Read Batak Dairi Josua 18 Bible Online

Josua 18 - Batak Dairi bible

Josua 18

¹Enggo kessa ipetunduk nagerri sinijandiken JAHOWA, mertumpu mo karina bangsa Israel i Silo, nai ipajek kalak i mo Undung-undung bekkas roh JAHOWA.

²Lot dèng ngo pitu marga nai bangsa Israel siso menjalo perbagien tanoh.

³Nai nina si Josua mo taba bangsa Israel, “Soh ndigan dèng pemaen ndènè, asa laus kènè lako mengiani tanoh siniberèken JAHOWA, Dèbata empung ndènè taba kènè?

⁴Pilih mo tellu kalak i gennep marga nai. Naing kupasulak ngo kalak i lako memerèso karina nagerri èn ninganna menuratken baleng tanoh sinaing imiliki kalak i dok atèna. Enggo kessa i, kennah balik kalak i mendahi aku.

⁵Kennah ipella ngo tanoh idi gabè pitu bagian. Marga Juda hot mo i tanohna sikettan selatan, janah marga Josep i tanohna kan utara.

⁶Kennah ibahan ngo gombaren perbalengen sipitu perbagien tanoh idi, janah iberèken bangku. Kubaing pè sikali èn mertendung lako memettoh barang kadè sinitentuken Dèbata taba kènè.

⁷Pellin marga Lewi ngo kessa oda merolih perbagien tanoh rasken kènè, kumerna bagian kalak idi imo gabè imam-imam lako mengkebasi JAHOWA. Janah tersèngèt marga Gad, Ruben dekket dèba ipas marga Manasye nai, enggo mo ijalo kalak i perbagienna kettan kebincaren Laè Jordan. Enggo iberèken si Musa naposo JAHOWA tanoh i bai kalak i.”

⁸Nai iberèken si Josua mo peddah ènda taba kalak idi, “Laus mo kènè menengen nagerri ènda karinana janah bahan kènè mo gombaren perbalengenna; kessa i balik nola mo kènè mendahi aku. Asa kuundi sikali èn i Silo èn lako memettoh barang kadè sinitentuken JAHOWA bai ndènè.” Enggo kessa ijalo peddah idi bai si Josua nai, laus mo kalak idi lako menengen tanoh idi.

⁹Iagahi kalak idi mo karina nagerri idi ninganna menuratken perbalengen sipitu perbagien tanoh i dekket menuratken karina gerar-gerar kuta silot i bagasenna. Pul kessa i balik mo kalak i mendahi si Josua mi perundung-undungen i Silo.

¹⁰Nai iundi si Josua mo lako memettoh kadè sinitentuken JAHOWA taba kalak i. Enggo kessa bagi ipemberrèken si Josua mo perbagien tanoh mi gennep marga bangsa Israel simakdèng terolih perbagien tanoh.

¹¹Perbagien perlebbè imo tanoh bai mersisimpangaen marga Benjamin. Perbagien kalak idi imo tanoh silot i kellang-kellang marga Juda dekket tanoh marga pinempar si Josep.

¹²Kettan utara, perbalengen tanoh kalak idi mulai i Laè Jordan nai, menangkeng mi tebing kettan utara Jeriko, nai nola mi kesunduten mengelausi tanoh uruk-uruk soh mi gurun Bet-Awen daohna.

¹³Terrus nola mo perbalengen idi mi tebing kettan selatan Lus (sitermurmur mergerar Betel), nai mengencuah mi Atarot-Adar i delleng kettan selatan Bet-Horon-Jèhè.

¹⁴I kesunduten delleng idi nai, baleng tanoh i merèluk mi selatan menuju mi Kiryat-Baal (imo Kiryat-Jearim). Ukum Kiryat Baal milik marga Juda ngo. Imo perbalengen tanoh i kettan kesunduten.

¹⁵Baleng kettan selatan mulai i biding Kiryat-Jearim nai terrus mi takal laè Me-Neftoah,

¹⁶nai mengencuah mi pispis delleng pehadep dekket Lembeng-Hinom i punca utara Lembeng-Refaim. Nai terrus mi Selatan nola mo baleng i arap Lembeng-Hinom kan selatan mengèkut-ngèkut pispis delleng i nagerri Jebus, terrus menuju mi En-Rogel,

¹⁷merlekkuk mi utara mi En-Semes, nai mi Gelilot i kèpar penangkengen Adumim. Enggo kessa idi mengencuah nola mo perbalengen i mi Batu Bohan (si Bohan imo anak si Ruben),

¹⁸nai mengelausi tarap utara tebing-tebing delleng sipehadep dekket Lembeng Jordan, nai mengencuah mo mi lembeng idi,

¹⁹tarap utara tebing delleng Bet-Hogla, janah merpunca kettan utara Laut Matè i muara Laè Jordan. Idi mo perbalengen kettan selatan.

²⁰Laè Jordan i mo perbalengen kettan kebincaren. Bagidi mo perbalengen tanoh siniberèken mi gennep jabu marga Benjamin lako gabè milik kalak i.

²¹Kuta-kuta sinimiliki horong-horong marga Benjamin, lot ngo sipuluh dua kuta karinana rebbak dekket sosor-sosor silot i sikulilingna, imo: Jeriko, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni dekket Geba.

²⁵Bagi ma sisipuluh empat kuta ènda dèng ma rebbak dekket sosor i sikulilingna: Gibeon, Rama, Beerot, Mizpa, Kefira, Moza, Rekem, Jirpeel, Tarala, Zela, Elef, Jebus (imo Jerusalem), Gibea, dekket Kiryat-Jearim. Idi mo tanoh siniberèken bai horong-horong marga Benjamin gabè milik kalak i.