Read Batak Dairi Josua 15 Bible Online

Josua 15 - Batak Dairi bible

Josua 15

¹Menjalo bagian mo gennep jabu ibas marga Juda nai tanoh simerbalengken bagè siniterruh ènda: Kettan Selatan, kènter ngo ladang idi soh mi punca kalohon kettan selatan aur gurun pasir Zin i perbalengen dekket Edom;

²mulai i punca selatan Laut Matè nai,

³terrus mi selatan mengèkut-ngèkut pispis delleng i Akrabim, soh mi Zin. Merudut memellus selatan Kades-Barnea, terrus arap Hezron, menangkeng mi Adar, nai merèluk mi arah Karka.

⁴I sidi nai terrus nola mi Azmon, nai mengèkut-ngèkut anak laè perbalengen Mesir, kessa i merpunca mo i Laut Tengah. Bagidi mo garis perbalengen kettan Selatan tanoh marga Juda. Janah garis perbalengen idi mo sikira garis perbalengen mi kettan selatan karina nagerri Israel.

⁵Kettan kebincaren, Laut Matè mo balengna, terrus mi utara soh mi pertumbuken Laè Jordan. I utara, balengna mulai i pertumbuken Laè Jordan nai,

⁶menangkeng mi Bet-Hogla, nai terrus mi baleng napa Jordan. I sidi nai menangkeng mo perbalengen idi mi utara sakat mi Batu Bohan (Bohan imo anak si Ruben),

⁷nai terrus mi Lembeng Kesusahen soh mi Debir, nai merèluk nola mi utara mi arah Gilgal i bekkas pehadep dekket pispis delleng i Adumim kettan selatan lembeng idi. I sidi nai terrus mo mi takal laè En-Semes, nai mi En-Rogel,

⁸nai nola menangkeng mengelausi Lembeng Hinom mi selatan uruk, i sidi mo kuta Jerusalem, kuta kalak Jebus. I sidi nai nola perbalengen idi menghuju mi pucuk uruk idi kettan Selatan Lembeng Hinom, i punca utara Lembeng Refaim,

⁹nai terrus mi takal laè Me-Neftoah, soh mi kuta-kuta sinjolmit mi Delleng Efron. I sidi nai merèluk mo baleng tanoh idi mi Baala (imo Kiryat Jearim),

¹⁰janah mengkulilingi kan kesunduten Baala menghuju uruk Edom, nai terrus mi utara Delleng Jearim (imo Delleng Kesalon), janah susur mi Bet-Semes, nai terrus mi Timna.

¹¹I Timna nai, terrus nola mo garis perbalengen idi menghuju mi utara Delleng Ekron nai merèluk mi Sikron mengelausi Delleng Baala, terrus mi Jabneel, janah merpunca i Laut Tengah,

¹²imo gabè garis perbalengen kettan kesunduten tanoh marga Juda. I ladang idi mo merian horong-horong i marga Juda nai.

¹³Rembang mi perèntah JAHOWA taba si Josua, iberèken mo dèba tanoh Juda bai si Kaleb anak si Jefune i marga Juda nai. Iberèken mo bana Hebron, imo kuta si Arba, bapa si Enak.

¹⁴Pemparen si Enak imo kalak Sesai, Ahiman dekket Talmai. Ipelaus si Kaleb mo kalak i karina i Hebron nai.

¹⁵I sidi nai laus mo ia menjuhap kalak simerian i Debir. (Termurmur ngo arnia kuta idi Kiryat-Sefer).

¹⁶Nina si Kaleb mo, “Barang isè tertabansa Kiryat-Sefer, ndorok mo ia kabin dekket berrungku, si Akhsa.”

¹⁷Si Otniel, dukak dengan sibeltek si Kaleb simergerar si Kenas, menaban kuta idi; nai iberèken si Kaleb mo si Akhsa, berruna i gabè sinibages si Otniel.

¹⁸Tupung ari ambong belagen kalak i, isessak si Otniel mo si Akhsa asa ipido sinterpuk tanoh bai bapana nai. Nai susur mo si Akhsa i kalodèna nai, nai ikusoken si Kaleb mo mbangsa kadè ipergeddo ukurna.

