Read Batak Dairi 1 Korintus 15 Bible Online

1 Korintus 15 - Batak Dairi bible

1 Korintus 15

¹Bagèndari alè dengan ipergeddo ukurku, asa èngèt kènè karina Sukuten Kelluahen bai Dèbata nai sikusukutken bai ndènè tikala i, sienggo ijalo kènè janah danganen kepercayaen ndènè.

²Mula lot kènè menjèmak Sukuten Kelluahen sikusukutken idi, maluah mo kènè; laèn mo mula pè percaya kènè, iulaken kènè oda pella merpikir.

³Karina sikupessoh bai ndènè i, sikujalo ma ngo i, bagè sitersurat ibas Bibèl: sikupessakat idi imo sienggo matè ngo Kristus kumarna dosanta;

⁴sienggo Ikubur ngo ia, nai balik nggelluh nola i ari petelluken, rembang bagè sitersurat i.

⁵Enggo ma ngo kubagahken bai ndènè: ipacidah Kristus sienggo balik nggelluh i ngo diriNa taba si Petrus, nai taba sisipuluh dua sisiin i.

⁶Nai ipacidah nola mo dirina taba lebbih lima ratus kalak, nggelluh dèng ngo buèen kalak idi bagèndari, dèba ngo enggo matè.

⁷Nai ipacidah nola mo dirina taba si Jakobus, nai taba karina sisiin i.

⁸Tapi ipodi karinana idi, ipacidahken ma dirina taba aku, siterdokken bagè anak mabara tubuh siso tikkina!

⁹Ai aku mo rasul Tuhan sikètèkna, oda ngo nemmu aku patut idokken rasul, ai enggo sanga kuletlet kuria Dèbata.

¹⁰Tapi kemulihken masèh atè Dèbata ngo ndorok aku bagè sibagèndari; oda magosia pengampuni Dèbata bangku i, ai buèen ngo sikuulaken ulang pada iulaken karina rasul-rasul. Tapi oda ngo usahangku tupèh, karinana idi usaha Dèbata simermasèh atè bangku idi ngo, mengula rebbak dekket aku!

¹¹Asa, barang bai isè nai ijalo kènè Sukuten Kelluahen i — tah bangku nai barang pè bai sidèbankenna idi nai — dos ngo i; siperluna imo sikubagahken kami idi imo Sukuten Kelluahen bai Dèbata nai, sinikepercayaen ndènè i.

¹²Sienggo kubagahken kami bai ndènè, imo enggo ipegelluh Kristus i, i kemmatèen nai. Kasa lot nola i tengah-tengah ndènè nai mendokken, oda ipegelluh ukum kalak sienggo matè mengolihi?

¹³Ukum tuhu ngo oda ipegelluh sienggo matè i mengolihi, merlapaten ngo i Kristus i pè oda balik nggelluh i kemmatèen nai,

¹⁴oda lot gunana kami merjamita janah oda lot gunana kènè percaya, ai oda lot danganen kepercayaen ndènè.

¹⁵Oda pellin idi tupèh. Kami pè terbukti mo perluap terrèngèt Dèbata, kerna kusukutken kami ngo Dèbata pegelluhken Kristus i simatè nai, keppèken oda, mula tuhu oda ipegelluh mengolihi sienggo matè i!

¹⁶Kerna mula oda ipegelluh mengolihi kalak sienggo matè i, Kristus pè oda ipegelluh mengolihi i kemmatèen nai.

¹⁷Asa ukum oda ngo tuhu ipegelluh Kristus, magosia ngo kepercayaen ndènè i; janah mago mo kènè ibagasen dosa ndènè.

¹⁸Janah mago ma ngo bang kalak sienggo matè ibagasen Kristus i.

¹⁹Ukum pellin nggelluh i tanoh èn ngo kessa kita mengharap bai Kristus i, kita mo jelma simpersukna!

