Read Batak Dairi Josua 10 Bible Online

Josua 10 - Batak Dairi bible

Josua 10

¹Idengkoh si Adoni-Zedek, raja Jerusalem mo, enggo itaban janah ilala si Josua salpun kuta Ai, bagi bak memunuh rajana bagè sienggo ibaing taba Jeriko dekket rajana. Idengkoh ma ngo ukum kalak Gibeon enggo maing padan peralè-alèen dekket kalak Israel janah merian rebbak dekket kalak i.

²Buradan kalohon mo pengisi Jerusalem, kumarna kuta mbellen ngo Gibeon; dos belgahna dekket kuta-kuta silot rajana, lampo dèng belgahen daripada Ai. Kalakna pè lubalang-lubalang janah pandè mergeraha ngo.

³Kumarna i ipasulak si Adoni-Zedek mo jelma mendahi Raja Hoham i Hebron, Raja Piream i Jarmut, Raja Jafia i Lakhis, dekket Raja Dabir i Eglon, ninganna merembah tennah bagèen,

⁴“Roh mo kènè mengurupi aku menjuhap Gibeon, kumerna enggo memaing perpadanen peralè-alèen kalak i dekket si Josua bak kalak Israel.”

⁵Nai gabè rebbakken mo raja Amori silima idi, imo raja Jerusalem, Hebron, Jarmut, Lakhis dekket Eglon, ninganna rasken dekket karina soridadu kalak i, ikubu janah ijuhap kalak i mo Gibeon.

⁶Ipasulak kalak Gibeon mo memagahken berita idi taba si Josua i perundung-undungen Gilgal, “Ulang belli pellin kami, Tuan nami! Roh mo kènè ndor mengurupi kami, kumarna enggo mersada taki karina soridadu raja Amori sinipispis delleng lako mengalo kami!”

⁷Nai berkat mo si Josua rasken karina soridaduna bagi dekket bala pergunggungna simahantu-mahantuna i Gilgal nai lako mergeraha.

⁸Idokken JAHOWA mo mbang si Josua, “Ulang ko mbiar midah kalak i. Enggo Kuberèken bamu kemenangen, kumarna i sada kalak poda kalak idi tahan mengalo ko.”

⁹Suntuk bernginkenna i merdalan ngo si Josua dekket bala pergunggungna i Gilgal nai mi Gibeon, nai sintempu mo ijuhap kalak Amori i.

¹⁰Gontar mo kalak Amori i ibakin JAHOWA idah kalak i kessa soridadu Israel. Mèduk mo kalak Amori ibunuh i Gibeon, janah singgelluhna dèng pè ijalang mo mengencuah i pispis delleng i Bet-Horon sakat mi Azeka dekket mi Makeda i selatan.

¹¹Sinderrang mengencuah i pispis delleng i kalak Amori mperrus kumarna mbiarna midah soridadu Israel i, nai idabuh JAHOWA mo baho mbelgah-mbelgah kalohon i langit nai taba kalak i sidekkah i dalan soh mi Azeka. Nterremmen dèng ngo matè itinggang baho i daripada sinibunuh kalak Israel.

¹²Arinkenna i tikanna iberèken JAHOWA kemenangen bai kalak Israel meraloken kalak Amori, mengerana mo si Josua mbang JAHOWA. I hadeppen kalak Israel i nina si Josua mo, “Ialè Mataniari! Mentadi mo ko i babo Gibeon. Janah ko alè bulan! Ulang mo ko mèrèt i babo lembeng Ayalon nai.”

¹³Nai kom mo mataniari dekket bulan, oda mèrèt mèma italuken kalak Israel karina musuh-musuhna. Tersurat ngo simasa idi ibas bukku Jasar. Sidari ntip mo mataniari i kom i langit, janah ndekkah kalohon asa sundut.

¹⁴Oda nung dèng masa janah oda nèngè mo masa sada ari bagè ari i, magahken iuèi JAHOWA sinipergeddo jelma. JAHOWA ngo mergeraha mendengani Israel!

¹⁵Enggo kessa pul geraha idi, balik mo si Josua rasken soridaduna mi perundung-undungen i Gilgal.

¹⁶Tapi maluah ngo karina raja Amori i janah ciboni ibas sada liang i Makeda.

¹⁷Lot mo kalak mengidah kalak i janah memagahken bekkas percibonien kalak i bai si Josua.

¹⁸“Goling mo batu-batu mbellen mi babah liang i, janah bakin mo pertaram isidi,” nina si Josua,

¹⁹“tapi ulang kènè kom i sidi. Letlet mo pukpuk, janah juhap mo kalak i i podi nai; ulang padiat kalak i mbengket mi kutana gennep! Enggo iberèken JAHOWA Dèbata ndènè kemenangen taba kènè meraloken kalak i.”

²⁰Ibunuh si Josua dekket kalak Israel mo kalak Amori, tapi lot ma ngo kalak i mperrus mi kutana, menulusi percibonien, gabè oda saut terbunuh.

²¹Kessa i balik mo karina soridadu si Josua ibagasen kinijuah mendahi si Josua i perundung-undungen Makeda. Sada kalak poda lot pang i nagerri mendokken barang bakunè lako mengalo kalak Israel.

