Read Batak Dairi Josua 23 Bible Online

Josua 23 - Batak Dairi bible

Josua 23

¹Daoh-daoh arien enggo kessa iberèken JAHOWA kemènaken bai bangsa Israel; oda nèngè mo dak ilolahi asup musuh kalak i. Sinderrangna i enggo mo tua-tua kalohon si Josua.

²Nai itenggoi mo karina bangsa Israel, bagi ma dekket simpantas niasè, pengendeng-pengendeng, pengulu-pengulu, perhukum, dekket lubalang-lubalang, nai idokken mo, “Bagèndari enggo tua-tua aku.

³Enggo itengen kènè karina sinibakin JAHOWA Dèbata ndènè taba karina bangsa sinisènda kumernaken kènè. JAHOWA Dèbata sendiri ngo juhap mendengani kènè.

⁴Nasa tanoh bangsa-bangsa sitadingna dèng, bagi ma tanoh karina bangsa sienggo kutaluken, imo tanoh sihampar kettan kebincaren Laè Jordan nai soh mi kesunduten sondel mi Laut Tengah, karinana idi enggo kupellaken bai ndènè gabè milik ndènè.

⁵Talu ngo bangsa-bangsa idi ibaing JAHOWA Dèbata ndènè, janah mperrus bai ndènè nai mula berkat kènè lako mengkubu kalak i. Gabè kènè mo merolihken nagerri kalak i, bagè sienggo ijandiken JAHOWA Dèbata ndènè taba kènè.

⁶Kumerna i, jamotken kènè mo asa dak tong iuèi kènè janah mendalanken karina sitersurat ibagasen Bukku Patiin si Musa. Sada pè ulang lausi kènè ibas pati-patiin idi nai.

⁷Merkitè bagidi oda nèngè mo kènè sakkor dekket bangsa-bangsa sitadingna dèng i tengah-tengah ndènè. Oda ma mo kènè mengeruapken gerar dèbata-dèbata sidèban idi.

⁸Tapi kennah tong ngo kènè setia taba JAHOWA, bagè sienggo ibahanken kènè soh bagèndari.

⁹Enggo mo ibukar JAHOWA bangsa-bangsa mbellen bana mergegoh lako bai ndènè; sada kalak poda lot tellap kalak i mergong mengalo kènè.

¹⁰Gennep kalak kènè ndorok menaluken merribu kalak, kumerna JAHOWA Dèbata ndènè ngo mergeraha mendengani kènè, bagè sienggo niperbagahNa kin.

¹¹Kumerna i, dak èngèt mo mengkekelengi JAHOWA Dèbata ndènè.

¹²Mula oda tuhu-tuhu setia kènè janah gabè mersaor kènè dekket bangsa-bangsa sitadingna i dèng i tengah-tengah ndènè, janah kabin kènè dekket kalak i,

¹³èngèt mo, pasti ngo oda ipelaus JAHOWA Dèbata ndènè nèngè bangsa idi bai ndènè nai. Balikna nola, gabè merbahaya kalohon ngo kalak i bai ndènè, kerna gabè bagè jarat barang pè bagè togong-togong nola ngo kalak i bai ndènè. Ndersa kalohon mo kènè ibakin kalak i; kerna gabè bagè ligas-ligas i gurung ndènè mo kalak i barang bagè dori ibagasen mata ndènè. Pukpuk mo dak ndersa akapen ndènè sanga sada kalak nèngè poda kènè merian i nagerri simerandal ènda siniberèken JAHOWA Dèbata ndènè bai ndènè.

¹⁴Bagèndari pè enggo katikana aku la- ko matè. Karina ngo kènè bettoh-bettohen ukum JAHOWA Dèbata ndènè i enggo memerèken taba kènè karina simerandal siniperbagahNa i. Enggo ipahèi karina bagah-bagahNa, sada poda mak ipahèi.

¹⁵Tapi bagè sinipahèiNa karina bagah-bagahNa taba kènè, bagidi ma ngo Ia pasti mendalanken karina asupNa taba kènè.

¹⁶Mula ilausi kènè padan sienggo idokken JAHOWA Dèbata ndènè taba kènè asa iuèi, janah laus nola kènè mersembah taba dèbata sidèban, melaga mo JAHOWA janah ihukum mo kènè. Ibagasen sigetjap sambing mèter mpurpur mo kènè karina i nagerri simerandal ènda nai, siniberèken JAHOWA taba kènè.”