Read Batak Dairi Kolose 1 Bible Online

Kolose 1 - Batak Dairi bible

Kolose 1

¹Bangku nai si Paulus rasul Kristus Jesus ipas lemmo atè Dèbata nai, bak denganku si Timoteus,

²mendahi ummat Dèbata silot i Kolose. Masèh atè mo bai ndènè dekket damè bai Dèbata Bapanta i nai.

³Dak mendokken mejalo metangkup ngo kami taba Dèbata Bapa Tuhan Jesus Kristus, gennep mersodip kami mennodipken kènè,

⁴kumarna enggo kudengkoh kami berita kepercayaen ndènè bai Kristus Jesus bak ngkelleng atè ndènè midah karina ummat Dèbata.

⁵Percaya ngo kènè janah merkelleng atè, kerna mengharap ngo kènè mi sienggo ipèmaken Dèbata bai ndènè i sorga. Enggo ngo idengkoh kènè tersèngèt i tikan isukutken Sukuten Kelluahen i bai Dèbata nai sienggo soh bai ndènè.

⁶Sar ngo Su- kuten bai Dèbata idi nai mi suberri dunia èn, janah memasu-masu ngo i bai jelma, codi bagè sienggo masa bai jelma imo sienggo masa bai ndènè, kessa nai idengkoh kènè masèh atè Dèbata, janah tuhu-tuhu irasaken kènè.

⁷Karinana idi ibettoh kènè bai si Epapras nai, dengan pengendeng sikukekelengi kami. Ai perkebbas Kristus ngo Ia janah sètia mengula lako keperluun banta.

⁸Bana nai ngo kubettoh kami magahken merkitè kuasa Tendi Dèbata ngo ndorok kènè mersikekelengen.

⁹Kerna naidi ngo asa dak kusodipken kènè, kessa nai kudengkoh kami tersèngèt kènè. Dak kupido kami ngo bai Dèbata, asa iberrèken Tendina i bai ndènè kebijaken dekket kepantasen, asa makin ntangkas ibettoh kènè kadè lemmo atè Dèbata.

¹⁰Jadi merkitè bagidi gabè iperangèken kènè mo lemmo atè Dèbata, nai gabè kelemmonkenNa mo kènè, asa gabè merbuah merandal kènè. Jadi makin ntangkas janah mbages mo penandai ndènè tersèngèt mi Dèbata.

¹¹Katerra pè dak ipergegohi Dèbata mo kènè, asa mergegoh kènè lako menggong barang kadè sigongenken, janah sobar ninganna merukur sennang,

¹²janah dokken kènè mo mellias atè bai Bapa i. Kerna Bapa i ngo petauken kènè rebbak dekket ummat Dèbata gabè terolih janah mbengket mi kecihuren i.

¹³Ai enggo iruah kita ibas gemgemmen kegellapen idi nai, gabè ilompat kita mi bagasen kerajaen Anak kekellengen atèNa.

¹⁴AnakNa i ngo paluahken kita; jadi enggo iampuni dosa-dosanta.

¹⁵Oda ndorok ndidah Dèbata, tapi Kristus i ngo codi mi rupa Dèbata sindorok ida- hen jelma. Ai sinderrang makdèng lot ihanaken, enggo kin ngo lot Kristus janah huntuun.

¹⁶Ai merkitè-kitè Ia ngo ihana- ken Dèbata sagumanna silot i sorga bang pè i tanoh èn, imo sitaridah bak siso taridah pè; bagi ma dekket tendi simerkuasa dekket simemerèntah. Karinana dunia èn ihanaken merkitè-kitè Kristus janah merkepatèen bai Kristus.

¹⁷Sinderrang mak- dèng ihanaken barang kadè, enggo mo lot kin Kristus. Janah kumarna ia ngo hot i kebekkasenna sagumanna silot idi.

¹⁸Ia ngo takal daging i, idi mo kuria i, kerna Ia memerèken kenggelluhen bai kuria i. Ia ngo perlebbè ipegelluh i simatè nai, kerna nai ngo asa Ia gabè huntuun janah perlebbè ni karinana silot i.

¹⁹Dèbata ngo menentuken, barang kadè silot ibas kedirinna bagi ma ngo lot ibas kediriin AnakNa i.

²⁰Janah merkitè Anakna i ma ngo ibaing Dèbata ndorok mersaor nola mengolihi sagumanna silot i dekket Dèbata — silot i dunia èn bak si ni sorga pè, merkitè-kitè permatè AnakNa i, i kayu persilang.

²¹Ukum arnia, ndaoh ngo kènè bai Dèbata nai. Musuh ndènè ngo Dèbata kumarna pengelako dekket pikiren ndènè jahat i.

²²Tapi ukum bagèndari enggo merdamè kè dekket Dèbata merkitè permatè AnakNa i. Jadi mpanting mo kènè iembah mi hadeppen Dèbata janah oda mertikas.

²³Tapi kennah hot ngo kènè percaya janah ntegguh cènder merkepercayaen. Ulang gabè mosè pengharapen ndènè bagè sienggo niberrèkenna kin bai ndènè sinderrang ijalo kènè Sukuten Kelluahen bai Dèbata nai. Enggo mo ibagahken taba karina jelma Sukuten i mi suberri dunia èn. Idi ma ngo sebabna aku si Paulus enggo gabè perkebbas.

²⁴Lolo ngo aku bagèndari, kerna ndorok menggong simpersuk aku lako mengkepkep kènè. Ai merkitè sitahanen i perdagingen èn, imo lako pepulken kadè kin dèba nai sigongenken Kristus mengkepkep kuriaNa, imo dagingNa i.

²⁵Ipebangkit Dèbata aku gabè pengendeng i kuriaNa, lako bai ndènè ngo i, asa kupessoh bai ndènè karinana Sukuten bai Dèbata nai,

²⁶imo sukuten sienggo merratus-ratus tahun sienggo salpun irusiaken Dèbata bai karina jelma, tapi ukum bagèndari enggo ibagahken bai ummatNa.

²⁷Bai ummatNa i ngo naing ibagahken Dèbata bakunè mendèna dekket kesurungen rusiaNa i lako bai karina jelma. Ukum rusia idi, imo: Mula ibagasen Kristus kènè, iperakapken kènè mo kebelgahen Dèbata.

²⁸Kristus ngo kusukutken kami bai gennep jelma. Kupesèngèt janah kupeddahi kami ngo kalak i karina merkitè kebijaken nami, asa merkitè idi karina jelma terteggu mendahi Dèbata, imo sienggo mbages perbinettohenna tersèngèt pertendiin i ibagasen Kristus.

²⁹Asa dapet idi, mertuhu-tuhu ngo kukelejaken ibas karina gegohku, imo gegoh siniberrèken Kristus bangku, janah simengula ibas diringku dom kuasa.