Read Batak Dairi Josua 20 Bible Online

Josua 20 - Batak Dairi bible

Josua 20

¹Enggo kessa i ipasulak JAHOWA mo si Josua

²mendokken bagèen taba kalak Israel, “Enggo Kudokken bai si Musa asa ia memagahken taba kènè tersèngèt kuta-kuta perculenggemmen, imo kuta mula mperrus kalak i mi sidi gabè terondingen. Bagèndari pè pilih kènè mo kuta idi.

³Jelma simemunuh sidèban tapi oda inakkati, ndorok ngo mperrus ia mi kuta idi asa maluah bai kalak sinaing muat bèla tabasa.

⁴Ndorok mo ia mperrus mi barang apaina kuta idi, janah laus mi bekkas perhukumen i pèntu pengkeruhen kuta i, nai ipeterrang mo bai pengulu sinisidi barang kadè sienggo masa. Ipadiat pengulu-pengulu i mo ia memengketti kuta i, janah iberèken bekkas merian bana.

⁵Mula roh kalak sinaing muat bèla i menjalangsa soh mi sidi, oda ndorok iberèken pengisi kuta idi ia tabasa. Kennah iondingi kalak i ngo ia, kumerna oda ngo inakkati lako memunuh, janah oda ngo kumerna nggogo atèna.

⁶Ndorok ngo ia merian i kuta idi soh mi irungguken ia i lebbè jelma nterrem, janah soh mi matè kalak simenjèmak Imam Huntuen tikalana i. Enggo kessa i nai pè asa ndorok balik ia mi kutana i dikè nai kin ia mperrus idi.”

⁷Nai itentuken bangsa Israel mo kuta perculèndungen i kan kesunduten Laè Jordan imo: Kedes i uruk Naptali i Galilea, Sikhem i uruk Efraim, dekket Hebron i uruk Juda.

⁸Kan kebincaren Laè Jordan i uruk ndastar padang gurun kettan kebincaren Jeriko, itentuken kalak i mo kuta-kuta ènda gabè kuta perculèndungen. Kuta Bezer i ladang kalak Ruben, kuta Ramot i Gilead i ladang kalak Gad, dekket kuta Golan i Basan, ladang kalak Manasye.

⁹Idi mo karina kuta perculèndungen sinitentuken bai karina bangsa Israel dekket bai gennep kalak sidèban simerian i tengah-tengah kalak i. Barang isè kalak memunuh jelma tapi oda inakkati, ndorok ngo ia culèndung i kuta idi bai kalak si mengayaksa janah naing muat bèla, oda ndorok ibunuh ukum oda dèng irungguken i lebbè jelma mbellang.