²⁰Tapi enggo mo ipegelluh Kristus me- ngolihi i kemmatèen nai, janah imo mahan jaminenna, magahken balik nggelluh ngo kalak sienggo matè i.

²¹Ai bagè kemmatèen i, merkitè sada kalak ngo sempa mi dunia èn, bagi ma ngo balik nggelluh ibas simatè nai merkitè sada kalak ngo.

²²Karina jelma matè kumarna ibagasen si Adam ngo; bagi ma ngo karina jelma ipegelluh ibagasen Kristus.

²³Tapi gennep jelma ipegelluh merkitè gèrèrenna ngo: perlebbè Kristus, nai ipekiroh Kristus i mi dunia èn nola, gèrèren ni sienggo milik Kristus mo.

²⁴Enggo kessa i, kiamat mo. Sinderrang bagidi ipetunduk Kristus mo kerajaen, kuasa dekket nasa kegegohen; nai ipesakat mo kuasaNa sibagè Raja taba Dèbata Bapa.

²⁵Mengerajai mo Kristus soh mi ipetunduk Dèbata karinana musuhna mi terruh nèhèna.

²⁶Ukum musuhna perpodi sipetundukenna, imo kemmatèen i.

²⁷Ai tersurat ngo ibas Bibèl bagèen, “Karinana ngo ipetunduk Dèbata mi terruh nèhèNa.” Merkitè idi ntangkas mo bettohen maksudna “karinana i”, oda termasuk Dèbata simemmaing karinana situnduk mi Kristus.

²⁸Tapi enggo kessa tunduk karinana idi mi terruh pemerèntahen Kristus, nai Ia sendiri sebagè Anak Dèbata, petundukken diriNa mi Dèbata sienggo memmaingken tunduk baNa. Jadi Dèbata mo memerèntah karinana.

²⁹Mula oda ngo mengolihi ipegelluh kalak sienggo matè i, kasa pella jelma i iperridi bai kalak simatè? Man kadè pella kalak i mengulaken i? Mula oda ngo ipegelluh kalak sienggo matè, kadè gunana iperridi kalak silako matè?

³⁰Janah man kadè nami mo kugongken kami mara gennep tèk?

³¹Kènè alè dengan! Gennep ari ngo kutahanken simpersuk kumarnaken lolongku, ai enggo percaya kènè mi Kristus Jesus Tuhanta i.

³²Ukum kumarnaken cara kemmanusiaan sambing ngo, pella mo juhap aku mi binatang penjerngem i kuta Epesus, kadè gunana idi bangku? Ukum oda ngo ipegelluh nola kalak sienggo matè i, lotiin mo bagè pendokken umpama, “Mersennang-sennang mo kita, mangan mènum, kerna baremben matè ngo kita.”

³³Ulang kènè laling! Mula idengani kènè perjahat, gabè jahat ngo pengelako ndènè simendè kin pè.

³⁴Satdar mo kènè bagèndari, janah ulang nèngè ulaken kènè dosa. Kemmemèla mbellen ngo idi, ai lot dèng ngo iantara kènè oda tuhu-tuhu menandai Dèbata.

³⁵Tah bakunè lot mengkuso, “Bakunè ndia ipegelluh nola balik kalak sienggo matè i? Bakunè mo ndia perdagingen enggo kessa ipegelluh nola mengolihi?”

³⁶Moto ngo ukum bagidi! Mula isuan bennih mi tanoh, oda ngo uè tubuh bennih i, kum oda lebbè matè!

³⁷Asa mula tikan mardang kono — otang oda ngo batang sinaing tubuh i iardangken kono — tah pè i bennih gandum barang bennih sidèbankenna i.

³⁸Ai Dèbata sendiri merrèken mi bennih i tempaNa merguru mi lemmo atèna; janah pellaèn-laèn ngo ibakin Dèbata mi gennep suan-suanen idi.

