Read Batak Dairi Kolose 2 Bible Online

Kolose 2 - Batak Dairi bible

Kolose 2

¹Ukum dok atèngku naing mo nemmu ibettoh kènè bakunè susahna perjuapen batinku mengkepkep kènè bang kalak ni Laodikia dekket karina siso ntangkas menandai aku dèng.

²Karina i kuulaken asa ntegguh nemmuken ukur kalak i janah mersikekelengen samahsa, asa makin sisada kalak i, janah asa makin iarti kalak i janah makin percayana, jadi makin ibettoh kalak i mo rusia Dèbata, imo Kristus i.

³Kristus ngo memukaken kebijaken bak perbinettohen Dèbata simboni arnia.

⁴Kubagahken i asa ulang ioto-otoi kalak perkata ndalit kènè.

⁵Mula pè ndaoh aku bai ndènè nai, ukum pertendinku rebbak ngo dekket kènè. Lolo kalohoon ngo aku mengi- dah seppèna kènè sada kata janah percaya bai Kristus.

⁶Kerna naidi bagè penjalo ndènè bai Jesus Kristus Tuhan i, bagi mo kènè merpengelako ibagasensa,

⁷janah merurat ibagasenSa. Naing mo nemmu kènè bagè sinipehèdu-hèdu merbatu cendiken Kristus. Kepercayaen ndènè pè makin ntegguhna tosè bagè sienggo ipeddahken bai ndènè. Dakdak mo kènè perukur mejalo metangkup.

⁸Merjaga-jaga mo kènè, asa ulang iago dèba kènè merkitè nahu jelma siso merguna janah mengelalingken, ai oda ngo bai Kristus nai nahu sibagidi, tapi bai jelma nai ngo rohna dekket bai tendi-tendi perkuasa dunia ènda nai.

⁹Ibagasen Kristus ngo dapet kedèbataan ni Dèbata, merupaken jelma.

¹⁰Asa gabè dom ngo kinimerandal ibagasen Kristus bagidi ma perangè mendè pè, kerna Kristus ngo ekuten bai karina tendi simerkuasa bak memerèntah.

¹¹Mula ibagasen Kristus kènè, enggo mo kènè itakkil, oda bagè pertakkil nibaing jelma, tapi mertakkil nibaing Kristus ngo imo merkitè enggo ipaluah kènè ibas bakko dosa idi nai.

¹²Ai sinderrang iperidi kènè, tikan bagidi ngo kènè ikubur rebbak dekket Kristus, janah merkitè perridiin i ma rebbak ipegelluh nola ngo kènè rasken dekket Kristus, kerna ikepercayai kènè kuasa Dèbata sienggo pegelluhken Kristus i kematèen nai.

¹³Ai sienggo matè ngo kènè tikala idi ipas pertendiin, kumarna dosa ndènè i, janah kumarna oda itakkil kènè cara daging. Tapi ukum bagèndari enggo ipegelluh Dèbata kènè rebbak dekket Kristus, kerna enggo isasa Dèbata karina dosanta,

¹⁴janah enggo isondati hukumna simengennai kin nemmu banta. Merkitè ipersilangken karina idi ipas kayu persilang isasaken Dèbata mo karina tuntuten taba kita.

¹⁵Asa ulang nèngè mergegoh karina tendi simemerèntah bak simerkuasa i. Gabè tontonen sinterrem mo kalak i karinana, sinderrang iarak Kristus kalak i gabè taban-tabanen, tikan ibas arak-araken petuduhken kemenangenNa.

¹⁶Kerna naidi ulang mo ipekata-kata dèba kènè kemulihken pangaan barang ènumen, barang pè kumarna ari raya agama, barang ari raya peltak bulan barang pè tersèngèt ari Sabat.

¹⁷Ai pellin lèndung simasa seggen i ngo kessa i, tapi Kristus ngo keteridahen ni karinana i!

¹⁸Ulang belli kènè diri ndènè irogiken kalak sipakulah-kulahken peteruhken dirina janah mersembah taba malaèkat-malaèkat. Gabè gegah ngo kalak i kemulihken pikiren-pikiren tanoh èn janah mengasang-asangken alaten-alaten siniidahna,

¹⁹oda nèngè Kristus i ekutenna. Bai Kristus ngo mertemmu karinana daging sinipedemmu sendihi janah makin mbelgah mengèkutken lemmo atè Dèbata.

²⁰Enggo matè kènè rebbak dekket Kristus janah enggo ipaluah ipas gemgemmen tendi simengkuasai dunia èn nai? Kasa uè dèng kènè nggelluh janah tunduk mi hatoren pati-patiin simendokken,

²¹“Ulang jamah i; ulang pangan i, ulang dais kono mi sidi?”

²²Oda merlapaten nèngè karinana hatoren sibagidi, ai hatoren dekket pati-patiin jelma ngo i karina.

²³Tuhu ukum tengennen bagè kebijaken ngo i mula idokken mersembah taba malaèkat janah pebujur-bujurken ukur ncerrep dekket mendersa diri; tapi cituk poda merguna i karinana lako mengalo cubellek-cubellek daging.