Read Batak Dairi Epesus 3 Bible Online

Epesus 3 - Batak Dairi bible

Epesus 3

¹Kerna naidi aku si Paulus gabè sada kalak sinikurung kumarna Kristus Jesus mahan olih ndènè siso bangsa Jahudi.

²Enggo sendah idengkoh kènè beritana, kumarna masèh atè Dèbata ipebangkit ngo aku mengulaken bahaan èn lako keperluun bai ndènè.

³Ai ibuka Dèbata ngo alamat bangku janah ibagahken ngo rusia rencanana taba aku. (Tersèngèt mi sèn enggo kubagahken cituk i babo ndai.

⁴Mula ijaka kènè i, tentu ndorok itimbangi kènè rusia tersèngèt Kristus tosè bagè sikuradumi.)

⁵Ukum arnia oda nung ibagahken rusia i taba jelma, tapi kum bagèndari ipetarar Tendi Dèbata ngo taba rasul-rasul dekket nabi-nabina.

⁶Rusia idi imo: Merkitè-kitè Sukuten Kelluahen i enggo terolih kalak siso Jahudi gabè dengan persidasa rebbak dekket kalak Jahudi lako menjalo masèh atè bak pasu-pasu bai Dèbata nai; ai gabè sada daging ngo kalak i janah rebbak menjalo niperbagah Dèbata merkitè Kristus Jesus.

⁷Iberèken Dèbata ngo bangku sada basa-basa gabè pengendeng lako pesarken Sukuten Kelluahen i. Kujalo ngo basa-basa i merkitè kuasa Dèbata simengula ibas diringku.

⁸Aku ngo sikètèkna ipas karina ummat Dèbata nai; tapi ipesakat Dèbata ngo bangku basa-basa èn: Ulaan mennukutken beritana mendahi kalak siso Jahudi; imo kekayaan Kristus siso merkerri-kerriin i;

⁹dekket asa karina kalak mettohsa bakunè pemaing Dèbata situmempa sagumanna silot i, lako pesautken hendakna sidom rusia i, ai mboni dèng kin ngo taki Dèbata i sidekkahna èn.

¹⁰Maksud Dèbata imo asa bagèndari merkitè kuria i karina simerkuasa i abang-abang i memettoh kebijaken Dèbata simermatcam bagè i.

¹¹Idi mo taki Dèbata i mulana i nai kin, sinipesautna merkitè Jesus Kristus Tuhanta i.

¹²Merkitèken percaya bai Jesus Kristus janah kumarnaken mersada ibagasensa, gabè ndorok janah berrani mo kita mendessingi Dèbata ibagasen dom kepercayaen.

¹³Kerna naidi mengido mo aku: Ulang pella roga kènè mula pè mpersuk kuakap mengkepkep kènè, ai karinana i mahan kiniselloh bai ndènè ngo.

¹⁴Kerna naidi ngo kulempit tèunku mersembah taba Bapa i.

¹⁵Bana nai ngo rohna karina pemparen ni dunia èn bak si ni Sorga pè menjalo bakkona gennep.

¹⁶Kusodipken ngo taba Dèbata simermulia i, asa ipergegohi jelma perbagasen ndènè merkitèken Tendina i.

¹⁷Kumarna percaya ngo kènè bai Kristus i, katerra pè dak merian mo Kristus idi ibagasen atè-atè ndènè, janah nggelluh ndènè merhenjellen bak ikuasai kelleng.

¹⁸Kusodipken ngo asa rebbak mengantusi kènè dekket ummat Dèbata tersèngèt bakunè bellangna, geddangna, datesna dekket mbagesna ngkelleng atè Kristus i,

¹⁹ai so terantusen jelma i ukum merkitè-kitè pikirenna sendiri. Katerra pè, iantusi kènè mo nemmu ngkelleng atè Kristus i, asa gabè dom bai ndènè kedèbataan ni Dèbata.

²⁰Ai terpehana Dèbata ngo lebih dari pada si sipido, bang pè si sipikirken, rembang mi kuasa Dèbata simengula ibagasen kita.

²¹Mermulia mo Dèbata i tengah-tengah kuria soh mercundut-cundut merkitè-kitè Jesus Kristus. Poji mo Dèbata soh mi amman sumendah! Amèn.