Read Batak Dairi Josua 22 Bible Online

Josua 22 - Batak Dairi bible

Josua 22

¹Nai idilo si Josua mo gennep kalak marga Ruben, marga Gad dekket dèba marga Manasye sikettan kebincaren Laè Jordan,

²nai nina mo taba kalak i, “Enggo mo ibahanken kènè karina siniperèntahken si Musa naposo JAHOWA i taba kènè. Janah enggo ma ngo iuèi kènè karina perèntahku.

³Oda ngo nung ibelli kènè sidekkahna èn dengngan sibeltek ndènè, kalak Israel sidèbanna i, mergeraha pellin kalak i sambing. Enggo mo iuèi kènè mertuhu-tuhu pati-patiin JAHOWA Dèbata ndènè.

⁴Rembang mi bagah-bagahNa, enggo iberrèken JAHOWA Dèbata ndènè kemènaken taba dengngan sibeltek ndènè, kalak Israel sidèbanna i. Asa, bagèndari pè balik mo kènè mi ladang ndènè sendiri kettan kebincaren Laè Jordan i siniberèken si Musa bai ndènè sinderrangna i.

⁵Janah jamotken kènè mo, asa dak tong kènè menguèi pati-patiin siniperèntahken si Musa bai ndènè, imo: Kekelengi mo JAHOWA Dèbatamu, uèi mo sinipengidoNa, uèi mo perèntah-perèntahNa, setia mo kènè tabaSa, janah tunduk mo kènè baNa ibas pusuh peratèen ndènè nai.”

⁶Kessa i ipesakat si Josua mo kata njuah-njuah janah peberkatken kalak i balik mi ladang kalak i merdengan tennah ènda, “Bagèndari kaya ngo kènè janah balik kènè merembah mbuè pinakan, pirak, emmas, tembaga, bagi dekket pakèen. Pella-pellaken kènè ma mo dèba hasil sinipupusen ndènè i bai dengngan ndènè sada marga sidèbanna i.” Asa itadingken marga Ruben, Gad dekket marga Manasye sikettan kebincaren Jordan i mo kalak Israel sidèbanna i, nai berkat mo i Silo sini Kanaan nai menuju mi tanoh kalak i sendiri i tanoh Gilead. Iiani kalak i mo tanoh i rembang mi perèntah JAHOWA merkitè si Musa. (Enggo kin ngo terolih tanoh sitengah marga Manasye bai si Musa nai i kebincaren laè Jordan, janah sitengah nai marga Manasye sidèbanna menjalo tanoh bai si Josua nai kettan kesunduten Laè Jordan rasken bak marga-marga sidèbanna.)

¹⁰Soh kessa marga Ruben, Gad, dekket marga Manasye sinikebincaren Laè Jordan i mi Gelilot — tong dèng i kesunduten Laè Jordan — ipajek kalak i mo sada langgaten mbelgah janah metunggung i gembar laè i.

¹¹Idengkoh kalak Israel sidèbanna i mo dengan bangsana mendokken samah-samahsa, “Ukum kalak marga Ruben, Gad dekket marga Manasye sinikebincaren Jordan enggo memajek sada langgaten i Gelilot i gembar Laè Jordan kan ladangta!” Nai mertumpu mo kalak i karina i Silo lako mengalo marga-marga Israel sikettan kebincaren Laè Jordan.

¹³Nai ipasulak kalak Israel mo, si Pinehas, anak Imam Eleazar, mendahi marga Ruben, Gad dekket marga Manasye sini tanoh Gilead i kebincaren Jordan.

¹⁴Rasken dekket si Pinehas berkat ma mo sipuluh kalak simpantasniasè bangsa Israel, — sada kalak ibas gennep marga si kettan kesunduten Laè Jordan nai, karina i pengulu ngo i horong kalak i.

¹⁵Nai sakat mo kalak i mi bekkas marga Ruben, Gad dekket marga Manasye i tanoh Gilead.

¹⁶Nai merkitè gerar karina bangsa JAHOWA, idokken kalak i mo rana taba kalak marga Ruben, Gad dekket marga Manasye idi, “Kasa iulaken kènè ulaen jahat èn meradepken Dèbata Israel? Merkitè memajek langgaten ndènè sendiri enggo mengalo JAHOWA kènè! Oda nèngè kènè menguèi pati-patinNa!

¹⁷Oda ngo ièngèt kènè nèngè dosanta i Peor? Ihukum JAHOWA ngo kita sinderrangna i, merkitè masa uabba, kasi pè kita ènda bangsaNa sendiri! Soh bagèndari sigongken dèng ngo akibatna. Oda dèng ngo bias i?

¹⁸Janah bagèndari pè, mada ngo naing itondali kènè nola ma JAHOWA? Mula ialo kènè JAHOWA i ari èn, baremben melaga mo Ia taba karina bangsa Israel.

