Read Batak Dairi Kolose 3 Bible Online

Kolose 3 - Batak Dairi bible

Kolose 3

¹Ukum kènè enggo ipegelluh rebbak dekket Kristus, kerna naidi jalangi mo si ni sorga i, imo bekkas Kristus kundul i kamuhun Dèbata.

²Si ni Sorga i mo pikiri, ulang mo si ni tanoh èn.

³Kerna sienggo matè ngo kènè, jadi ukum nggelluh ndènè sibagèndari rebbak dekket Kristus, mboni ibagasen Dèbata ngo.

⁴Nai ntarar kessa mo seggen Kristus simerrèken kenggelluhenta i, kènè pè dekket ma mo terridah rebbak dekketsa i kessangapenNa i.

⁵Kerna naidi, bunuh kènè mo karina cubellek-cubellek tanoh èn simencèdai diri ndènè, imo perlangkah julu meddemenken, luhlah, rorang, cubellek jahat nipergeddo daging, nahaka (kerna nahaka i dos ngo i mi mersembah taba bègu).

⁶Ai sibagidi ngo mengkerohken laga Dèbata taba kalak siso menguèi katana.

⁷Ukum tikala i, iulaken kènè ngo sibagidi, sinderrang ikuasai dèng kènè.

⁸Tapi ukum bagèndari, patakken kènè mo nasa sijahat ibas diri ndènè nai; ulang nèngè melaga barang mengamuk barang merrukur benci taba sidèban. Ulang ruap bai ndènè nai kata-kata mengelèai barang rana-rana mellamun.

⁹Ulang kènè mersiluapen, ai enggo italkasi kènè nggelluh ndènè siarnia dekket bakko i.

¹⁰Enggo iberrè nggelluh sirembaru bai ndènè bagèndari, jadi enggo mo kènè gabè jelma rembaru, siniperimbaru Situmempa, tasè bagè rupaNa ibaing Dèbata, asa itandai kènè Dèbata i.

¹¹Jadi patakken kènè mo karina simengkella-kella, ai oda lot nèngè kalihna kalak Jahudi barang siso Jahudi, kalak simertakkil barang siso mertakkil; oda lot nèngè kalihna perbangsaan pè, oda kalih hamba barang anak tohè, ai Kristus ngo ibas sagumanna i, janah ibagasen Kristus ngo sagumanna i.

¹²Kerna naidi kènè alè sienggo gabè ummat Dèbata janah nipilihna. Kennah gabè permasèh atè ngo kènè, perrukur mendè, merrukur ncerrep, melamlam janah mbingit.

¹³Kennah mersipeuè-uèen ngo kènè samah kènè, janah mersisasaan dosa. Ai Tuhan i pè enggo isasa dosa ndènè, bagi ma mo bang kènè pè.

¹⁴Siperluna kalohoon imo: Kennah mersikekelengen ngo kènè samah kènè, ai i ngo rakut-rakut simendèna kalohoon.

¹⁵Naing mo keputusen-keputusen ndènè itentuken damè siniberrèken Kristus idi ibagasen atè-atè ndènè. Ai idilo Dèbata kènè asa gabè sada daging ngo ibagasen damè ni Kristus i. Ninganna gabè perrukur mejalo metangkup mo kènè.

¹⁶Naing mo idomi peddah Kristus perrukuren ndènè, janah dak mertinèncuk mo damèna bai ndènè. Mersiajar-ajaren mo kènè merkitè-kitè kebijaken, endèken kènè mo endè pemoji-mojiin Psalm dekket endè-endè pertendiin. Endèken kènè mo Dèbata ibagasen ukur mejalo metangkup ibas atè-atè ndènè.

¹⁷Rèmpunna, barang kadè iulaken barang iranaken kènè, ulaken janah ranaken kènè mo i lako memoji gerar Tuhan Jesus, ninganna mendokken mejalo metangkup bai Dèbata Bapa merkitè-kitè Jesus.

¹⁸Kènè partua ibages, uèi kènè mo sinibalè ndènè, ai bagi ngo patutna pengelako kalak Kristen.

¹⁹Kènè partua ibalè, kekellengi kènè mo sinibages ndènè. Ulang tois kènè meradepkensa.

²⁰Kènè alè anak-anak, uèi kènè mo partua ndènè, ai bagidi ngo ikellemmoken Dèbata.

²¹Kènè alè partua, ulang gettemmi kènè ukur dukak-dukak ndènè, asa ulang mendellè kalak i!

²²Kènè alè dengan sigabè hamba! Ibas karinana mo uèi kènè induk ndènè i tanoh èn. Ulang mo pellin sinderrang idah kalak i asa merpenguèi kènè bana bagè cara muat-muat ukur; tapi uèi kènè mo induk ndènè i, kumarna merkebiaren kènè midah Tuhan i.

²³Ulaken kènè mo bahaan sinidokkenna bai ndènè ipas ukur nggasang, bagè pengulaken ndènè bai Tuhan i, oda bai jelma.

²⁴Èngèt kènè mo, bai Tuhan i nai ngo jaloon ndènè upah ndènè. Barang kadè ipèmaken Tuhan i bai ummatNa, idi ma ngo iberrèken bai ndènè. Ai Kristus i ngo induk siniuèen ndènè.

²⁵Barang isè salah, jalonna ngo bales kessalahenna i, ai dos ngo karinana jelma i hadeppen Dèbata.