Read Batak Dairi Josua 21 Bible Online

Josua 21 - Batak Dairi bible

Josua 21

¹Tikan sidari berkat mo pengulu horong i marga Lewi nai mi Silo, i nagerri Kanaan, lako menghadep Imam Eleazar, si Josua anak si Nun, dekket taba karina pengulu horong marga bangsa Israel. Idokken kalak i mo, “Enggo idokken JAHOWA, merkitè si Musa taba kami, kalak Lewi, iberèken ngo kuta mahan bekkas nami merian dekket tanoh jampalen i sikuliling kuta i bekkas pinakan nami.”

³Nai ièkutken kalak Israel mo bagè sinidokken JAHOWA. Ipas tanoh milik kalak idi nai sendiri, iberèken kalak i mo bai kalak Lewi kuta-kuta simerkedekoen bagi ma dekket tanoh jampalenna.

⁴Perlebbè kalohon menjalo kutana imo gennep jabu ibas horong si Kehat marga Lewi nai. Horong pinempar Imam Aron iberèken mo sipuluh tellu kuta i ladang marga Juda, marga Simeon dekket Benjamin nai.

⁵Horong gennep jabu sidèbanna ibas horong si Kehat nai iberrè mo sipuluh kuta i ladang marga Efraim, marga Dan bak marga Manasye nai sikan kesunduten Laè Jordan.

⁶Horong Gerson terolih sipuluh tellu kuta i ladang marga Isasar, Asyer, Naptali dekket marga Manasye nai sikan kebincaren Laè Jordan.

⁷Horong-horong ibas horong Merari nai terolih sipuluh dua kuta i ladang marga Ruben, Gad dekket Zebulon nai.

⁸Bagi mo kalak Israel memella-mellaken kuta idi dekket tanoh jampalenna merkitè undian lako bai kalak Lewi, bagè siniperèntahken JAHOWA merkitè si Musa.

⁹Ihorong si Kehat marga Lewi nai, imam-imam pinempar si Aron mo perlebbè menjalo kutana; sipuluh tellu kuta mo iberrè bai kalak i bagi rasken dekket jampalenna. Bai marga Juda dekket Simeon nai, ijalo kalak i mo sibah kuta imo: Libna, Jatir, Estemoa, Holon, Debir, Ain, Juta, Bet-Semes dekket Arba, simergerar mengèkutken gerar bapa kalak Enak. Kuta idi mo bagèndari simergerar Hebron, imo kuta perculèndungen i uruk Juda. Juma dekket sosor sini kuta ènda enggo iberèken bai si Kaleb anak si Jefune gabè tanoh milikna. Bai marga Benjamin nai ijalo kalak i ngo empat kuta, imo: Gibeon, Geba, Anatot dekket Almon.

²⁰Gennep jabu sidèbanna ibas horong si Kehat nai iberèken mo sipuluh kuta dekket jampalenna. Bai marga Efraim nai ijalo kalak i mo empat kuta imo: Bet-Horon, Kibzaim, Gozer dekket Sikhem, imo sada kuta perculèndungen i uruk Efraim. Bai marga Dan nai ijalo kalak i mo empat kuta, imo: Elteke, Gibeton, Ayalon dekket Gat-Rimon. Bai marga Manasye sikettan kesunduten nai ijalo kalak i mo dua kuta, imo: Taanakh dekket Gat-Rimon.

²⁷Sada nai horong sidèban ibas marga Lewi imo horong Gerson. Horong-horong i horong Gerson idi iberèken sipuluh tellu kuta tanoh jampalenna. Bai marga Manasye si kettan kebincaren nai ijalo kalak i ngo dua kuta, imo: Beestera dekket Golan, sada kuta perculèndungen i tanoh Basan. Bai marga Isasar nai ijalo kalak i ngo empat kuta, imo: Kisyon, Dobrat, Jarmut dekket En-Ganim. Bai marga Asyer nai ijalo kalak i ngo empat kuta, imo: Misal, Abdon, Helkat, dekket Rehob. Bai marga Naptali nai ijalo kalak i ngo tellu kuta, imo: Hamat-Dor, Kartan dekket Kedes, sada kuta perculèndungen i Galilea.

³⁴Horong sitadingna dèng i marga Lewi nai imo horong Merari iberèken sipuluh dua kuta dekket tanoh jampalenna. Bai marga Zebulon nai ijalo kalak i ngo empat kuta, imo: Jokneam, Karta, Dimna dekket Nahalal. Bai marga Ruben nai ijalo kalak i ngo empat kuta imo: Bezer, Jahas, Kedemot dekket Mefaat. Bai marga Gad nai ijalo kalak i ngo empat kuta imo: Mahanaim, Hesybon, Jaezer dekket Ramot, sada kuta perculèndungen i Gilead.

⁴¹Jadi ipas karina tanoh sinimiliki bangsa Israel nai lot ngo empatpuluh ualuh kuta rebbak dekket tanoh jampalen i sikulilingna iberèken bai kalak Lewi.

⁴³Bagidi mo JAHOWA memerèken bai bangsa Israel karina tanoh sienggo iperbagah kin merkitè bulaban taba empung kalak i. Enggo kessa ikunduli nagerri idi, i sidi mo bangsa Israel menettap.

⁴⁴Asa rembang bagè kadè siniperbagah JAHOWA bai empung kalak i, dak mènak ngo nagerri i kumerna ijamoti JAHOWA. Sada poda lot tellap musuh-musuh kalak idi mengalo kalak i, kumerna dak iberèken JAHOWA ngo kemenangen bai kalak Israel meradepken karina musuh kalak i.

⁴⁵Ipahèi JAHOWA ngo karina padanNa bai bangsa Israel, sada poda lot mak ipesaut.