Read Batak Dairi Epesus 1 Bible Online

Epesus 1 - Batak Dairi bible

Epesus 1

¹Kènè alè ummat Dèbata kalak sètia bai Jesus Kristus i Epesus!

²Aku si Paulus rasul Jesus Kristus ipas lemmo atè Dèbata nai, mengharapken dak idengani masèh atè dekket damè Dèbata Bapanta dekket Tuhan Jesus Kristus imo kènè.

³Nipoji mo Dèbata, Bapa ni Tuhanta Jesus Kristus sienggo merrèken matcam bagè pasu-pasu pertendiin i Sorga nai banta, merkitè Kristus.

⁴Madèng kin pè ihanaken dunia èn, enggo kin ngo ipilih Dèbata kita asa gabè sada dekket Kristus janah mbadia, janah oda mertikas i hadeppenNa kumarna kelleng atèna.

⁵Iteddo Dèbata ngo kita gabè dukak-dukakNa merkitè Jesus Kristus, mengèkutken lemmo atèNa.

⁶Nipoji mo Dèbata kumarna mendè basana simermulia i, sienggo ipetarar banta ibagasen Anak kekelengen atèna i.

⁷Ai kemmulihken permatè Kristus idi, gabè maluah ngo kita; isasa ngo dosanta kerna masèh atè Dèbata sitermurmur i,

⁸sienggo iberrèken banta mertinèncuk merdengan karina bijak bak pengantusiin.

⁹Ibagahken Dèbata ngo banta takina, imo rusia sinaing bakinenna imulana nai ibagasen Kristus.

¹⁰Imo hendakna mi suberri alam èn si nidates barang pè ni tanoh èn, asa gabè sada ibagasen Kristus ekuten i. Ipesaut Dèbata ngo i, enggo kessa jupa tikkina.

¹¹Ipesaut Dèbata ngo karinana i mengèkutken lemmo atèna sendiri. Ai i mulana nai ngo enggo iteddo kita, kerna ipergeddo ngo asa gabè ummatNa kita merkitè Kristus;

¹²asa nggelluhta simengharap perlebbè kalohoon bai Kristus memmoji kiniheji Dèbata.

¹³Kènè pè enggo ummat Dèbata sinderrang idengkoh kènè kata bennar i, imo Sukuten Kelluahen merrèken kelluahen bai ndènè. Sinderrangna i ngo iberrèken Dèbata pertandaan bai ndènè magahken enggo milikna kènè, imo Tendi Perbadia sienggo niperbagah-bagahna i.

¹⁴Tendi i ngo gabè jamienna, magahken jalonta ngo sienggo iperbagah-bagah Dèbata kin banta. Janah Tendi i ma ngo memmaing tok kita ummatna sienggo nipaluah Dèbata. Nipoji mo kehejiin Dèbata i.

¹⁵Jadi kessa nai kudengkoh enggo percaya kènè bai Tuhan Jesus janah ikekelengi kènè karina ummat Dèbata,

¹⁶dakdak ngo aku mendokken menjalo metangkup taba Dèbata kemmulihken kènè. Dak ngo kutersèngètken kènè gennep mersodip aku.

¹⁷Kupidoken ngo bai Dèbata ni Tuhanta Jesus Kristus, imo Bapa simermulia i, asa iberrèken Tendina bai ndènè, asa sènteng penandai ndènè bana.

¹⁸Kupido ngo asa ibuka Dèbata pikiren ndènè asa gabè ncihur; asa iarti kènè siharapen ndènè bai Dèbata nai simendiloi kènè, janah asa ibettoh kènè basa-basa Dèbata sienggo iberrèken mertinèncuk bak merandal bai karina jelma ummatna i;

¹⁹Bagi dèng ma dekket kegegohen kuasa Dèbata banta sipercaya i, imo kuasana sitermurmur i,

²⁰si nipettararna tikanna ipegelluh Kristus i simatè nai janah ipekundul ngo ia i kamuhunna i Sorga i.

²¹Datessen ngo tahta bak kuasa Kristus dari pada tahta bak kuasa kerajaen dekket perkuasa tanoh èn, bang kegegohen dekket kemuliaan bang nasa pengulu-pengulu sitergerar dekket barang kadè nola pè tupèh; oda pellin silot bagèndari, soh ngo mi sinaing roh seggen.

²²Ipetunduk Dèbata ngo karina mi terruh nèhè Kristus, janah ipebangkit ngo Ia gabè takal Kuria i.

²³Daging Kristus ngo Kuria i. Idomi ngo dagingna i dekket sinijalona bai Dèbata nai, kerna ia ngo mendomi sagumanna silot.