai Tuhan nai. Tapi siperluna kalohoon bakin kènè mo sibasa-basa i lako mengurupi pehèdu-hèduken kuria asa maju.

¹³Kumarna naidi ipidoken simengerana ibas kata sidèban i mo taba Dèbata, asa iberrèken bana perbinettohen lako petterangken niruapkenna idi.

¹⁴Ai mula mersodip aku ibas kata sidèban, pellin tendingku ngo kessa mersodip, tapi ukum pennarihenku oda.

¹⁵Jadi bakunè mo? Bagèen mo kubakin: Mersodip ngo aku ibas tendingku janah mersodip ma ngo aku ibas pennarihenku. Merendè ngo aku ibas tendingku janah merendè ma ngo aku ibas dagingku.

¹⁶Ai mula idokken kènè mellias atè taba Dèbata ibagasen tendi sambing, keppè lot sidèban siso mengantusi kata sidèban nidokkenmu idi, bakunè mo ia mendokken, “Amèn lapatenna imo tuhu”, mi sodip ndènè i kumarna oda iarti kadè nidokken ndènè i.

¹⁷Mula pè sodip melias atè ndènè i mi Tuhan selloh kalohoon, keppèken oda lot lapatenna sodipmu i bai kalak sidèban.

¹⁸Melias atè mo kudokken bai Dèbata, kerna pandèen aku mengerrana ibas kata sidèban asa kènè karina.

¹⁹Tapi tukasi pè bagidi, lotiin ngo kuruapken lima ngkebabah kata siniantusen jelma ibas pulungen mersembah taba Dèbata ulang pada serribu ngkebabah ibas kata sidèban siso iantusi jelma, asa merkitè bagidi kupeddahi jelma nterrem.

²⁰Kènè alè dengan! Ulang mo kènè bagè perrukur anak-anak. Tapi ukum ibas kejahaten, bagè anak-anak mo kènè, janah bagè simbelgah mo kènè merrukur.

²¹Ai tersurat ngo ibas Bibèl bagèen, “Mengerrana ngo aku mi bangsa èn ibas kata sidèban, janah merkitè kalak sidèban mengerrana aku taba ummatKu; tukasi pè bagidi laju oda idengkohken ranangKu.”

²²Asa ukum sibasa-basa terrèngèt kata sidèban, mahan tanda kellengangen ngo i taba kalak siso percaya. Nai ukum sibasa-basa bai perralamat lako memmagahken hendak Dèbata mi jelma, imo pertanda kalak percaya, oda taba siso percaya.

²³Kernana i mula tupung merpulung kuria i janah karinana sipulung i mengerrana ibas kata sidèban, keppè roh ma mo mi sidi kalak siso Kristen, tentu dokkenenna mo kènè gila karina!

²⁴Tapi ukum karinana kènè mennukutken berrita bai Dèbata nai, janah roh mi pulungen kalak siso Kristen barang kalak sidèban pè, kumarna iantusi nidokken ndènè i, gabè peddah mo idi bana janah gabè itandai dosana.

²⁵Gabè ntarar mo simboni silot i ukurna, nai gabè ipecerrep mo ukurna roh mersembah mi Dèbata, janah tuhu-tuhu mo ia percaya i tengah-tengah ndènè ngo enggo Dèbata.

²⁶Jadi kadè ngo lapaten ni karina idi alè dengan? Mula merpulung kènè lako mersembah taba Tuhan: lot simerendè, lot merjamita, lot mengajari, lot memmagahken barang kadè bai Dèbata nai, lot mengerrana ibas kata sidèban, janah lot ma petterangken kata sidèban idi. Tapi karinana idi kennah lako mengajari dekket pessellohken kuria idi no.

²⁷Mula lot mengerrana ibas kata sidèban, bias mo mengerrana dua barang tellu kalak peganci-ganci, janah kennah lot mo kalak petterangken kata sinidokken simengerana i.

²⁸Tapi mula oda ngo lot petterangken, sip mo simengerrana ibas kata sidèban i. Pellin ibagasen ukurna sambing mo ia mengerrana taba Dèbata.

²⁹Nai barang dua tellu kalak ma mo merjamita, sidèbankenna iradum-radumi mo jamita idi.

³⁰Tapi mula roh berita bai Dèbata nai taba sada kalak sipulung i, kennah sip mo lebbè simerjamita i.

³¹Merkitè bagidi enggo karina kènè peganci merjamita, asa karina terrolih peddah janah makin mi percayana.

³²Ai ndorok ngo iantak perjamita idi jamitana, siroh bai Tendi Dèbata nai.

³³Oda ikellemmoken Dèbata siso merratur, kennah damè ngo. Ibas karinana Kuria,

³⁴kennah nono ngo daberru tupung merpulung kènè. Oda selloh mula mendokken rana kalak idi; oda ndorok gabè huntuun ia, ai tersurat ngo ibas Bibèl:

³⁵Mula tah lot naing ikuso kalak idi, sinibalèna mo ikuso ibages, ai subang ngo mula mendokken rana daberru i kuria.

³⁶Ai bai ndènè nai ngo rohna kata Dèbata, barang tah kessakatenna ngo kènè?

³⁷Tah bakunè lot mendokken i tengah-tengah ndènè nai, lot nina ijalo sibasa-basa mennukutken berrita bai Dèbata nai barang sibasa-basa bai Tendi Dèbata nai, memettoh mo ia: Perèntah Tuhan i ngo sikusurat ènda.

³⁸Tapi mula lot oda terjalosa ènda, ulang parduliken kènè ia.

³⁹Kerna nai alè dengan, keperluken kènè mo menjamitaken kata Dèbata, tapi ulang gerra kènè kalak simengerrana ibas kata sidèban.

⁴⁰Tapi karinana i kennah merratur ngo dekket rèntem.