¹⁹Ialoi si Akhsa mo, “Ipergeddo ukurku ngo barang piga-piga laè mata-mata, kumerna tanoh ngkerrah janah dakkir ngo tanoh siniberèken bapangku idi.” Gabè iberèken si Kaleb mo bana laè mata-mata sikettan julu dekket laè mata-mata sikettan jèhè.

²⁰Enda nola imo tanoh siniberèken bai merhorong-horong i marga Juda lako gabè milik kalak i.

²¹Kuta-kuta sindaohna kalohon kettan selatan, sigabè milik kalak Juda, imo silot i perbalengen Edom, lot ngo duapuluh sibah kuta karinana, enggo dekket sosor silot i sikulilingna. En mo gerar kuta-kuta idi: Kabzeel, Eder, Jagur, Kina, Dimona, Adada, Kedes, Hazor, Jitnan, Zif, Telem, Bealot, Hazor-Hadata, Keriot-Hezron (imo Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain, dekket Rimon.

³³Kuta-kuta dekket sosor i sikulilingna sinipispis delleng lot ngo sipuluh empat kuta karina, imo: Esytaol, Zora, Asna, Zanoah, En-Ganim, Tapuah, Enam, Jarmut, Adulam, Sokho, Azeka, Saaraim, Aditaim, Gedera dekket Gederotaim.

³⁷Bagi ma dekket sisipuluh ennem kuta ènda rasken dekket sosor sikulilingna: Zenan, Hadasa, Migdal-Gad, Dilean, Mizpa, Jokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama dekket Makeda.

⁴²Bagi ma dekket kuta sisibah èn bak sosor-sosor sikulilingna: Libna, Eter, Asan, Jiftah, Asna, Nezib, Kehila, Akhzib dekket Maresa.

⁴⁵Bagi ma Ekron dekket kuta kèdèk bak sosorna,

⁴⁶bagi dekket karina kuta-kuta dekket sosor-sosor sinigembar Asdod, i Ekron nai soh mi Laut Tengah.

⁴⁷Bagi ma Asdod dekket Gaza bak kuta-kuta kèdèk bak sosor-sosorna simersèrak soh mi gembar anak laè i perbalengen Mesir dekket biding Laut Tengah.

⁴⁸I tanoh kettan delleng lot ma ngo sipuluh sada kuta rasken bak sosor-sosor silot i sikulilingna imo: Samir, Jatir, Sokho, Dana, Kiryat-Sana (imo Debir), Anab, Estemoa, Anim, Gosyen, Holon, dekket Gilon.

⁵²Bagi ma sisibah kuta ènda, rasken bak sosor-sosor i sikulilingna imo: Arab, Duma, Esan, Janum, Bet-Tapuah, Afeka, Humta, Kiryat-Arba (imo Hebron) dekket Zior.

⁵⁵Bagi ma sisipuluh kuta ènda rasken bak sosor silot i sikulilingna imo: Maon, Karmel, Zif, Juta, Jizreel, Jokdeam, Zanoah, Kain, Gibea dekket Timna.

⁵⁸Dekket siennem kuta ènda nola dèng ma rasken sosor-sosor silot i sikulilingna imo Halhul, Bet-Zur, Gedor, Maarat, Bet-Anot dekket Eltekon.

⁶⁰Bagi ma sidua kuta ènda rasken bak sosor-sosorna silot i sikulilingna imo: Kuta Kiryat-Baal (Imo Kiryat-Jearim) dekket kuta Raba.

⁶¹I tanoh kettan gurun pasir, lot ngo ennem kuta rasken bak sosor-sosor i sikulilingna imo: Bet-Araba, Midin, Sekhakha, Nibsan, Kuta Sira dekket En-Gedi.

⁶³Dekket ngo Jerusalem milik kalak Juda, tapi oda terpuar kalak Juda ukum kalak Jebus simerian i sidi. Soh bagèndari tong dèng ngo rebbak kalak Jebus dekket kalak Juda i kuta i.