Read Batak Dairi Josua 1 Bible Online

Josua 1 - Batak Dairi bible

Josua 1

¹Enggo kessa matè si Musa, naposo JAHOWA idi, mengerana mo JAHOWA mbang wakil si Musa, imo si Josua dukak si Nun.

²Nina JAHOWA mo, “Enggo matè naposongKu si Musa. Asa bagèndari pè selloh mo kono dekket karina bangsa Israel kebbas lako meneberangi Laè Jordan, janah memengketti nagerri siKuberèken bai kalak i.

³Enggo Kudokken taba si Musa magahken gennep ladang siniagahen ndènè enggo Kuberèken bai ndènè, bai si Josua dekket bai karina bangsangKu.

⁴Kènter mo ladang ndènè kan padang gurun selatan nai sakat mi Delleng-delleng sini Libanon i Utara dekket i Laè Efrat simbelgah i kebincaren nai termasuk nagerri bangsa Het sakat mi Laut Tengah i kesunduten.

⁵Sada kalak poda tellap lako menaluken kono, alè Josua, sidekkah nggelluhmu. Kumerna i dak Kudengani ngo kono bagè pendenganingKu bai si Musa arnia. Oda ngo Kutadingken kono.

⁶Kennah tok ngo kono, janah berrani, kumerna kono nola mo menguluken bangsa ènda tikan lako mengiani nagerri siKuperbagah taba empung kalak i.

⁷Pellin èn, naing mo nemmuken tuhu-tuhu kono tok janah berrani. Kennah dak jagaenmu asa dak tong kono menguèi nasa hukum siniberèken si Musa naposongKu idi taba kono, cituk pè ulang lembèken, nai sampit mo kono.

⁸Kennah dak tong jakaken Bukku Patiin idi bai bangsangKu. Guruken mo bukku i mahar ari berngin, asa dak tong iulaken kono karina sitersurat ibagesenna. Mula iulaken kono karinana idi, nduma mo nggelluhmu janah menampit.

⁹Èngèt mo, enggo Kuperèntahken bamu asa mertuhu-tuhu kono tok janah berrani! Ulang kono mbiar barang ndatdat, kumerna Aku JAHOWA Dèbatamu dak mendengani kono barang mikè sambing kono laus.”

¹⁰Nai ipèrèntahken si Josua mo taba pe- ngulu-pengulu kalak Israel

¹¹asa merkuliling i karina perundung-undungen bangsa Israel janah pesakatken perèntah ènda, “Hantari kènè bekkel, kumerna tellu ari nai kennah suberrangen ndènè mo Laè Jordan lako me- ngiani nagerri siniberèken JAHOWA Dèbata ndènè bai ndènè.”

¹²Idokken si Josua mo taba marga Ruben, marga Gad dekket sitengah marga Manasye,

¹³“Èngèt! Enggo idokken si Musa naposo JAHOWA idi taba kènè ukum tanoh kettan ke- bincaren Laè Jordan ènda iberèken JAHOWA Dèbata ndènè ngo taba kènè gabè nagerri ndènè.

¹⁴Karina dukak bak sinibages dekket pinakan ndènè ndorok ngo tading i sèn, tapi ukum perbabang ndènè kennah kebbas mergeraha janah mengelebbèi kalak Israel sidèbanna meneberangi Laè Jordan. Kennah urupi kènè kalak i.

¹⁵Sampè itaban kalak idi tanoh kettan kesunduten Laè Jordan ènda siniberèken JAHOWA Dèbata ndènè bai kalak i. Enggo kessa iberèken JAHOWA kemenaken bai karinana bangsa Israel, nai ipè asa ndorok kènè balik mi tanoh ndènè sendiri kettan kebincaren Jordan ènda, siniberèken si Musa naposo JAHOWA idi bai ndènè.”

¹⁶Nai ialoi marga Ruben, Gad, dekket sitengah marga Manasye i mo, “Barang kadè sambing iperèntahken kènè taba kami, kuulaken kami ngo, janah pak dikè sambing pè ipasulak kono kami laus, berkat ngo kami.

¹⁷Tunduk ngo kami bamu, tosè bagè pertunduk nami bai si Musa. Dak idengani JAHOWA Dèbatamu mo kono bagè pendenganiNa taba si Musa!

¹⁸Barang isè siso nggèut tunduk mi kuasamu, barang oda menguèi perèntahmu, ihukum matè mo i. Kennah tok kono janah berrani!”