Read Batak Dairi Epesus 5 Bible Online

Epesus 5 - Batak Dairi bible

Epesus 5

¹Dukak-dukak nikekkellengen Dèbata ngo kènè, kerna naidi kennah codi kènè mo Ia.

²Perangèken kènè mo ngkelleng i bagè Kristus sienggo mengkekelengi kita. Iberrèken ngo diriNa mengkepkep kita, mahan luah janah pèlèen baungkus pesennangken atè Dèbata.

³Ummat Dèbata ngo enggo kènè, kerna naidi ulang mo kènè merlangkah julu meddem, ulang luhlah bak mengait mi diri ndènè sambing kènè, salang menggerari sibagidi sambing pè ulang kènè uè.

⁴Ulang kènè uè mengerana rorang bak luhlah barang mengeruapken kata-kata meronah bang pè pergait-gaiten siso patut. Tapi lotiin mo dokken kènè mendok lias atè taba Dèbata.

⁵Peratè-atèken kènè mo èn mendè: kalak simerpengelako luhlah bak rorang barang perukur mengait bana (pengelako sibagidi dos ngo i dekket menembah dèbata sidèban), kalak sibagidi oda pendikèi i Kerajaen Kristus bak Dèbata.

⁶Ulang kènè uè ioto-otoi kata rumar, ai kumarna sibagidi ngo melaga Dèbata taba kalak siso menguèi baNa.

⁷Jadi ulang mo kènè mersaor dekket kalak sibagidi.

⁸Kènè pè ibas sigellap ngo tikala i, tapi ukum bagèndari, enggo gabè ummat Tuhan kènè, jadi enggo ibagasen kecihuren i. Kerna naidi kenggelluhken kènè mo bagè dukak-dukak kecihuren.

⁹Ibas kecihuren idi nai ngo roh buah simerandal bak ketègerren dekket kebennaren.

¹⁰Perdatèken kènè mo barang kadè lemmo atè Tuhan i.

¹¹Ulang dekket kènè mengulaken ulaan kegellapen siso merguna i. Tapi pincang kènè mo kalak sibagidi. (

¹²Ai salang menerèngèti ulah-ulah kalak idi ipas simboni pè enggo mo kememèla.)

¹³Ai gabè ntarar ngo taridah karinana ibaing kecihuren i.

¹⁴Janah karina sienggo ntarar ntangkas mo enggo i. Kerna naidi ngo asa idokken, “Ndungo mo kènè siterpeddem, janah kèkè mo kè ibas simatè nai. Nai ibendangi Kristus i mo kènè.”

¹⁵Kerna nai seppè mo perdatèken bakunè perulanmu. Ulang kènè merperangè bagè kalak sikurang ukur; tapi bijak mo ukur ndènè.

¹⁶Pergunaken kènè mo tikki silot bai ndènè, ai tikki kesusahen janah jahat ngo bagèndari.

¹⁷Kumarna naidi ulang gabè moto kènè, tapi perdatèken mo kadè lemmo atè Tuhan i siulankenmu.

¹⁸Ulang mo kènè mabuk ibaing anggur, ai kemmagoon ngo nikerrohkenna i. Tapi dom Tendi Perbadia mo kènè.

¹⁹Ranaken kènè mo samah-samah kènè endè-endè Psalm, endè pemoji-mojiin bai Tuhan i dekket endè pertendiin. Mersampang atè mo kènè merendè memoji Tuhan i.

²⁰Menettap mo kènè mendokken menjalo metangkup kumarna karinana, taba Dèbata Bapa, merkitè-kitè gerar Jesus Kristus Tuhanta i.

²¹Mersiuè-uèen mo kènè ibagasen merkebiaren midah Kristus.

²²Iuèi sinibages mo sinibalèna bagè pe- nguèina bai Tuhan i.

²³Ai sinibalè i ngo takal si nibagesna, bagè Kristus takal Kuria i, janah ia ma ngo Sipaluah i kuria sienggo terdokken dagingNa i.

²⁴Tosè bagè penguèi kuria bai Kristus i, bagidi ma mo sinibages menguèi sinibalèna.

²⁵Kènè alè sinibalè, kekellengi kènè mo sinibages ndènè, bagè Kristus mengkekelengi kuria i, janah merrèken diriNa mengkepkep kuria i.

²⁶Ibaing Kristus bagidi asa ndorok Ia pepantingken kuria i merkitè peddahNa bak perridiin laè i, asa ndorok Ia pesakatken bai Dèbata.

²⁷Merkitè bagidi ibaing Kristus mo kuria idi cènder ntegguh janah mpanting i hadeppenNa, oda mertikas, oda sirèhèen, janah oda kurang barang kadè pè.

²⁸Bagidi ma mo sinibalè kennah ikekelengi ngo sinibagesna bagè dagingna sendiri. Karina simengkekelengi sinibagesna, mengkekelengi dirina ngo ia i si. (

²⁹Oda nung isè mengkosomi badanna. Tapi dak ipehèdu-hèdu janah ijamotken ngo i, bagè Kristus menjamoti kuriaNa,

³⁰kerna sen- dihi daging Kristus i ngo kita.)

³¹Tersurat ngo ibas Bibèl, “Kerna naidi itadingken anak laki ngo bapana bak inangna, lako rebbak dekket sinibagesna, janah gabè sada daging mo kalak i sidua.”

³²Mbages ngo nitèmbak kata èn. Kucodiken ngo i mi persaoren Kristus dekket kuria i.

³³Lot ngo demmuna ayat i bai ndènè: Karinana sinibalè kennah ikekelengi ngo sinibagesna gennep, dosken dirina sendiri, janah gennep sinibages kennah merkebiaren taba sinibalèna.