Read Batak Dairi Josua 16 Bible Online

Josua 16 - Batak Dairi bible

Josua 16

¹Perbalengen sinituduhken bai pinempar si Josep, mulai i Laè Jordan i gembar Jeriko nai, kettan kebincaren takal laè mi Jeriko sakat mi padang gurun. I Jeriko nai, menangkeng mo baleng idi soh mi Betel i tanoh kettan delleng.

²I Betel nai, terrus mo baleng idi menuju mi Lus, mengelausi Atarot, imo bekkas kalak Arki.

³I sidi nai nola terrus mo baleng idi menuju mi kesunduten mi tanoh kalak Jaflet, soh mi Bet-Horon-Jèhè, soh mi Gezer, nai merpunca mo i Laut Tengah.

⁴Idi mo tanoh siniberèken bai marga Manasye dekket Efraim, pinempar si Josep, gabè mahan tanoh milik kalak i.

⁵Bagènda ngo perbalengen-perbalengen tanoh siniberèken taba horong-horong marga Efraim. Kan kebincaren, perbalengen tanoh kalak idi mulai i Atarot-Adar nai soh mi Bet-Horon-Julu,

⁶nai terrus menuju mi Laut Tengah. Kan Utarana imo Mikhmetat. Kettan kebincarenna, merèluk nola mo perbalengen idi mi Taanat-Silo, nai ibellus mo idi kan kebincaren menuju mi Janoah.

⁷I sidi nai mengencuah mo baleng idi mi Atarot dekket Naharat, nai terrus mo mengèkut-ngèkut Jeriko janah merpunca i Laè Jordan.

⁸Kettan kesunduten, perbalengen Efraim i mulai i Tapuah nai sakat mi anak Laè Kana, nai merpunca mo i Laut Tengah. Idi mo tanoh siniberèken bai gennep jabu ibas marga Efraim, lako gabè milik kalak i,

⁹enggo dekket barang piga-piga kuta kèdèk dekket sosor silot i ladang kalak Manasye.

¹⁰Tapi oda ngo ipelaus marga Efraim kalak Kanaan i tanoh Gezer nai. Kumarna i ngo asa soh bagèndari tong merian i Gezer kalak Kanaan rasken dekket kalak Efraim, tapi ipaksa ngo kalak i mahan bahaen bagè hamba bai kalak Efraim.