¹⁹Mula melamun ngo ladang ndènè i janah oda patut ibakin gabè bekkas memoji JAHOWA, doliin mo mbungkas kènè mi sèn mi ladang JAHOWA, sienggo lot Undung-undung JAHOWA. Pido kènè mo dèba tanoh nami i, tapi ulang mo gabè mengalo JAHOWA barang pè mengalo kami merkitè itambahi kènè nola sada nai langgaten sidèban, keppèken oda mada enggo lot langgaten JAHOWA Dèbatanta.

²⁰Èngèt, si Agan anak si Zerah siso nggèut menguèi perèntah JAHOWA tersèngèt ugas-ugasen sikennah siapenken, janah bakunè kenggonna? Karina bangsa Israel ihukum! Pellin si Agan ngo merdosa, tapi oda pellinsa sambing kessa matè!”

²¹Nai ialoi kalak marga Ruben, Gad dekket Manasye sikettan kebincaren i mo,

²²“JAHOWA ngo pergegoh siso tercodi! JAHOWA ngo pergegoh siso tercodi! Ibettoh ngo kasa kubahan kami ènda, janah sèkel ngo kami asa ibettoh kènè ma! Mula lot ibas sura-sura nami kubahanken kami idi lako mengalo JAHOWA, barang pè kumarna oda nèngè percaya kami tabaSa, isèmpekken mo kami gejapken èn!

²³JAHOWA sendiri mo menghukum kami, mula lot taki nami lako mengalo JAHOWA bang pè memajek langgaten nami sendiri mahan bekkas memèlèken pèlèen situtungen barang pèlèen pagè barang pèlèen persupanen i babona.

²⁴Oda ngo bagi taki nami, alè kaltu! Asa kupajek kami pè langgaten idi, kumerna mbiar kami, tah bakunè podi ari ruap kata pinempar ndènè taba pinempar nami, ‘Oda lot kadè perdemuen ndènè bai JAHOWA, Dèbata Israel!

²⁵Tengngen lebbèken, ibakinken ngo Laè Jordan ènda i tengah-tengahta lako menirang kami dekket kènè kalak Ruben dekket Gad. Tuhu-tuhu ngo oda lot kadè perdemuen ndènè dekket JAHOWA.’ Nai kadè mo ndia masa i podi ari? Tentu oda nèngè mo memoji bai JAHOWA pinempar nami ibaing pinempar ndènè.

²⁶Asa, kupajek kami pè langgaten èn, oda ngo mahan bekkas pèlèen situtungen barang keperluen pemèlèen nami,

²⁷tapi lako mahan pernè- ngèten banta kacimbang mbellah, dekket bai pinemparta mi podi ari ngo, magahken tuhuna ngo kami ènda pesakatken pemojien bai JAHOWA i Undung-undungNa janah merembah pèlèen situtungen karina pèlèen dekket pèlèen persupanen. Dekket dalan bagi oda nè mo dokenken pinempar ndènè taba pinempar nami oda lot kadè perdemuennna meradepken JAHOWA.

²⁸Asa, ukum dok atè nami imo: tah bakunè idokken pinempar ndènè bagidi, nai enggo ndorok dokenken pinempar nami, ‘Tengngen mo langgaten idi! Ipajek empung nami ngo sada langgaten dos bagè langgaten JAHOWA, oda ngo mahan bekkas pemèlèen situtungen barang mahan pemèlèen, tapi lako mahan pertanda banta kacimbang mbellah ngo.’

²⁹Tok mo ukur ndènè, oda uè kami me- ngalo JAHOWA barang pè oda nèngè menguèi tabaSa merkitè menambahi langgaten sidèban lako bekkas pemèlèen situtungen barang pèlèen pagè barang pè pemèlèen, keppèken enggo lot langgaten JAHOWA Dèbatanta i lebbè Undung-undung bekkas pekiroh JAHOWA.”

³⁰Karina siniterangken kalak marga Ruben, Gad dekket Manasye, sikettan kebincaren idi nai idengkoh Imam Pinehas rasken dekket sisipuluh kalak simpantas niasè Israel sikettan kesunduten Laè Jordan nai. Nai palum mo iakap kalak i merkitèken keterangen idi.

³¹Nai nina si Pinehas anak Imam Eleazar mo, taba kalak marga Ruben, Gad, dekket Manasye Kebincaren, “Bagèndari kubettoh kami idengani JAHOWA ngo kita, kumarna oda ngo ialo kènè Ia. Enggo ipaluah kènè bangsa Israel ibas hukumen JAHOWA nai.”

³²Enggo kessa bagi berkat mo si Pinehas rasken bak simpantas niasè Israel idi. Itadingken kalak i mo kalak Ruben dekket Gad idi i Gilead, nai balik mo mi Kanaan, nai ibagahken mo simasa i taba bangsa Israel.

³³Nai lolo mo perukuren bangsa Israel tersèngèt i, gabè ipoji kalak i mo Dèbata. Oda nèngè mo iterèngèti kalak i lako menjuhap kalak Ruben dekket Gad, dekket lako menumpatken nagerrina.

³⁴Dungna nina marga Ruben dekket marga Gad idi mo, “Langgaten ènda mo gabè saksi taba kita karinana magahken JAHOWA ngo Dèbata.” Nai igerari kalak i mo langgaten idi “Saksi”.