Read Batak Dairi Josua 2 Bible Online

Josua 2 - Batak Dairi bible

Josua 2

¹Nai ipasulak si Josua mo i perundung-undungen Sitim nai, dua kalak mata-mata mi Kanaan. Idokken mo bai kalak i sidua lako memerèso nagerri Kanaan mboni-mboni, tuana kalohon mo kuta Jeriko. Nai laus mo kalak i mi kuta idi, janah mermalam mo kalak idi i bages sada kalak daberru sibabijalang, mergerar si Rahab.

²Idengkoh raja kuta Jeriko mo bertikna lot kalak Israel roh mendatè-datèken ladang Jeriko.

³Nai ipasulak raja i mo orangna mendahi si Rahab lako pesakatken perèntah ènda, “Pedarat mo jelma simermalam i bages idi. Mata-mata ngo kalak i roh lako memerèso karina aur Jeriko!”

⁴“Tuhuna ngo gia lot kalak roh mi Bagesku,” nina si Rahab mengaloi, “tapi oda kubettoh barang i dikè nai kalak i. Enggo laus kalak idi ndai mayak gellap i sinderrang makdèng igerruk pèntu pengkeruhen kuta. Janah oda kukusoken barang mikè kalak i laus, tapi mula ndor kalak i ijalangi, katèngku ndorok dèng ngo i dapet.” (Keppèken enggo ngo iboniken si Rahab duana mata-mata idi i terruh mpulguken nggala i pagu sapona).

⁷Nai berkat mo pasulakken raja i menadingken kuta i. Enggo kessa i ruar kalak i, igerruk mo pèntu pengkeruhen kuta i. Itulusi kalak i mo mata-mata sidua kalak i soh mi bekkas penuberangen i Laè Jordan.

⁸Bernginkenna idi sinderrang madèng meddem duana mata-mata Israel i, laus mo si Rahab mi pagu,

⁹janah mendokken taba kalak i, “Kubettoh ngo enggo iberèken JAHOWA nagerri ènda bai ndènè. Karina ngo kalak sinisèn buradan taba kènè.

¹⁰Enggo ngo kudengkoh kami berita tersèngèt barang bakunè JAHOWA pekerahken Laut Arngo i lebbè ndènè, sinderrang itadingken kènè Mesir. Enggo ma ngo kudengkoh kami barang bakunè kènè memunuh si Sihon dekket si Og, raja bangsa Amori sidua kalak idi kan kebincaren Laè Jordan.

¹¹Kudengkoh kami kessa saringongona idi, gabè buradan kalohon ngo kami. Karina perbabang nami mago keberanienna kumerna kènè. Tuhuna ngo JAHOWA Dèbata ndènè i Dèbata Perkuasa i langit dekket i tanoh èn.

¹²Harap ngo aku uè kènè mersumpah merkitè gerarNa magahken merandal bakinen ndènè taba kadè-kadèngku bagè sienggo kubakin taba kènè. Jandiken kènè mo oda bunuhen ndènè bapangku bak inangku, kaka anggi bak turangku, dekket karina kadè-kadè kalak i, tapi kennah ikelini kènè mo. Janah tersèngèt i berèken mo sada pertanda bangku magahken ndorok kuketoki kènè!”

¹⁴Nai ialoi kalak i sidua mo, “Merpadan mo kami mula barang cidahari pesakaten JAHOWA nagerri èn bai nami, selloh pè kubakin kami taba kènè, asal mo ulang ibagahken kènè barang bai isè pè tersèngèt kami. Kenna sumpah JAHOWA mo kami mula oda i teppati kami jandi i.”

¹⁵Kumerna i gembar parik kuta i ngo ipajek bages si Rahab, nai itontoni si Rahab mo duana kalak i merkitè tinali arap jendèla nai.

¹⁶“Laus mo kènè menuju arah delleng,” nina si Rahab taba kalak i, “Asa ulang ndorok tangkupen kalak pasulakken raja i kènè. Ciboni mo kè i si sidekkah tellu ari soh lebbè molih kalak i, nai pè asa terrusken kènè nola perdalanen ndènè.”

¹⁷Nai nina mata-mata sidua kalak idi mo mbang si Rahab, “Selloh mo tuhu mula bagi. Kuèngèt kami pè jandi sienggo isèngètken kè bai nami i.

¹⁸Kennah bagèen mo bakinemu. Mula kujuhap kami kessa sikali èn nagerri ndènè èn, kennah tapelken tinali mbara enda i babah jendèla bekkas nami itantani kènè èn. Pepulung mo bapamu, inangmu, kaka-anggi bak turangmu, karinana kadè-kadè bapamu i bagesmu enda.

¹⁹Mula lot sada kalak mendarat kalak i ibas bages enda nai, janah matè terbunuh, kesalahenna sendiri ngo maing asa matè ia; oda kami mertanggung jabab ibas simasa i. Tapi mula lot mermara i bagasen sapo enda, kami mo mertanggung jabab.

²⁰Balikna mula ibagahken kènè tersèngèt kami taba tah isè kalak, maluah mo kami ipas jandi sienggo nipidomu bai nami nai.”

²¹Iendekken si Rahab mo i nai ipeberkat mo kalak i laus. Nai itapelken mo tinali mbara idi ipas jendèlana.

²²Nai laus mo mata-mata sidua kalak idi mi delleng janah ciboni i sidi. Tellu ari dekkahna itulusi pasulakken-pasulakken raja i kalak i i suberri aur idi, tapi oda jupa kalak i. Dungna balik mo pasulakken idi mi Jeriko.

²³Nai mengencuah mo sidua kalak mata-mata Israel i i delleng i nai janah isuberrangi mo laè, nai balik mo mendahi si Josua. Isukutken kalak i mo karina sinibellus bak siniakapen kalak i mbangsa.

²⁴Enggo kessa i nina kalak i mo, “Pasti ngo iberèken JAHOWA karinana nagerri idi banta; ai karina ngo kalak i mbiar taba kita.”