Read Batak Dairi 1 Korintus 4 Bible Online

1 Korintus 4 - Batak Dairi bible

1 Korintus 4

¹Ètong kènè mo karina naposo Kristus, janah pengendeng lako memmagahken hendak Dèbata, simakdèng ibettoh dunia èn.

²Perlebbè kaloon bai naposo nai ipengido imo kennah kettoken ia mi indukna.

³Ukum bangku oda pella soal mula pè tah barang kadè aku dok ndènè, barang tah dok isè pè. Ai aku sendiri pè oda ngo kuhukum diringku.

⁴Ai oda lot salahku barang kadè pè dok atèngku, tapi oda ngo gabè ketentuun i mendokken oda lot kessalahenku. Tuhan i ngo menentuken mersalah aku barang oda.

⁵Kumarana idi, ulang mènter ndorsu idokken kènè salah barang isè pè, ukum makdèng dapet tikkina, pèma roh Tuhan idi. Ia ngo petararken nasa simboni ibas sigellap. Ia ma ngo pedapetken nasa niat bak sura-sura silot ibagasen atè jelma. Isidi mo luas nasa jelma menjalo bai Tuhan nai pemojiin mi sipatut menjalosa.

⁶Alè dengan, kumara kènè, kuaitken ngo kata ndai taba si Apolos dekket bangku pè. Asa merkitè-kitè sikudokken idi terrèngèt diri nami, gabè peddah bai ndènè mendok, “Asa ulang nilampoi sitersurat i.” Merkitè bagidi ulang mo lot bai ndènè memmoji sisada, keppè irèhè sisada nai.

⁷Mula pè sellohen kono asa sidèban, isè ngo memmaing idi? Kadè silot bamu idi siso bai Dèbata nai ijalo kono? Kasa gabè gegah kono, mula karina silot bamu idi siniberrèken ngo i?

⁸Tuhu ukum bagèndari, oda nèngè pella lot siperlu bamu, ai enggo kaya kènè. Enggo gabè raja kènè, oda pella merkitè-kitè kami. Sondel mo merandalna ukum tuhu-tuhu kènè enggo gabè raja, asa rebbakken memerèntah kita.

⁹Karna ukum dok atèngku, enggo ipebangkit Dèbata kami gabè rasul, janah gabè tontonen i hadeppen jelma bak malaèkat pè. Enggo gabè kalak merlèa kami sinihukum matè i hadeppen sinterrem janah isurak-suraki dunia èn.

¹⁰Kumarnaken Kristus, gabè simoto ngo kami, tapi ukum kènè mergegoh ngo! Ukum kami merlèa ngo! Tapi ukum kènè mersangap ngo!

¹¹Soh mi bagèndari rapar ngo kami janah muasen. Oles nami pellin silekket i daging ngo kessa; dak iletlet dèba ngo kami, oda lot hot bekkas nami.

¹²Ledja ngo kami mahan bahaan asa lot pangaan nami. Mula isumpahi dèba kami, kubales kami ngo i dekket pasu-pasu; mula isiksa kami, dak mertahan gong ngo kami ibagasen sobar;

¹³mula iperroha-roha dèba kami, kualoi kami ngo i dekket rana selloh. Kira dosken empak-empak dunia èn ngo kami, soh bagèndari iètong ngo kami dosken kotoren tanoh èn.

¹⁴Oda ngo gabè asa termèla kènè, memmaingken kusuratken ènda taba kènè, tapi lako memmeddahi kènè ngo codi bagè dukak-dukakku sendiri.

¹⁵Mula pè lot guru ndènè sipuluh ribu kalak, sibagè kalak Kristen kènè, oda piga idi bagè bapa. Aku ngo kessa gabè bapa bai ndènè kumarna aku ngo merembah sukuten kelluahen terrèngèt Kristus bai ndènè.

¹⁶Kerna nai, kupengido bai ndènè: Aku mo codi kènè!

¹⁷Kerna naidi ngo asa kupasulak si Timoteus mendahi kènè. Dosken anak lemmo-lemmongku ngo ia kuètong janah kepposen ibagasen Tuhan i. Ia mo pesèngèt-sèngètken kènè terrèngèt bakunè dalan pernggelluhku, enggo kessa gabè percaya aku taba Kristus, rembang mi cara nggelluh sikuajarken i gennep kuria barang i dikè pè.

¹⁸Barang piga kalak bai ndènè nai gabè dirina ipebelgah, ai dok atèna oda roh nè- ngè aku mendahi kènè.

¹⁹Tapi mula ipaduè Tuhan i, ndor nèngè mo aku roh mendahi kènè; janah tikan roh i pè aku sikali èn asa kuidah barang bakunè pemmaing sipebelgah-belgahken dirina idi, ulang pellin katana sambing.

²⁰Ai oda ngo pellin kata ukum Kerajaen Dèbata, tapi kegegohen ibas nggelluh jelma idi ngo.

²¹Asa pilih kènè mo apaina lotiin katè ndènè roh aku mengajari kènè merkitè ajar ngkellek ulang pada mengajar merkitè-kitè lamlam dekket kelleng.