Read Batak Dairi Josua 11 Bible Online

Josua 11 - Batak Dairi bible

Josua 11

¹Idengkoh Raja Jabin i Hazor nai kessa mo tersèngèt kemenangen-kemenangen Israel, ipasulak mo pasulakkenna mendahi raja Jobab i kuta Madon nai, mendahi raja-raja kuta Simron dekket Akhsaf,

²mendahi raja-raja sini delleng kan utara, i lembeng Jordan kan Selatan Galilea, i ladang si kan pispis delleng, dekket i ladang sinibiding laut i gembar Dor.

³Ipasulak ma ngo jelma mendahi kalak Kanaan i kesunduten dekket kebincaren Jordan, mendahi kalak Amori, Het, Feris, dekket kalak Jebus sikettan delleng bang kalak Hewi i pispis delleng Hermon i aur Mispa.

⁴Nai merrohen mo raja i bak karina soridaduna nterrem kalohon bagè kersik sinibiding laut. Mbuè kalohon ngo kuda bak kurèta perang kalak i.

⁵Rebbakken mo karina raja-raja i roh janah mermarkas i gembar anak Laè Merom lako mengalo Israel.

⁶Idokken JAHOWA mo mbang si Josua, “Ulang ko mbiar midah kalak i. Tupung bagèen ari baremben, enggo Kubunuh kalak i karina kumernaken Israel. Kennah merlapaten poda kuda kalak i bakinenmu, janah kennah lekkupenmu kurèta-kurèta perang kalak i.”

⁷Nai sintempu mo ijuhap si Josua bak karina soridaduna musuh idi siso e`dep kalak i i gembar anak laè Merom.

⁸Janah mennang mo ibakin JAHOWA bangsa Israel meraloken kalak i. Ijuhap janah iletlet kalak Israel mo kalak i soh mi Misrefot-Maim dekket Sidon i utara, dekket soh mi lembeng Mispa kettan kebincaren daohna. Terrus ngo sebbu geraha idi soh sada kalak nèngè poda lot tading ibas musuh i nai — karinana ngo matè.

⁹Ibakin si Josua ngo taba kalak i rembang mi sienggo iperèntahken JAHOWA: ibunuh mo kuda kalak i, janah ilekkup kurèta-kurèta perang kalak i.

¹⁰Enggo kessa i balik mo si Josua, nai itaban mo Hazor, imo simergegohna tikala i ipas karina kerajaen silot i sidi. Ilekkup mo kuta i, bang raja bak karina pengisina kerri ibunuh; sada kalak poda ibelli nggelluh.

¹²Karinana kuta idi itaban si Josua, janah raja-rajana itangkup janah ibunuh rembang bagè pendokken si Musa, naposo JAHOWA idi.

¹³Tapi nasa kuta sinipajek i babo uruk-uruk janah sienggo irumpakken kin sada poda ilekkup kalak Israel, laènken Hazor sinilekkup si Josua sendiri.

¹⁴Karina pengisi kuta idi ibunuh; sada kalak poda ibelli nggelluh. Tapi karina ugas-ugasen simaharga dekket pinakanna ibuati kalak Israel gabè milik kalak i.

¹⁵Karina sinidokken JAHOWA mbang si Musa, naposoNa i, enggo kin ibagahken si Musa mbang si Josua, janah enggo ibahanken si Josua, sada poda mak ibahanken.

¹⁶Itaban si Josua mo karina nagerri idi ladang sitan delleng — sinipispis delleng, bang sikan utara bang pè sikettan selatan; bak karina aur Gosen dekket ladang gurun pasir sikan Selatan Gosyen, dekket Lembeng Jordan.

¹⁷Bellang tanoh i mulai i Delleng Gundul nai sikan Selatan i gembar Edom, soh mi utara soh mi Baal-Gad i Lembeng Libanon kan selatan Delleng Hebron. Ndekkah kalohon ngo si Josua mergeraha dekket raja-raja siniladang i, tapi dungna itangkup janah ibunuh ngo karina kalak i.

¹⁹Ibas karina kuta-kuta sinisuberri ladang i, sada kuta poda lot maing perpadanen peralè-alèenken dekket Israel, laènken Gibeon kuta bangsa Hewi. Karina kuta sidèbanna idi italuken ngo tupung geraha.

²⁰Ibakin JAHOWA ngo jèngèng perukuren kalak i lako mergeraha dekket kalak Israel, asa ipetumpat kalak i karina, janah ibunuh karina oda lot ampunen rembang bagè perèntah JAHOWA mbang si Musa.

²¹Tupung katika idi ma laus ngo si Josua menumpatken bangsa Enak, imo bangsa ntuara simerian i aur kan uruk — i Hebron, Debir, Anab, dekket i karina ladang i uruk Juda dekket Israel. Karina ngo kalak i ibunuh si Josua janah igeppui ngo karina kuta kalak i.

²²Sada kalak poda lot bangsa Enak i tading i ladang Israel, pellin i Gaza, Gad dekket Asdod nai ngo kessa lot.

²³Karina nagerri idi itaban si Josua rembang bagè perèntah JAHOWA mbang si Musa, nai iberèken mo taba bangsa Israel gabè milik kalak i. Ipella-pellaken mo nagerri i mi gennep marga sada perbagien. Mentadi mo bangsa Israel mergeraha janah menak mo nagerrina i.