Read Batak Dairi 1 Korintus 2 Bible Online

1 Korintus 2 - Batak Dairi bible

1 Korintus 2

¹Bagi ma ngo tikanna roh aku mendahi kènè alè dengan, oda ngo merkitè kata-kata mendè dengkohen aku lako mennukutken kata Dèbata. Oda ngo kupakkè perbinettohen dunia èn.

²Ai enggo kin ngo kutekadken sidekkah i tengah-tengah ndènè aku; oda kuruapken barang kadè laènken terrèngèt Jesus Kristus, Ia sienggo matè ipersilangken.

³Tikan i tengah-tengah ndènè aku ndotè janah buradan ninganna menggirgir.

⁴Bak sukuten si kusukutken pè bai ndènè oda ngo kuranaken i merkitè-kitè rana kepantasen jelma. Tapi kuranaken idi merkitè pos atè ibas kuasa Tendi Dèbata ngo.

⁵Kubakin bagidi asa merdangaan bai kegegohen Dèbata kepercayaen ndènè, ulang gabè merdangaan mi kepandèen jelma.

⁶Tukasi pè bagidi ukum mendahi kalak sienggo tang pertendinna, kubagahken ngo terrèngèt kebijaken. Tapi oda ngo bagè kebijaken dunia èn barang kebijaken pemimpin ni tanoh èn silako salpun i.

⁷Tapi kebijaken sikuranaken idi imo siroh bai Dèbata nai siso nibettoh dunia èn kin dèng, sienggo ihantari Dèbata banta, sinderrang madèng kin pè hana dunia èn, mahan kesennangenta.

⁸Isè poda lot pemimpin ni tanoh ènda memmettoh kebijaken i. Ai ukum enggo kin ngo ibettoh, tentu oda ipersilangken kalak idi Tuhan simermulia idi.

⁹Bagè sitersurat ibas Bibèl, “Siso nung idah, barang idengkoh jelma, siso nung turah ibas sura-sura jelma, idi ngo ihantari Dèbata bai kalak simengkekelengiSa.”

¹⁰Tapi karinana enggo mo ipetarar Dèbata banta merkitè-kitè TendiNa. Ai karinana ngo iasak Tendi i soh mi pucuk jambu hendak ni Dèbata.

¹¹Isè bettoh-bettohen perrukuren jelma, mula mak tendina sendiri? Bagidi ma ngo terrèngèt Dèbata, oda lot memettoh perrukurenna, laènken ni Tendi Dèbata sendiri!

¹²Oda ngo tendi dunia èn sijalo, tapi Tendi bai Dèbata nai ngo, asa sibettoh karina mendè basa Dèbata sienggo iberrèken banta.

¹³Kerna naidi, mula kuranaken kami ter- rèngèt Dèbata, oda kuranaken kami me- ngèkutken kepantasen jelma, tapi mengè- kutken sinipeddahken Tendi Dèbata ngo, kuranaken kami terrèngèt Dèbata taba ka- lak sienggo iiani Tendi Dèbata.

¹⁴Barang isè kalak siso niianen Tendi Dèbata, oda terjalosa terrèngèt nibagahken Tendi i. Kerna ukum bai kalak sibagidi, kemmotoon ngo iètong terrèngèt misi. Ai oda ndorok iarusi kalak idi i kerna pellin merkitè pertendiin ngo i ndorok terantusen.

¹⁵Kalak sienggo iiani Tendi Dèbata, iarti ngo karinana i, tapi kedirinna sendiri oda terradumen barang isè pè.

¹⁶Ai tersurat ngo ibas Bibèl: “Isè kalak memettoh pikiren Tuhan i? Isè ndorok mengajariSa?” Tapi ukum kita, perrukuren Kristus idi ngo enggo lot banta!