Read Batak Dairi 1 Korintus 5 Bible Online

1 Korintus 5 - Batak Dairi bible

1 Korintus 5

¹Soh ngo bangku berritana, lot bai ndènè nai mengulaken merlangkah julu meddem, lebbihen bagè perulaan siso menandai Tuhan, ai lot ngo bai ndènè nai merlangkah pilit dekket inangna menggancih.

²Tukasi pè bagidi tong ngo dak ipedates kènè ukur ndènè. Otang merpenderrep mo nemmuken pikiren ndènè janah puaren ndènè kalak simengulaken bagidi!

³Ai tukasi pè ndaoh dagingku bai ndènè nai tapi ukum ibagasen batin, i tengah-tengah ndènè ngo aku. Jadi, dosken i tengah-tengah ndènè ngo aku lako menghukum sibagidi.

⁴Ibagasen gerar Tuhan Jesus Kristus kudokken taba kènè, kennah ihukum ngo kalak sibagidi. Mula mertumpu kènè janah i tengah-tengah ndènè aku ibagasen tendi, merdengan keggegohen Tuhanta Jesus,

⁵kennah pesakaten ndènè kalak sibagidi bai Sibolis, asa iago dagingna, asa merkitè bagidi maluah tendina ipekiroh Tuhanta mengolihi.

⁶Oda mendè kegegahen ndènè i! Tah bakunè enggo ibettoh kènè codiin èn, “Cituk pè ragi, kambang ngo ibakin nditak sienggo igaru.”

⁷Patakken kènè mo lebbè ragi sienggo ndekkah i, imo dosa, asa gabè nditak sirimbaru nigaru kènè mpanting ibas ragi dosa sienggo ndekkah idi nai. Ai enggo ipèlèken Kristus, tosè bagè biri-biri Paskah mengkepkep kita.

⁸Kerna nai merpèsta mo kita ulang merkitè roti meragi, oda ma dekket ragi sienggo lama janah jahat, tapi dekket roti siso meragi mo, imo roti memellin dekket kebennaren nikellemmoken Dèbata.

⁹Ibas suratku tikala idi enggo kudokken bai ndènè, asa ulang mersaor kènè dekket kalak luhlah.

¹⁰Sikudokken idi oda ngo kalak luhlah, nahaka barang pennipu barang simenembah bègu siso menandai Dèbata dèng. Oda ngo kalak ènda maksudku; ukum ipedaoh kènè ngo i bai kalak idi nai, kennah karuar ngo kènè i dunia èn nai.

¹¹Tapi èn ngo tujunku ibas suratku idi: Oda ndorok mersaor kènè dekket kalak simendokken Kristen ia, keppè perlangkah julu meddem ngo ia, barang nahaka, barang menembah bègu, barang peroha-rohaken kalak, barang permabuk, barang pennangko pè. Salangken rebbak kundul kènè dekket jelma sibagidi pè oda ndorok!

¹²Ukum menghukum kalak siso Kristen, oda lot kuasangku. Dèbata ngo menghukum kalak idi.

¹³Tapi ukum anggota-anggota Kuria, otang kennah kènè sendiri ngo menghukum kalak idi? Ibas Bibèl tersurat ngo, “Liplip mo perjahat idi, i tengah-tengah ndènè nai.”