Read Batak Dairi Kolose 4 Bible Online

Kolose 4 - Batak Dairi bible

Kolose 4

¹Kènè alè induk, adil mo baing kènè taba naposo ndènè. Èngèt kènè mo, lot ngo induk ndènè i sorga.

²Tettap mo kènè ngkasah mersodip, janah ndungo mo kènè. Dokken kènè mo mejalo metangkup taba Dèbata.

³Sodipken kènè ma mo bak kami pè, asa iberrèken Dèbata tikki selloh bai nami lako mennukutken rusia Dèbata tersèngèt Kristus, ai kemmulihken naidi ngo asa terkurung aku bagèndari.

⁴Mersodip mo kènè asa merkitè i ndorok kusukutken rusia i bagè patutna.

⁵Bijak mo kènè taba kalak siso percaya dèng, janah pessanga kènè mo tikki ndènè lako mendahi kalak i.

⁶Dak melamlam mo rana ndènè asa terrabin ukurna mendengkoh rana ndènè i. Mpantas mo kènè mengaloi kuso-kuso ndèba.

⁷Bagahenken si Tikikus kekellengen i ngo bai ndènè karinana simasa bangku. Sada kalak kettoken ngo Ia mengula rebbak dekket kami bai Tuhan i.

⁸Kuutus ngo ia mendahi kènè, asa ibettoh kènè bakunè masa bai nami, janah asa ipegasang kènè.

⁹Rebbak berkat ngo si Onesimus dekket si Tikikus; sada kalak bai ndènè èn nai ngo ia janah kettoken. Ikekelengi kami ngo ia. Bagahenken kalak i ngo bai ndènè karina simasa i bekkasku èn.

¹⁰Rebbak dekket aku ngo i kurungen si Aristarkhus. Menenges salam ngo ia taba kènè. Bagidi ma dekket si Markus bebberrè si Barnabas (Enggo kin ibagahken berita asa ijalo kènè ia, mula roh ia mendahi kènè).

¹¹Bagi ma dekket salam si Jesus simergerar Justus. Pellin kalak i sitellu nai ngo kessa denganku kalak Jahudi sipercaya bai Tuhan Jesus, denganku mengula ulaan bai Dèbata nai. Pengurupi tuhu-tuhu ngo kalak i bangku.

¹²Menenges salam ma ngo taba kènè si Epapras, anak kuta ndènè èn ngo ia. Naposo Jesus Kristus ngo ia janah dak tong menodipken kènè, asa hot kènè ntegguh merukur ninganna tetap menguèi Dèbata.

¹³Aku sendiri ngo saksina tersèngèt pengkelejakenna mengkepkep kènè, bagi ma dekket mengkepkep kalak Laodikia bak Hierapolis.

¹⁴Dokter Lukas nikekellengen i bang si Demas pè, menenges salam ma ngo bai ndènè.

¹⁵Pessoh kènè salam nami taba dengan Kristen i Laodikia; bagi ma taba si Nimpa dekket taba kuria silot i bagesna.

¹⁶Enggo kessa ijakaken surat èn i tengah-tengah ndènè, ijakaken ma mo bang i kuria Laodikia. Bagi ma mo asa ijakaken kènè isèn surat si nitenges arap Laodikia bai ndènè.

¹⁷Bagahken bai si Arkhipus, “Pul ibaing ulaan siniberrèken bana lako mengkebasi Tuhan i.”

¹⁸Salam bangku nai si Paulus. Aku sendiri ngo mennuratken èn. Ulang lupa kènè bangku si ni bagasen kurungen. Dak idengani masèh atè Dèbata mo kènè. Tabe nami, Paulus