Read Batak Dairi 1 Korintus 7 Bible Online

1 Korintus 7 - Batak Dairi bible

1 Korintus 7

¹Bagèndari kualoi mo terrèngèt nisuratken ndènè taba aku. Selloh ngo sada anak laki ulang jejap barang merunjuk.

²Tapi lako pessidingken luhlah idi lotiin mo gennep anak laki merperrukat janah gennep daberru idi pè lot sinibalèna.

³Iulaken sinibalè mo sipatut taba sinibagesna, janah bagi ma mo iulaken sinibages sipatutna taba sinibalèna; gennep mo kalak i mengulaken patutna bai samah kalak i.

⁴Oda ngo guru bai daberru idi dirina, tapi guru bai sinibalèna ngo. Suang bagidi ma ngo anak laki idi, oda merguru bana dirina, tapi guru bai sinibagesna ngo.

⁵Ulang mo kènè pedaoh-daoh, ukum mak arap ijin ndènè duana, ipè ulang ndekkahsu, asa lot tikki ndènè lako mersodip. Nai rebbak nola mo kènè, asa ulang iunjuni sibolis kènè, kumarna oda tertahan kènè cubellek daging ndènè.

⁶Kudokken pè bagidi oda ngo gabè perèntah, tapi sada sipessèngèt ngo.

⁷Ukum dok atèngku naing mo nemmuken karina kalak bagè aku èn, tapi tupèh, gennep ngo enggo menjalo rembang mi siterjalosa bai Dèbata nai. Sada kalak menjalo bagèen, sisada nai menjalo bagè adoi.

⁸Bagèen ngo sipessèngètku taba kalak simadèng jejap dekket taba sienggo mbalu: Lotiin mo kènè mertahan bagè aku èn.

⁹Tapi mula oda tertahansa napsuna, jejap mo kènè. Ai sellohen ngo jejap ulang pada luhlah.

¹⁰Nai kalak sienggo jejap idi, Tuhan i ngo mendokken, oda pellin aku. Oda ndorok itadingken daberru idi, sinibalèna.

¹¹Tapi mula sanga enggo sirang, ulang nèngè pella ia sijahè barang mulak nola mendahi sinibalèna kin. Bagidi ma ngo anak laki, oda ndorok mennirangken sinibagesna.

¹²Ukum mendahi sidèbanna i sipesèngètku sendiri, oda bai Tuhan i nai, bagèen ngo: Mula sada anak laki Kristen kabin mi sada daberru siso percaya bai Kristus, nai daberru idi uè ngo rebbak nggelluh dekketsa, oda ndorok anak laki idi menirangken sinibagesna idi.

¹³Bagi ma ngo: sada daberru Kristen sijahè mi sada anak laki siso percaya bai Kristus, keppè uè ngo anak laki i rebbak nggelluh dekketsa, jadi oda ndorok daberru idi menirangken sinibalèna.

¹⁴Ai gabè selloh ngo ijalo Dèbata anak laki siso percaya i kemulihken kabin ia dekket daberru sienggo ummat Dèbata. Ukum oda bagidi, tentu oda ipasu-pasu dukak-dukak kalak idi, keppèken dukak-dukak Dèbata ngo dukakna i.

¹⁵Tapi mula siso percaya i menadingken sinibagesna barang pè sinibalèna sienggo Kristen, naing sirang katèna, belli mo bagi! Kerna iberrè Dèbata ngo kita meneddo sinibagesna bang pè meneddo sinibalèna, asa ibagasen damè.

¹⁶Asa kono pertua ibages sienggo percaya mi Tuhan, bakunè mo pemettohmu pasti, oda terpaluah ko sinibalèmu? Bagidi ngo bang kono pè pertua ibalè sienggo Kristen, bakunè mo pemettohmu pasti oda terpaluah kono sinibagesmu?

¹⁷Enteng, karinana mo kènè merperangè bagè sienggo ihatorken Tuhan i bai ndènè gennep sinderrang idilo Dèbata kènè lako percaya baNa. Idi mo hatoren kuajarken mi gennep Kuria.

¹⁸Umpamana: sada kalak enggo kin mertakkil sinderrang percaya ia mi Dèbata, ulang mo iobah nola tanda pertakkilen idi. Bagi ma sada kalak mula makdèng mertakkil nderrang roh ia percaya mi Dèbata, ulang mo pella nèngè ia mertakkil.

¹⁹Kerna mertakkil pè barang oda mertakkil, oda lot gunana i. Siperluna kaloon imo menguèi pati-patiin Dèbata.

