Read Batak Dairi Josua 12 Bible Online

Josua 12 - Batak Dairi bible

Josua 12

¹Aur sikan kebincaren Jordan, mulai i napa Laè Arnon nai menangkeng soh mi napa Jordan arur Delleng Hermon kan utara, enggo itaban janah iiani kalak Israel. Lot ngo dua raja italuken kalak i.

²Sada kalak mergerar si Sihon, Raja Amori merbekkas i Hesybon. Aur jahjahenna imo sitengah ladang Gilead: mulai i Aroër nai (i biding kendet Arnon) dekket kuta sinitengah-tengah kendet i, soh mi Laè Jabok i perbalengen ladang bangsa Amon;

³bagi ma karina aur kendet Jordan kan kebincaren, i tao Galilea nai mi Selatan soh mi Bet-Jesimot (kan kebincaren Laut Matè), soh mi pispis Delleng Pisga.

⁴Raja sidèban sinitaluken kalak Israel imo raja Og i nagerri Basan nai, simerbekkas i Asytarot dekket Edrei. Ia mo sada kalak sitading dèng ipas bangsa Refaim nai.

⁵Aur sinirajaenna imo karina Delleng Hermon, Salkha, dekket karina Basan soh arur mi ladang Gesur dekket Maakha; bagi ma sitengah ladang Gilead arur soh mi ladang sinirajaen Raja Sihon i kuta Hesybon.

⁶Idi mo duana raja sinitaluken si Musa rasken dekket bangsa Israel. Tanoh raja-raja idi iberèken si Musa, naposo JAHOWA i, bai marga Ruben, Gad dekket sitengah marga Manasye, gabè tanoh milik kalak i.

⁷Raja-raja sinitaluken si Josua rasken dekket bangsa Israel imo karina raja-raja aur kan kesunduten Laè Jordan, mulai i Baal-Gad sini lembeng Libanon nai terrus soh mi Uruk-uruk Gundul sikan Selatan i gembar Edom. Ipella-pellaken si Josua mo aur i bai marga-marga bangsa Israel lako gabè tanoh milik kalak i.

⁸Ladang idi imo karina aur uruk-uruk, ladang pispis delleng kan kesunduten, Lembeng Jordan dekket ladang pispis urukna, rebè-rebèen sikan kebincaren, dekket padang gurun kettan selatan. Ukum ladang idi imo bekkas siniianen bangsa Het, Amori, Kanaan, Feris, Hewi dekket Jebus kin.

⁹Raja-raja sinitalukenna idi karina, buèna tellupuluh sada kalak; imo raja-raja ibas kuta ènda nai: Jeriko, Ai (i gembar Betel), Jerusalem, Hebron, Jarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hazor, Simron-Meron, Akhsaf, Taanakh, Megido, Kedes, Jokneam (i Karmel), Dor (i biding laut), Goyim (i Galilea) dekket Tirza.