Read Batak Dairi Josua 17 Bible Online

Josua 17 - Batak Dairi bible

Josua 17

¹Dèba tanoh si kettan kesunduten Laè Jordan iberèken ngo bai pinempar si Manasye merjabu-jabu, anak situaen si Josep, imo si Makhir, bapa si Gilead, ia mo anak si tuaen si Manasye. Kumarna sada kalak lubalang ngo ia, gabè iberèken mo tabasa tanoh Gilead deket Basan si kettan kebincaren Laè Jordan.

²Tanoh si kettan kesunduten Laè Jordan iberèken bai horong sidèbanna ibas pinempar si Manasye nai, imo horong: Si Abiezer, Helek, Asriel, Sekhem, Hefer dekket Semida; karina idi anak daholi pemparen tarap si Manasye anak si Josep nai. Kalak idi ngo pengulu-pengulu horong.

³Si Zelafehad, dukak si Hefer, kempu si Gilead (si Gilead imo dukak si Makhir, kempu si Manasye), oda lot dukakna daholi, pellin berruna ngo kessa lot, imo si Makhla, Noa, Hogla, Milka, Tirza.

⁴Laus mo kalak i mendahi Imam Eleazar, mendahi si Josua anak si Nun bagi mendahi karina èkuten, janah mendokken, “Idokken JAHOWA ngo bai si Musa asa kami pè kennah rasken terolih tanoh ngo bagè turang-turang nami i.” Kumerna i rembang bagè sinidokken JAHOWA, iberèken mo tanoh bai berru si Zelafehad rasken dekket turang-turangna i.

⁵Asa oda ngo pellin dukak-dukak si Manasye daholi kessa terolih perbagianen tanoh, tapi dekket ngo bang berruna pè. Kumarna i ngo asa iberèken sipuluh perbagien bai marga Manasye laènken tanoh Gilead dekket Basan i kebincaren Laè Jordan. Tanoh Gilead iberèken mo bai pemparen si Manasye sidèbanna.

⁷Perbalengen tanoh marga Manasye mulai i Asyer nai mi Mikhmetat kettan kebincaren Sikhem. I sidi nai nola mengencuah mo baleng idi mi selatan sakat mi tanoh kalak En-Tapuah.

⁸Tanoh Tapuah idi pè alih kalak marga Manasye ngo, tapi kuta Tapuah, siniperbalengen, milik pinempar si Efraim ngo.

⁹Nai terrus mo perbalengen tanoh Manasye idi mengencuah soh mi anak Laè Kana. Ukum kuta-kuta si kettan Selatan anak laè idi kalak Efraim ngo sidasa, tukasi pè idi ibas tanoh Manasye. Siterrusna nola mengèkut-ngèkut anak laè sikan utara mo perbalengen tanoh Manasye i, nai merpunca mo i Laut Tengah.

¹⁰Bagidi mo Efraim merbekkas kettan selatan, janah Manasye kettan utara, janah Laut Tengah mo perbalengen kalak i kettan kesunduten. Kettan Barat Laut, merbaleng ngo tanoh marga Manasye i dekket tanoh kalak Asyer, janah kettan Timur Laut, merbalengken tanoh kalak Isasar.

¹¹Ibas tanoh kalak Isasar dekket kalak Asyer idi lot ngo tanoh kalak Manasye, imo: Bet-Sean dekket Jibleam bak sosor silot i sikulilingna. Bagi ma: Dor (kuta sinibiding laut), En-Dor, Taanakh, Megido dekket sosor i sikulilingna,

¹²Tapi oda terpelaus kalak Manasye ukum pengisi kuta i; kumarna idi ngo asa dak tong merian i sidi kalak Kanaan.

¹³Soh mi podien ari nola pè enggo kessa mergegohen kalak Israel, oda ngo ipelaus kalak i ukum kalak Kanaan; pellin ipaksa ngo kessa kalak i gabè mengula bai kalak i.

¹⁴Nina pemparen si Josep mo taba si Josua, “Kasa pellin sada bagian kessa iberèken tanoh i bai nami, kepèken nterrem kalohon ngo kami, kumerna enggo ipasu-pasu JAHOWA kami?”

¹⁵Ialoi si Josua mo, “Kumerna nterremsu ngo kènè, janah sempitsu ngo tanoh sikuliling delleng-delleng Efraim bai ndènè, laus mo kènè mi ladang kalak Feris dekket Refaim. Pungkah kènè nola mo bekkas rimbaru i tembak-tembak kalak idi.”

¹⁶Ialoi pinempar si Josep idi mo, “Kurang mbellang dèng ngo tanoh sikettan delleng i bai nami, kepèken bangsa Kanaan simerian i sikendet idi lot ngo kurèta perang kalak i ibas bessi nai bang kalak simerian i Bet-Sean bak sosor-sosor sikulilingna, bagi dekket kalak simerian i napa Jizreel.”

¹⁷Nai nina si Josua mo taba marga Efraim dekket Manasye kesunduten idi, “Tuhuna ngo idi, nterrem kalohon janah mergegoh ngo kènè, janah patut ngo berèenken lebih daripada sada perbagianen tanoh.

¹⁸Buat kènè mo tanoh kettan delleng, ai tukasi pè tanoh idi tembak dèng, tertumbuk kènè ngo i janah memiliki karina. Ukum tersèngèt bagè kalak Kanaan idi, terpelaus kènè ngo kalak i, tukasi pè kalak i mergegoh janah lot kurèta perang kalak idi ibas bessi nai.”