²⁰Bakunè kin ia sinderrang percaya mi Dèbata, tettap mo ia bagidi.

²¹Mula hamba kin kono sinderrang idilo gabè percaya mi Dèbata, ulang mo pella kelsohken idi. Tapi mula lot kesempaten bamu lako maluah i hamba idi nai, pakkè mo kesempaten idi.

²²Ai sada kalak hamba, mula enggo percaya mi Tuhan, kalak ni Dèbata sienggo bèbas ngo ia. Janah sada kalak sienggo bèbas, siterdilo gabè percaya mi Dèbata, naposo Kristus ngo i.

²³Maharga kalohoon ngo kènè itebbus Dèbata, ulang mo uè kènè iperhamba jelma.

²⁴Jadi alè dengan, bakunè kin pè kènè sinderrangna baru-baru percaya mi Dèbata, naing tettap kènè bagidi rebbak Dèbata.

²⁵Nai ukum terrèngèt simakdèng jejap, oda ngo nemmuken lot dèng perèntah bai Tuhan i nai. Tapi tukasi pè bagidi, sibagè sada kalak nimasèh atèen Tuhan i aku, bagèen mo peddahku.

²⁶Mernèngèt kesusahen sinaing masa bagèndari, katèngku sellohen mo pernggelluh kalak i idi bagè sibagèndari.

²⁷Mula sanga enggo merunjuk, ulang bakin dalan mennirangken sinibagesmu idi. Mula makdèng ngo kono merunjuk ulang nèngè pella muat berru.

²⁸Tapi mula merunjuk pè kono, oda ngo dosa idi. Pellin èn, kalak sienggo sijahè idi kennah mengerasaken mermatcam bagè kessusahen; ipergeddo ukurku ngo, asa terpesisi kènè i kesusahen idi nai.

²⁹Èn ngo sikudokken alè dengan! Enggo sengseng tikkina bagèndari. Bagèn mo mulai bagèndari nai; gennep sienggo jejap, ibaingken mo ia tosè bagè oda jejap;

³⁰kalak sitangis; ibaingken mo dirina bagè oda bonek idahen, kalak sitertaba, bagè sioda lolo ia idahen.

³¹Janah kalak simengkasèaken harta-harta dunia ènda, naing mo nidokdok oda perlu bana idi tengngennen. Kerna lako salpun ngo dunia sisiidah bagèndari!

³²Tapi ipergeddo ukurna ulang kekelsohen kènè. Isarihken siso merkejejapen idi mo siperlu bai Tuhan i, asa lemmo atè Tuhan i midahsa.

³³Tapi ukum kalak sienggo merrunjuk, dak itulusi ngo siperlu i tanoh èn, katèna asa lolo atè sinibagesna idi;

³⁴dungna gabè merdua ukur nola mo ia. Sada kalak daberru siso sijahè, barang pè sada simerbaju, siperlu bai Tuhan i mo ipikiri, asa bolet tendina bak dagingna gabè milik Tuhan i. Tapi ukum daberru sienggo sijahè, dak ipikiri ngo siperlu i tanoh èn, kerna naing ngo ia pesennangken ukur sinibalèna.

³⁵Kudokken pè bagidi, asa kasèa ngo kènè; oda ngo lako menggerra asa ulang bèbas, tapi asa gabè metemman ngo pengelako ndènè janah rentem bagè patutna, janah asa hot pikiren ndènè mi Tuhan i.

³⁶Mula sada kalak mengakap oda idalanken sipatut baingenna taba sinitandana, mula oda ndorok tertahansa napsuna, janah iakap perlu kabin dekket daberru i, ndorok mo iulaken kadè dok atèna selloh. Oda ngo merdosa ia mula kabin kalak i.

³⁷Tapi mula sada kalak enggo menettapken ibas ukurna mendokken oda kabin ia dekket rantona i, janah enggo tutus ukurna, selloh ngo nibakinna i mula tahan ia menggongken bagidi.

³⁸Asa, selloh ngo mula kabin jelma idi, tapi sellohen dèng ngo mula oda kabin.

³⁹Sada kalak daberru sienggo sijahè kennah jejap mi sinibalèna ngo ia sidekkah nggelluh sinibalèna i, tapi enggo kessa matè sinibalèna idi, ndorok ngo sijahè nola daberru i dekket lemmo atèna; asal mo ibagasen perjejapen Kristen.

⁴⁰Nemmuken sennangen ngo ia oda nèngè sijahè; ningku ngo i, tapi dok atèngku lot ngo ibagasen aku Tendi Dèbata memeddahi aku.