Read Batak Dairi Epesus 4 Bible Online

Epesus 4 - Batak Dairi bible

Epesus 4

¹Kerna naidi ngo asa aku — sada kalak tahanen kumarnaken mengkebasi Tuhan i — mengidoken bai ndènè alè dengan: merpengelako selloh mo kènè rembang mi pendiloi Tuhan i bai ndènè.

²Merncerrep ukur mo kènè janah lamlam mo ukur ndènè, ninganna perlambas ukur. Pacidah kènè mo ngkelleng atè ndènè merkitè mersiurup- urupen samah-samah kènè.

³Kerencetken kènè mo mertuhu-tuhu nggelluh ibagasen damè, asa dak tong teridah kesadaan sinibaing Tendi Dèbata.

⁴Sada ngo daging i janah sada ngo Tendi, bagidi ngo pendilona bai ndènè, asa gabè sisada pengharapen kènè.

⁵Sada ngo kessa Tuhan, sada ngo kepercayaen janah sada ma ngo peridiin,

⁶sada ngo Dèbata Bapa ni karinana jelma. Ia ngo Tuhan sagumanna silot janah sidasa sagumanna silot i.

⁷Gennep ngo kita menjalo sibasa-basa bana nai, mengèkutken pemerèken Kristus.

⁸Ibas Bibèl tersurat bagèen, “Tikan laus Ia mi bekkas sindatesna, Iembah ngo nterrem taban-taban; janah Iberèken ngo sibasa-basa bai jelma.”

⁹Asa mula idokken “laus mi babo ia”, merlapaten ngo i, enggo kin susur Ia soh mi bekkas siperterruhna i tanoh èn.

¹⁰Asa Ia sienggo roh susur i, Ia ma ngo laus mi bekkas datessen asa langit, nai gabè idomi mo karinaNa.

¹¹Ia ma ngo “merèken basa-basa bai jelma”, dèba gabè rasul, dèba gabè nabi; dèba gabè mennukutken Sukuten Kelluahen i, dèba nai gabè pengendeng kuria dekket guru pengajari.

¹²Ibaing pè bagidi asa cukup ngo mengkebasi kalak sipercaya dekket pehèdu-hèduken kuria i, imo daging Kristus.

¹³Merkitè bagidi, gabè sisada kepercayaen mo kita karina janah sisada pengantusiin tersèngèt Anak Dèbata. Nai gabè makin tang mo kita janah makin seppè bagè Kristus.

¹⁴Jadi oda nèngè ngo bagè anak-anak kita ikodèng-kodèng barang ipelindak-lindak janah misèn mi sadoi ipe-embah-embah matcam bagè peddah-peddah jelma kalak perakkal-akkal sipeoto-otoken. Ilalingken kalak i ngo jelma i merkitè rana ndalit.

¹⁵Tapi ukum kita dak gabè simengkejengjengken kebennaren i mo ibagasen ngkelleng, asa muat ndekkahna muat tangna kita ipas karinana janah muat suntukna tosè bagè Kristus. Ia ngo takalta.

¹⁶Bana nai ngo sendihi i janah isusun bak iterdun-terdun janah ipetemmu-temmu gennep bukku sinirakuten urat-urat. Jadi mula gennep sendihi mengula bagè patutna, gabè makin mbelgah mo daging i janah mergegoh janah ipehèdu-hèdu ibagasen ngkelleng.

¹⁷Èn ngo sikudokken memmes ibagasen Tuhan i, Ulang nèngè mo kènè merpe- ngalako bagè kalak siso menandai Dèbata, simemikirken siso puna-puna.

¹⁸Gellap mo perukuren kalak i. Oda itandai kalak i kenggelluhen siroh bai Dèbata nai, ai kadè poda pemettoh kalak i tersèngèt Dèbata, ai perukur mpihir ngo kalak i.

¹⁹Oda ibettoh kalak i nèngè mèla gabè cubellekna ngo iuèi kalak i janah luhlah pengellakona.

²⁰Tapi Kristus sinitandai ndènè i oda ngo bagidi.

²¹Otang ièngèt kènè ngo tersèngèt Ia! Ai enggo ngo iajari kènè, tersèngèt keben- naren silot bai Jesus.

²²Kerna naidi patak- ken kènè mo bakko ndènè sinderbi i, ai lako mago ngo pengkerohkenna i, kumarna cubellek sipeoto-oto janah mengelalingken i.

²³Kennah iperembaru ngo pikiren dekket pennarihen ndènè karinana.

²⁴Naing mo kènè nggelluh bagè jelma rembaru imo merbakko rembaru mengèkutken penempaan Dèbata, ibagasen kebennaren dekket ketègerren simbadia.

²⁵Kerna naidi, ruapken kènè mo sisèntengna. Ulang nèngè merluap, ai gabè rebbak sendihi ngo kita i daging Kristus.

²⁶Mula mellaga kènè ulang mo sanga merdosa. Ulang sanga sundut mataniari mak malap laga ndènè.

²⁷Ulang sanga sumiat-siat sibolis i atè-atè ndènè.

²⁸Sienggo ncemmal menangko, ulang nèngè mo mennangko, tapi mahan bahaan mo ia asa lot panganna dapet merkitè kejujuren asa lot berènkenna taba kalak sikekurangen.

²⁹Mula mongkam kènè, ulang ruap kata siso merjullat bai ndènè nai. Kata merandal mo ruap ndorok pesellohken janah merrèken peddah taba dengan. Ai gabè terolih simerandal ngo kalak simendengkohi.

³⁰Ulang mo arsaki kènè atè Tendi Dèbata. Enggo ngo icapken kènè merkitè Tendi gabè milik Dèbata. Tendi i mo gabè jaminenna magahken roh nè mo Ari Kelluahen bai ndènè.

³¹Peddaoh kènè mo hellem, kosom, laga, perselisihen dekket pungur. Ulang nèngè lot bai ndènè senggak-senggak, rèhè-rèhè dekket si codi mi sidi.

³²Tapi naing mo kènè ramah tamah janah melamlam samah-samah kènè, ulang mo kènè mersilugunen, ai Dèbata pè oda ngo ilugun dosa ndènè merkitè Kristus.