Read Batak Dairi 1 Korintus 9 Bible Online

1 Korintus 9 - Batak Dairi bible

1 Korintus 9

¹Otang rasul ngo aku? Otang kalak bèbas ngo aku? Otang enggo nung kuidah Jesus Tuhanta idi? Otang kènè ngo hasil sikuula lako bai Tuhan?

²Mula pè kalak sidèban oda idokken rasul aku nina, tapi ukum kènè, rasul ngo aku bai ndènè. Ai kènè ngo gabè bukti kerna enggo gabè kalak Kristen kènè kumarnaken kerasulenku.

³Mula lot kalak mennoal tersèngèt aku bagèen ngo pengaloingku;

⁴Otang lot ngo kuasangku mangan bak mènum arap ulanku?

⁵Otang lot ngo kuasangku merembah sada partua ibages Kristen mi perdalanen, bagè nibakin anggi ni Tuhan Jesus bak rasul-rasul sidèbanna i bang si Petrus pè?

⁶Barang pellin si Barnabas dekket aku sambing mo kessa kennah mencariken pangaan nami sendiri?

⁷Oda lot soridadu siso mergaji! Oda lot perumauma simennuan anggur i pekkenna siso kipangan buah anggur arap pekkenna i nai. Oda lot permakan siso mengènum susu pinakanna!

⁸Kudokken bagidi oda ngo kumarna kecemmalen simasa bai jelma, tapi ibas Bibèl pè tersurat ngo

⁹imo Bukku si Musa, “Ulang ikontam muncung kerbo tikanna mengerrik pagè kerbo idi.” Otang oda ngo kerbo i isarihken Dèbata?

¹⁰Otang banta ngo kata i? I ngo tuhu, tersurat pè idi lako banta ngo. Kerna simengula i juma dekket simengerrik patut menjalo dèba arap siniulana i nai.

¹¹Enggo mo kusuan kami bennih pertendiin mi bagasen atè-atè ndènè. Jadi mula kuperrani kami bai ndènè nai siperlu mi daging, mberratsu ngo pemmaing nami idi?

¹²Mula kalak sidèban dapetten bai ndènè nai, makinsa nola mo kami? Tapi makdèng nung kuasangken i. Lotiin ngo kugongken kami mencariken keperluun daging èn, asa ulang gabè penghalang pesarken Sukuten Kelluahen terrèngèt Kristus i.

¹³Otang ibettoh kènè ngo mula mengula kalak i Bages Dèbata patut menjalo pangaan ia arap Bages Dèbata nai? Bagidi ma ngo simengulaken ulaan memèlè Dèbata i langgaten, patut terrolih ia ibas nipèlèken idi nai?

¹⁴Jadi bagi ngo iaturken Tuhan i, barang isè memmagahken Sukuten Kelluahen i, kennah merrolih kenggelluhen perdagingen ibas ulanna idi nai.

¹⁵Tapi sada poda nung dèng kupakkè ibas kuasa idi nai. Janah kubakin pè suratku èn, oda ngo asa roh bangku bagidi bagèndari. Lotiin mo aku matè ulang pada iorui kesurungenki.

¹⁶Kerna mula kuulaken ulaan Sukuten Kelluahen bai Dèbata nai, oda gabè gegah aku, ai perèntah ngo i bangku lako mengulaken i. Merjaya ngo aku mula mak kubagahken Sukuten Kelluahen idi!

¹⁷Mula kuulaken ulaan i kerna ibas kedirinku nai, ndorok ngo kuharapken upah i sidi nai. Tapi kubagahken pè Sukuten Kelluahen idi kumarna kewajiben ngo. Dèbata ngo me- ngampèken ulaan kewajiben i asa kuulaken.

¹⁸Asa, kadè ngo upahku? Èn ngo: Ndorok ngo aku memmagahken Sukuten Kelluahen idi, oda pella lot rogi barang isè merrèken belanjangku, kerna oda uè aku menuntut hakku, bagè sada kalak simemagahken Sukuten Kelluahen idi.

¹⁹Tukasi pè oda hamba aku, tapi kubakin ngo diringku gabè hamba bai karinana kalak, asa ndorok muat nterremna kalak kuarahken mendahi Kristus.

²⁰Ai dosken kalak Jahudi ngo aku tupung mendahi kalak Jahudi, asa katerra pè ndorok kuarahken kalak Jahudi taba Kristus. Dosken kalak simenguèi pati-patiin Dèbata arap si Musa ngo aku rebbakken kalak idi, asa katerra pè kuarahken kalak i mendahi Kristus.

²¹Taba kalak siso Jahudi, gabè dosken siso Jahudi ngo aku, siso ibagasen pati-patiin idi, asa kuarahken kalak idi mendahi Kristus, tapi oda ngo mak kuuèi pati-patiin Dèbata; ai nigemgemmen pati-patiin Kristus i ngo aku.

²²Taba kalak siso ntegguh merkepercayaen, gabè bagidi ma ngo aku, asa ndorok kuarahken kalak i mendahi Kristus. Gabè rembang ngo aku mi karinana jelma, asa merkitè-kitè bagidi ndorok kupaluah kalak idi giam dèba.

²³Karinana idi kuulaken kumarna Sukuten Kelluahen bai Dèbata idi nai, asa giamken gabè persulang janah ipasu-pasu aku.

²⁴Tentu ibettoh kènè ngo; mula lot merpatcu, karinana ngo lojang tapi sada kalak sambing ngo kessa menjalo hadiah. Kernanai empet kènè mo lojang, asa terolih hadiah kènè.

²⁵Barang isè dekket mertanding, kennah ierem mo dirina ibas karinana, asa dapetten rudang singgèut salpun i ia. Tapi ukum kita lako mengerem dirinta, asa banta ngo rudang siso nggèut salpun idi.

²⁶Kerna nai lot ngo tujuun sijalangenta i, oda bagè menènju angin perjuapenku.

²⁷Kujerra ngo diringku janah kupetunduk, asa ulang pellin kalak sidèban kujamitai, keppèken diringku gabè itulak.