Read Batak Dairi 1 Korintus 8 Bible Online

1 Korintus 8 - Batak Dairi bible

1 Korintus 8

¹Bagèndari terrèngèt pangaan sienggo ipèlèken mi sembahen, tuhu ngo bagè pendokken dèba, “Karinana kita enggo pandè.” Kepandèen memmaing gabè tunggang, tapi ukum kelleng, imo lako pesellohken.

²Barang isè merdokatè enggo mbuè nibettohna, situhunna oda lot dèng mabges pemettohna.

³Tapi kalak simengkekelengi Dèbata mertuhu-tuhu, ia ngo itandai Dèbata.

⁴Asa ukum terrèngèt sipangaan sienggo ipèlèken mi sembahen, bettoh kènè mo ukum sembahen oda ngo lot. Sibettoh ma ngo pellin sada ngo kessa Dèbata; oda lot laènkenna i.

⁵Tuhu mbuè ngo matcamna idokken dèba: dèbata bak tuhan silot i langit dekket i babo tanoh èn.

⁶Tapi ukum banta, pellin sada ngo Dèbata. Ia ngo Bapa simenghanaken sagumanna silot, gabè lako milikna ngo kita nggelluh; sada ma ngo kessa Tuhan imo Tuhan Jesus Kristus. Merkitè Ia ngo ihanaken sagumanna silot, janah kumarna Ia ngo asa nggelluh kita.

⁷Tapi oda karinana jelma memettoh idi. Kerna jelma siarnia mbuè dèng ngo menembah sembahen. Jadi kerna naidi soh mi bagèndari iakap kalak salah ia mula ipangan pangaan sienggo ipèlèken mi sembahen; ai tuhu ngo katèna lot sembahen i, kerna madèng ntegguh kepercayanna.

⁸Nemmuken oda ngo pangaan i memmaingken muat ncelketna kita bai Dèbata. Ai mula pè sipangan pangaan idi, oda mènter soh mikè kita, janah mula oda pè sipangan pangaan i oda lot kadè roginta isidi.

⁹Tapi mermanat mo! Ulang gabè merdosa kalak kemmulihken bèbas kita mengulaken barang kadè, ai makdèng ntegguh kepercayanna.

¹⁰Umpamana, iidah dèba mo kènè sienggo ntegguh kepercayanna kundul mangan i bages pemèlèen sembahen, otang gabè pang nola mo kalak sikurang ntegguh kepercayanna i kipa- ngan pangaan sienggo icibalken bai sem- bahen?

¹¹Gabè laling mo kalak sikurang ntegguh kepercayanna idi. Keppèken ia pè engket ngo ikepkep ibas permatè Kristus i.

¹²Jadi mula ibakin kono kesalahen sibagidi taba dengan Kristen sidèbanna memmaingken guga kepercayanna sikurang ntegguh idi, merdosa ngo kono taba Kristus.

¹³Kernanai, mula merdosa denganku kumarnaken pangaan, lotiin oda kupangan nèngè pangaan idi soh seggen, ulang kumarnaken i merdosa denganku kemmulihken aku.