³⁹Oda ngo dos matcamna karina daging simerkessah, laèn ngo daging jelma, laèn ma ngo pinakan, laèn ma ngo daging manuk-manuk, laèn ma ngo mi ikan.

⁴⁰Bagidi ma ngo dekket silot i langit bak i dunia èn. Si lot i langit mersiembah rupana janah ni dunia èn pè mersiembah matcamna.

⁴¹Laèn ngo sendang mataniari, laèn ngo sendang bulan, laèn ma ngo sendang bintang, mersiembah kinimendè cuhayana gennep.

⁴²Codi bagi ma ngo seggen bang kalak sienggo matè i, sinaing nggelluh nola. Ukum badan idi i mo badan siso uè ncèda.

⁴³Ukum badan sinitanem idi, badan merroha janah ndotè ngo idi, tapi enggo kessa ipegelluh nola ia gabè badan merandal janah mergegoh kalohoon idi.

⁴⁴Sinderrang itanem badan idi, imo badan tanoh èn; tapi enggo kessa balik nggelluh, badan i mo niberrèken Tendi Dèbata. Ai mula lot badan tanoh èn; lot ma ngo badan bai Dèbata nai.

⁴⁵Rembang bagè sitersurat ibas Bibèl, “Gabè kessah nggelluh ngo jelma perlebbè idi imo si Adam,” tapi Tendi pegelluhken ngo ukum Adam perpodi i.

⁴⁶Ukum siroh perlebbè imo daging rembaga i, nai pè asa badan pertendiin i.

⁴⁷I tanoh nai ngo ijadiken ukum Adam perlebbè i, tapi i sorga nai ngo Adam peduaken i.

⁴⁸Ukum jelma ni dunia èn, tosè bagè Adam perlebbè idi ngo, ihanaken ibas tanoh nai, tapi ukum jelma ni sorga, tosè bagè ia siroh i sorga i nai ngo.

⁴⁹Bagè kita sibagèndari, tosè bagidi ngo Adam sinitempa ibas tanoh nai, bagi ma mo kita seggen tosè mi sini sorga idi nai.

⁵⁰Èn ngo sikudokken alè dengan, oda terbakin badan sinihanaken ibas badan bak daroh nai, gabè ginemgem i Kerajaen Dèbata, janah badan siuè matè i oda ndorok menettap idi.

⁵¹Peratè-atèken kènè mo rusia èn: Oda karina kita matè, tapi karina ngo kita mobah.

⁵²Sintempu ngo masa i, ibagasen singkerjep mata; tikan mersora sarunè siperpodi kalohoon i mèter balik nggelluh mo kalak sienggo matè i gabè merdaging rimbaru janah menettap, janah karinana ngo kita mobah bakinenna.

⁵³Asa ukum badanta siuè matè èn, kennah igancih dekket badan siso uè matè janah badanta simermula i tanoh èn nai kennah igancih dekket badan ni sorga i nai.

⁵⁴Ai mula badan siuè matè i enggo igancih dekket badan siso uè matè i, janah mula badan si ni tanoh èn enggo igancih dekket badan i sorga i nai, tikan bagidi mo saut nidokken surat Bibèl i, “Enggo talu kemmatèen, enggo dapet kemennangen!”

⁵⁵“Alè kemmatèen, idikè kemennangenmi? Alè kemmatèen idikè serrenmi?”

⁵⁶Dosa ngo serren kemmatèen, janah pati-patiin i ngo perkitèen dosa.

⁵⁷Tapi melias atè mo bai Dèbata, ai enggo iberrèken banta kemennangen i merkitè-kitè Jesus Kristus Tuhanta i.

⁵⁸Èn pè alè dengan sinikekellengen, kennah hot mo kènè janah ulang mobah-obah. Makin ngkasah mo kènè mengulaken ulaan Tuhan i, ai ibettoh kènè ngo; oda magosia kelejaan ndènè ibagasen Tuhan i.