Read Batak Dairi 1 Korintus 6 Bible Online

1 Korintus 6 - Batak Dairi bible

1 Korintus 6

¹Kasa lot iantara kènè nai laus mendahi hakim siso percaya bai Tuhan, mengaduken denganna samah Kristen, mula lot kessa perselisihenna? Kasa oda mengido hukum taba ummat Dèbata asa ipellias perkarana idi?

²Oda ngo ibettoh kènè, ihukum Dèbata ngo seggen dunia èn? Jadi, mula naing ngo kènè menghukumi dunia èn, kasa oda terpeselloh kènè perselisihen sikètèk idi?

³Oda ibettoh kènè, kita ngo seggen menghukumi malaèkat-malaèkat? Nai makinsa nola mo terrèngèt keperluun sigennep ari!

⁴Keppè mula tubuh ngo bai ndènè perselisihen terrèngèt keperluun sigennep ari, kasa mènter iaduken kènè mendahi kalak siso lot masuk ètongen i Kuria?

⁵Sadikè mèla mo bagidi! Bakunè pè tentu lot ngo i tengah-tengah ndènè kalak bijak lako pesellohken perselisihen samahsa dengan Kristen.

⁶Keppèken gabè perkara nola kènè samah-samah Kristen i hadeppen penimbangi kalak siso Kristen.

⁷Ulang lebbè perkara kènè laus mendahi kalak siso Kristen, salangken merselisih sambing pè kènè samah kènè, enggo mo sada kettaluun idi bai ndènè. Lotiin dèng ngo ipessel kènè pusuh ndènè kumara kurang adil barang pè irogiken kènè!

⁸Keppèken kènè nola ngo memmakin siso hukum janah oda adil taba kalak sidèban. Kènè nola ma ngo memmaing rogi kalak. Janah taba dengan nola ngo ibaing kènè bagidi.

⁹Oda ngo ibettoh kènè; mula barang isè oda me- nguèi nipergeddo Dèbata, oda ngo terolih ia i gemgemmen Dèbata? Tapi bettoh kènè mo: Ukum kalak luhlah, kalak simenembah bègu, kalak perlangkah julu meddem, kalak merdaberruken daholi,

¹⁰kalak pennangko, pengkilang, kalak permabuk, kalak peroha-rohaken sidèban dekket pendobo; oda ndorok kalak i gabè ummat Dèbata.

¹¹Bagidi ngo dèba kènè merpengelako tikala idi. Tapi ukum bagèndari, enggo iuras kènè ibas dosa nai. Enggo mendè persaoren ndènè dekket Dèbata janah maluah ibas dosa ndènè nai, kemmulihken enggo percaya kènè mi Tuhan Jesus Kristus dekket kumarna kuasa kegegohen Tendi bai Dèbatanta nai.

¹²Lot ngo mendokken karinana ndorok iulaken. Tapi ukum bangku oda karinana idi kasèa. Asa mula pè ndorok kuulaken barang kadè sambing, tapi oda uè aku iperhamba barang kadè pè idi.

¹³Lot ngo dèba mendokken, ukum pangaan idi lako mi beltek ngo, janah lot pè beltek idi, mahan bekkas pa- ngaan i ngo nina. Tapi duana idi, rebbakken ipettadi Dèbata ngo. Daging jelma idi, ulang mo ibakin mi ulaan luhlah, tapi pellin mi ulaan siperlu bai Tuhan i mo. Janah Tuhan ngo menghanaken siperlu mi daging.

¹⁴Enggo ipegelluh Dèbata Tuhan Jesus ibas kemmatèen nai, bagi ma ngo bang kènè pè ipegelluh merkitè-kitè kuasaNa.

¹⁵Otang ibettoh kènè ngo ukum badan ndènè idi, imo sendihi Kristus. Nai bakunè mo pemmaingku sendihi daging Kristus idi gabè sendihi sada kalak perkendangen? Ngganè ngo bagidi!

¹⁶Barang oda dèng ngo ibettoh kènè, barang isè kalak mercampur dekket jelma sibabi jalang, sienggo gabè sada badan ngo kalak idi duana? Kerna tersurat ngo ibas Bibèl, “Gabè sada badan ngo kalak i sidua.”

¹⁷Tapi kalak sipedemmuken dirina dekket Tuhan i, gabè sada Tendi mo Tuhan i dekket tendina.

¹⁸Peddaoh kènè mo diri ndènè ibas ulaan luhlah idi nai. Kerna karina dosa sidèbanna sinibaing jelma, i ruar badanna ngo idi. Tapi barang isè kalak mengulaken luhlah, i ngo memmakin dosa mi dirina sendiri.

¹⁹Bettoh kènè mo, ukum badan ndènè idi imo bekkas Tendi Dèbata sienggo nijalo ndènè bai Dèbata nai. Asa oda ngo kènè sidasa badan ndènè i, Dèbata ngo sidasa i.

²⁰Ai maharga kalohoon ngo kènè itebbus Dèbata, kerna nai pessangap kènè mo Dèbata merkitè-kitè badan ndènè i!