Read Batak Dairi Epesus 6 Bible Online

Epesus 6 - Batak Dairi bible

Epesus 6

¹Kènè alè anak-anak, uèi kènè mo partua ndènè, i bagasen Tuhan i; ai i ngo patut ulanken ndènè.

²“Pesangap bapamu dekket inangmu,” i ngo pati-patiin perlebbè bai Dèbata nai merdengan bagah-bagah,

³“Asa sayurntua kono, janah ndekkah nggelluh i tanoh èn”.

⁴Kènè alè partua! Ulang baing kènè mellaga dukak-dukak ndènè, tapi pehèdu-hèdu kènè mo kalak idi i bagasen ajar dekket peddah bai Tuhan i nai.

⁵Kènè alè hamba! Uèi kènè mo induk ndènè i tanoh èn ipas mehormat janah merkebiaren ninganna mertuhu-tuhu bagè penguèi ndènè bai Kristus i.

⁶Ulang mo kènè penguèi mula tikan pellin imanduri; janah ulang ma asa ipoji dèba barang naing muat-muat ukur. Tapi naing mo bagè naposo Kristus menguèi Dèbata ibagasen ukur ndènè nai.

⁷Ulaken kènè mo bahaan ndènè idi ibas burju ndènè merukur dekket sampang atè, bagè penguèi ndènè bai Tuhan i, ulang kumarna jelma.

⁸Èngèt kènè mo, suang ngo jaloon gennep jelma bai Tuhan i nai, tah naposo pè ia barang induk, tosè mi sinibahankenna.

⁹Kènè alè induk! Bagi ma mo baing kènè taba naposo ndènè. Ulang mo dak asup kènè kalak idi. Èngèt mo! Rebbak merinduk ngo kènè taba Tuhan ni sorga i; janah oda me- ngidah-idah abè ukum ia.

¹⁰Laènkenna i naing mo gabè ntegguh kènè ibagasen kegegohen nijalo ndènè bai Tuhan i nai.

¹¹Pakkè kènè mo karinana senjata nijalo ndènè bai Dèbata nai, asa ndorok kènè mengalo akkal-akkal Sibolis i.

¹²Kerna oda ngo taba jelma kita juhap, tapi mengalo kegegohen karina sètan-sètan simengerajai jaman jahat ènda ngo. Mengalo kegegohen tendi jahat simengerajai abang-abang i ngo kita.

¹³Kerna naidi pakkè kènè mo senjata bai Dèbata nai, asa mula roh sijahat i, gabè ndorok mo kènè mengalo musuh i janah mula enggo juhap kènè soh mi puncana, dak mergegoh ngo kènè tong.

¹⁴Kerna naidi tettah mo kènè cènder, bèntingken kènè mo kebennaren i abak ndènè, janah pakkèken kènè mo baju bessi ketègerren mahan pertahanen ndènè.

¹⁵Nènèh ndènè mercipatuken kekasahen lako magahken Sukuten Kelluahen merembahken kedamèen i.

¹⁶Adumna i embah-embah mo gennep tèk tambeng-tambeng i, imo kepercayaen i, ai merkitèken tambeng-tambeng idi tertaluken kènè ngo karinana pengèpuh oltep perjahat i.

¹⁷Jalo janah tangkulukken kènè mo tangkuluk kelluahen i dekket peddang bai Tendi Perbadia nai, imo kata Dèbata.

¹⁸Baing kènè mo bagidi ninganna mersodip, lako mengido urup bai Dèbata nai. Gennep tèk mo kènè mersodip tosè mi penggerrekken Tendi i, janah tettap ndungo, ulang ndotè, jugulken kènè mo mennodipken karinana ummat Dèbata.

¹⁹Sodipken kènè ma mo bang aku pè, asa iajari Dèbata aku, lako mengeranaken situhunna, janah asa nggasang aku mennukutken Sukuten Kelluahen i taba karina jelma.

²⁰Ai i ngo ulankenku idokken Dèbata, janah terantè ngo aku bagèndari. Dak sodipken kènè mo asa nggasang aku mengeranaken Sukuten Kelluahen i bagè patutna.

²¹Bagahenken si Tikikus ngo bai ndènè karina tersèngèt diringku, ai ia ngo sada kalak denganta kekellengen janah perkebbas kettoken ipas ulaan Tuhan i, asa ibettoh kènè simasa bangku bak ulanku.

²²I ngo sebabna asa kupasulak ia mendahi kènè lako magahken karina simasa bai nami, janah asa terapo ukur ndènè.

²³Iberrèken Dèbata Bapa dekket Tendi Tuhan Jesus Kristus mo damè bak ngkelleng atèna rebbak dekket kepercayaen taba karinana kuria.

²⁴Dak ipasu-pasu Dèbata mo kènè karinana sidekkah mengkekelengi Tuhanta Jesus Kristus. Tabe nami, Paulus