Read Batak Dairi Josua 14 Bible Online

Josua 14 - Batak Dairi bible

Josua 14

¹Enda nola imo simasa tersèngèt bakunè nagerri Kanaan sikan kesunduten Laè Jordan ipella-pellaken i tengah-tengah bangsa Israel. Simemella-mellaken tanoh idi bai bangsa Israel imo: Imam Eleazar, si Josua anak si Nun, dekket huntuen merhorong-horong i gennep marga bangsa Israel nai.

²Bakunè kin sienggo iperèntahken JAHOWA bai si Musa, tanoh sikan kesunduten Laè Jordan sienggo itentuken bai kalak sibah sitengah marga bangsa Israel, kennah ipellaken merkitè loterrè.

³Tanoh sikan kebincaren Laè Jordan enggo iberèken si Musa bai sidua sitengahna marga bangsa sidèbanna idi. (Perlu isuratken i senda ukum pemperen si Josep ibagi dua marga: Marga Manasye dekket marga Efraim.) Tersèngèt bagè marga Lewi, oda lot tanoh iberèken si Musa bai kalak i. Pellin kuta ngo kessa iberèken bai kalak i mahan bekkasna merian, dekket jampalenna mahan bekkas lembu dekket biri-biri kalak i.

⁵Bagidi mo bangsa Israel memella-mella tanoh idi rembang bagè sienggo iperèntahken JAHOWA bai si Musa.

⁶Tikan sidari roh mo kalak i marga Juda nai mendahi si Josua i Gilgal. Sada kalak bai kalak idi nai imo si Kaleb anak si Jefune kalak Kenas, mendokken, “Alè Josua! Ibettoh kono ngo bakunè pendokken JAHOWA mbang si Musa, pasulakken Dèbata idi, i Kades-Barnea tersèngèt kono dekket aku.

⁷Merumur empatpuluh tahun mo aku tikanna ipasulak si Musa, naposo JAHOWA idi, aku i Kades-Barnea nai merkakap lako memerèso nagerri ènda. Janah balik ngo aku mendahisa merkitè merembah berita sènteng.

⁸Kalak silaus rebbak dekket aku, memakin buradan bangsa Israel. Tapi ukum aku dak tong ngo setia menguèi JAHOWA Dèbatangku.

⁹Janah kumerna i, ijandiken si Musa ngo asa tanoh sienggo kuagahi pasti kennah iberèken bangku dekket dukak-dukakku gabè milik nami soh mi amman sumendah.

¹⁰Bagèndari pè enggo mo empatpuluh lima tahun kessa nai idokken JAHOWA idi taba si Musa. Masa idi sinderrangna kadap bangsa Israel i padang gurun janah bagè sienggo iperbagah JAHOWA, enggo ma ngo ijamotken JAHOWA aku asa tong dèng nggelluh soh bagèndari. Bettoh mo, enggo mo merumur aku bagèndari ualuhpuluh lima tahun,

¹¹tapi tong dèng mergegoh bagè sinderrangna ipasulak si Musa aku. Tong dèng ngo lot gegohku lako mergeraha barang mengulaken kadè sambing.

¹²Kumarna i, berèken mo bagèndari tanoh uruk ndastar siniperbagah JAHOWA bangku tikanna balik aku dekket kalak sirebbak dekket aku lako merembah berita. Tikala idi idengkoh kono sendiri ngo, magahken i sidi lot ngo bangsa ntuara sinigeraren bangsa Enak. Merian i kuta-kuta mbellen merpagar ngo kalak i. Iurupi JAHOWA ngo sendah aku, asa gabè ndorok kupelaus kalak i, bagè sinidokken JAHOWA.”

¹³Nai ipasu-pasu si Josua mo si Kaleb anak si Jefune i, nai iberèken mo bana kuta Hebron gabè tanoh milikna.

¹⁴Soh bagèndari tong dèng ngo kuta idi merumangken milik pusakka pinempar si Kaleb anak si Jefune, kalak Kenas idi, kumerna setia ia menguèi taba JAHOWA, Dèbata Israel.

¹⁵Arnia igerari ngo Hebron i kuta Arba. (Arba imo kalak sitermurmurna i tengah-tengah bangsa Enak.) Nai mènak mo nagerri idi kumerna oda nèngè lot gulut ibakin geraha.