Read Batak Dairi Epesus 2 Bible Online

Epesus 2 - Batak Dairi bible

Epesus 2

¹Kènè pè enggo ngo matè kin arnia; kumarna ilausi kènè perèntah Dèbata, nai gabè merdosa mo kènè.

²Imo siniulaken ndènè mengèkutken bakko dunia èn; iuèi kènè ngo kuasa niperkuasa ni abang-abang i, imo tendi simengula soh bagèndari i atè-atè jelma siso uè tunduk bai Dèbata.

³Tosè bagè kalak i ngo kita arnia, dak ngo siulaken cubellek dagingta bak mengulaken taki-taki ukurta lako pesennangken daging bak pikiren. Jadi kita pè jelma sikenna pungur Dèbata ngo tosè bagè kalak sidèban i.

⁴Tapi ukum Dèbata permasèh atè mbellen ngo! Sun ngo kelleng atèna midah kita,

⁵gabè rebbak dekket Kristus ngo kita ipegelluh nola, sienggo matè kin cara pertendiin kumarna pengelausinta. Asa pellin masèh atè Dèbata sambing nai ngo kessa memmaing asa maluah kita.

⁶Kumarna enggo sisada kita dekket Kristus Jesus, gabè ipegelluh Dèbata ngo kita mengolihi rebbak dekketsa janah rebbak mengerajai dekketsa i Sorga.

⁷Ibaing Dèbata bagidi, asa idah jelma i luas bakunè belgahna masèh atè bak mendè basa Dèbata siniberrèkenna banta merkitè-kitè Jesus Kristus.

⁸Kumarna masèh atè Dèbata ngo asa ipaluah kènè, dalanna imo kerna percaya kènè bai Kristus; oda ngo kumarna usaha ndènè asa maluah pè kènè, tapi sibasa-basa Dèbata sambing ngo.

⁹Jadi isè poda ndorok gegah tersèngèt idi.

¹⁰Nihanaken Dèbata ngo kita. Merkitè-kitè Jesus Kristus itempa nola ngo kita, asa siulaken simerandal sienggo idokken Dèbata kin siperangènkenta.

¹¹O kènè bangsa siso Jahudi! Èngèt kènè mo bakunè kin kènè tikala i “ai kalak siso mertakkil” ngo kènè bagè pendokken kalak Jahudi simengaku enggo mertakkil (i mo sienggo lot pertandanna ibaing jelma mi daging kalak i).

¹²Ukum tikanna idi oda mersada dèng kènè dekket Kristus, kalak sidèban dèng ngo kènè siso mbengket mi ummat si nipilih Dèbata. Oda dekket dèng kin kènè sidasa bulaban nibaing Dèbata bak ummatna. Nggelluh kènè i dunia èn, oda lot pengharapen ndènè janah oda itandai kènè dèng Dèbata sibennar i.

¹³Tapi ukum bagèndari enggo ibagasen Jesus Kristus kènè, tukasi pè ndaoh kin kènè arnia, enggo mo gabè ndessing nola kumarnaken permatè Kristus i.

¹⁴Kristus ngo perdamènta. Ia ngo pessadaken kalak Jahudi dekket kalak siso Jahudi gabè sada bangsa, perjuhapenta i ngo bagè dingding simenirang kalak i, sienggo irontas Kristus merkitè permatèna i.

¹⁵Hatoren pati-patiin kalak Jahudi dekket perèntah bak adatna, enggo isasa Kristus, asa gabè sada bangsa rembaru kalak i, ibagasen Kristus. Bagidi ngo Kristus maing perdamèen i.

¹⁶Merkitè-kitè matè Kristus i silang i, gabè ipersada Kristus ngo kacimbang mbellahna kalak i janah ipedamè dekket Dèbata, nai gabè salpun mo perjuapen i.

¹⁷Kerna naidi roh mo Kristus mendahi kènè merembah Sukuten Kelluahen tersèngèt damè i bai ndènè; damè bai kalak siso Jahudi sindaoh kin bai Dèbata nai, damè bang bai kalak Jahudi sindessing kin taba Dèbata.

¹⁸Merkitè Kristus gabè karina mo kita bang kalak Jahudi pè i barang siso Jahudi — ndorok mo kita mendahi Bapa i, merkitè Tendi Perbadia sisada i.

¹⁹Asa, oda nèngè ngo kalak sidèban kènè barang pè kalak ruar. Tapi dengan sisada ngo gabè ummatna, janah dengan simpangaan Dèbata.

²⁰Ipellias ngo kènè i babo dangaan sinibaing rasul-rasul bak nabi-nabi pè; Jesus Kristus sendiri ngo gabè batu binangun.

²¹Ia ngo pelliasken bages i gabè Bages Dèbata simbadia bai Tuhan i.

²²Ibagasen Kristus i ngo kènè ipekkadè rebbak dekket sidèbanna i, gabè sada bages bekkas Dèbata dekket Tendina.