Read Batak Dairi Josua 13 Bible Online

Josua 13 - Batak Dairi bible

Josua 13

¹Bagèndari enggo mo tua-tua kalohon si Josua. Idokken JAHOWA mo mbang si Josua, “Enggo tua-tua ko, Josua! Tapi mèduk dèng ngo ladang sikennah tabanen:

²imo karinana tanoh kalak Palistin dekket Gesur,

³dekket karina tanoh Awi mi arah selatan. (Tanoh i Laè Sikhor nai i perbalengen Mesir soh mi perbalengen Ekron kettan utara, karinana idi terkira tanoh bangsa Kanaan; janah raja-raja Palistin merian i Gaza, Asdod, Askelon, Gat dekket Ekron.)

⁴Bagi ma kennah ngo itaban: karina tanoh Kanaan dekket Meara (milik bangsa Sidon), soh mi Afek i perbalengen tanoh bangsa Amori, nai nola dèng ma tanoh bangsa Gebal,

⁵dekket karina tanoh Libanon mi arah kebincaren, i Baal Gad nai kan Selatan Delleng Hermon, terrus soh mi dalan menuju Hamat.

⁶Bagi ma dekket karina tanoh kalak Sidon, simerian i tanoh kan uruk i kellang-kellang delleng Libanon dekket Misrefot-Maim.” “Karina bangsa idi kennah pellausen ngo sikali èn, sinderrang ijuhap bangsa Israel kalak idi,” nina JAHOWA dèng ma mbang si Josua. “Kennah pellaken tanoh i bai bangsa Israel gabè tanoh milik kalak i, bagè sienggo Kuperèntahken bamu.

⁷Asa, bagèndari pè pella-pellaken mo tanoh idi bai sisibah marga ibas bangsa Israel, dekket bai sitengah nai marga Manasye, asa gabè milik kalak i tanoh idi.”

⁸Marga Ruben dekket Gad bak sitengah marga Manasye enggo menjalo tanoh perbagianen bai si Musa nai, naposo JAHOWA idi; imo tanoh sikan kebincaren Laè Jordan.

⁹Jahjahen kalak idi imo karina Aroër (i biding napa Laè Arnon), dekket kuta sinitengah-tengah napa i. Bagima karina tanoh ndastar i Medeba nai sakat mi Dibon

¹⁰janah soh mi perbalengen tanoh Amon, termasuk karina kuta sienggo nung irajai si Sihon, raja Amori, simerbekkas i Hesybon.

¹¹Bagi ma dekket tanoh Gilead, tanoh sikuliling Gesur dekket Maakha, bak karina Delleng Hermon, dekket karina aur Basan soh mi Salkha.

¹²Ai aur kalak i pè aur sinirajaen Raja Og, kalak Refaim perpodi mengerajai i Asytarot dekket i Edrei. Enggo kin ngo italuken si Musa bangsa-bangsa idi janah pelausken kalak i karuar i tanoh kalak idi nai.

¹³Tapi ukum pengisi Gesur dekket Maakha oda ngo ipelaus kalak Israel; tong dèng ngo kalak idi merian i Israel.

¹⁴Marga Lewi oda ngo terolih perbagianen tanoh bai si Musa nai, kumerna enggo idokken JAHOWA mbang si Musa ukum sulang marga Lewi, imo ibas pèlèen sinitutung i langgaten JAHOWA lako bai Dèbata Israel nai ngo.

¹⁵Dèba ipas tanoh sienggo iperbagah JAHOWA idi nai bai bangsa Israel i enggo ibe- rèken si Musa bai perjabu-jabu marga Ruben, lako gabè tanoh milik kalak i.

¹⁶Tanoh kalak i imo karina Aroër (i biding lembeng Laè Arnon) dekket kuta sinitengah-tengah lembeng i soh mi karina uruk ndastar silot i Medeba;

¹⁷bang Hesybon dekket karina kuta silot i uruk ndastar idi, imo: Dibon, Bamot-Baal, Bet-Baal-Meon,

¹⁸Jahas, Kedemot, Mefaat,

¹⁹Kiryataim, Sibma, Zeret-Hasahar silot i babo uruk i lembeng idi.

²⁰Bet-Peor, pispis delleng Pisga, dekket Bet-Jesimot.

²¹Nai dekket dèng ma ngo karina kuta siniuruk ndastar idi dekket karina aur sinirajaen si Sihon, raja bangsa Amori, simerian arnia i Hesybon. Ia dekket pengulu-pengulu Midian pè, imo: si Ewi, si Rekem, si Zur, si Hur dekket si Reba, enggo italuken si Musa. Karina pengulu i enggo kin nung mengerajai nagerri idi ibaing raja Sihon.

²²Ipas kalak sinibunuh bangsa Israel i, dekket ngo si Bileam anak si Beor, pengeramal i.

²³Laè Jordan mo sikira baleng tanoh marga Ruben kettan kesunduten. Idi mo karina kuta dekket sosor iberèken bai mersisimpangaen marga Ruben lako gabè tanoh milik kalak i.

²⁴Dèba ipas tanoh siniperbagah JAHOWA bai bangsa Israel i nai enggo ma ngo iberèken si Musa bai merhorong-horong marga Gad, lako mahan milik kalak i.

²⁵Tanoh kalak idi imo Jaezer dekket karina kuta i Gilead bak sitengah ibas ladang bangsa Amon nai soh mi Aroër kan kebincaren Raba;

²⁶tanoh kettan Hesybon soh mi Ramat-Mizpa dekket Betonim, bagi dekket ladang sikettan Mahanaim soh mi perbalengen Lodebar, karinana idi termasuk ma gabè tanoh marga Gad.

²⁷I lembeng Jordan, tanoh marga Gad idi karina Bet-Haram, Bet-Nimra, Sukot, dekket Zafon, imo dèba ladang sinirajaen Raja Sihon i Hesybon. Perbalengen kettan kesunduten tanoh marga Gad idi imo Laè Jordan soh mi tao Galilea kettan utara.

²⁸Idi mo kuta dekket sosor iberèken bai gennep jabu marga Gad lako gabè tanoh milik kalak i.

²⁹Dèba ibas tanoh siniperbagah JAHOWA bai bangsa Israel idi enggo iberèken si Musa bai pejabu-jabu sitengah marga i Manasye nai lako mahan milik kalak i.

³⁰Perbalengen tanoh kalak idi soh ngo mi Mahanaim, termasuk karina Basan imo karina tanoh sinirajaen si Og, raja Basan — bagi ma dekket sosor si ennempuluh silot i Jair dekket Basan.

³¹Bagi dèng ma dekket ngo sitengah tanoh Gilead, bak Asytarot dekket Edrei, imo duana kuta èkuten i tanoh sinirajaen Raja Og i Basan. Karina ngo ladang i iberèken bai sitengah pemparen si Makhir dukak si Manasye.

³²Bagidi mo cara si Musa memella tanoh sikettan kebincaren Jeriko, i kèpar Laè Jordan, sinderrangna merian ia i lembeng Moab.

³³Tapi ukum marga Lewi cituk poda terolih tanoh bai si Musa nai. Idokken si Musa taba kalak i ukum bagian siberèenken bai kalak idi imo ibas pèlèen-pèlèen sinipèlèken bai JAHOWA Dèbata Israel nai.