²²Enggo kessa bagi nina si Josua mo, “Bagèndari buka kènè mo babah liang i janah embah kè mi sèn limana raja idi.”

²³Ibuka mo liang idi, nai iiring mo mi ruar raja-raja Jerusalem, Hebron, Jarmut, Lakhis dekket Eglon,

²⁴janah iembah mendahi si Josua. Nai itenggoi si Josua mo karina kalak Israel mertumpu, nai idokken mo karina lubalang si dekket mergeraha dekketsa roh lako mendedoh kerahong raja-raja i. Merrohen mo lubalang i mendedohi kerahong raja-raja idi.

²⁵Kessa i, nina si Josua mo mbang lubalang-lubalang i, “Ulang kènè rembekbekken janah ulang mbiar. Kennah ngo kènè tok janah berrani, kumerna bagidi ngo cara pemaing JAHOWA meradepken karinana musuh ndènè.”

²⁶Nai ibunuh si Josua mo raja-raja idi janah menggantung kalak i ibas lima tihang. Ibelli ngo bangkè kalak i i sidi soh ciboen.

²⁷Tikan sundut mataniari, iperèntahken si Josua mo asa ipesampur bangkè-bangkè idi nai iambongken mo mi bagasen liang sinipakkè raja-raja idi kin mahan bekkasna ciboni. Nai ibakin mo batu-batu mbellen idi mi babah liang i. I sidi dèng ngono tong batu-batu idi soh bagèndari.

²⁸Tupung sidari ijuhap si Josua mo Makeda, janah menaluken kuta idi bak rajana. Karina pengisi kuta idi ibunuh; sada kalak poda ibelli nggelluh. Ibakin si Josua ngo taba raja Makeda tosè bagè pemakinna taba raja Jeriko.

²⁹Kessa i, ipuspusken si Josua dekket soridaduna mo i Makeda nai mi Libna janah menjuhap Libna.

³⁰Iberèken JAHOWA ma ngo tong kemenangen bai kalak Israel meradepken kuta èn dekket rajana. Sada kalak poda ibelli nggelluh; karina jelma sinikuta i ibunuh. Ibakin si Josua ngo taba raja kuta i bagè pemakinna taba raja Jeriko.

³¹Nai ipuspusken si Josua dekket soridaduna nola ma mo i Libna nai mi Lakhis. Ikubu kalak i mo kuta i, nai ijuhap mo.

³²Iberèken JAHOWA ngo kemenangen bai kalak Israel meraloken Lakhis iperjuhapen ari peduaken. Bakunè ibakin kalak idi i Libna, bagi ma ngo ibakin kalak i i Lakhis; sada kalak poda ibelli nggelluh, karinana ngo ibunuh.

³³Roh ngo si Horam, raja Gezer mengurupi Lakhis, tapi italuken si Josua ngo ia bak soridaduna; sada kalak poda lot tading, karinana ngo matè.

³⁴Kessa idi nola ipuspusken si Josua dekket soridaduna ma mo i Lakhis nai mi Eglon, nai ikubu janah ijuhap mo kuta i.

³⁵Sidarinkenna i ma ngo itaban kalak i kuta Eglon, janah memunuh karina kalak sini sidi bagè sinibakin kalak i i Lakhis.

³⁶I Eglon nai, inangkengi si Josua bak soridaduna mo delleng mi kuta Hebron, lako menjuhap

³⁷janah menaban kuta i. Ibunuh mo rajana dekket karina jelma sinikuta i dekket i kuta-kuta sidèban i sikuliling i sidi. Irabbatken si Josua mo karina kuta i bagè pemakinna taba kuta Eglon. Sada kalak poda ibelli nggelluh i sidi.

³⁸Enggo kessa i balik mo si Josua dekket soridaduna janah menjuhap Debir.

³⁹Itaban si Josua mo kuta i dekket rajana bagi dekket karina kuta sidèbanna silot i sikulilingna. Karina jelma sini sidi ibunuh. Ibakin si Josua ngo taba kuta Debir dekket bai rajana bagè pemakinna taba kuta Hebron dekket Libna bak rajana.

⁴⁰Karina nagerri idi ipepatu si Josua. Italuken ngo raja-raja silot kettan delleng, i pispis uruk-uruk kan kebincaren, sinipispis delleng tan kesunduten dekket jampalen sikan selatan. Sada kalak poda ibelli nggelluh; karina ngo ibunuh. Rembang ngo idi mi perèntah JAHOWA Dèbata Israel.

⁴¹Italuken si Josua ngo ladang mulai i Kades Barnea nai kan selatan soh mi Gaza njolmit mi biding laut, termasuk karina ladang Gosyen sakat mi Gibeon i Utara.

⁴²Pellin ipas sikali mergeraha, italuken si Josua mo karina raja-raja idi janah menaban karina jahjahen kalak idi, kumerna JAHOWA, Dèbata Israel ngo, mergeraha lako bai kalak Israel.

⁴³Enggo kessa i, balik mo si Josua dekket soridaduna mi perundung-undungenna i Gilgal.