Read Batak Dairi Josua 24 Bible Online

Josua 24 - Batak Dairi bible

Josua 24

¹Ipepulung si Josua mo karina marga bangsa Israel i Sikhem, nai idokken mo karina simpantas niasè, pengulu, perhukum, dekket karina lubalang roh menghadep. Nai roh mo kalak i menghadep Dèbata.

²Nai nina si Josua mo taba kalak i karina, “Dengkohken mo kadè sinidokken JAHOWA, Dèbata Israel taba kènè, ‘Ukum arnia merian i kèpar Laè Efrat ngo empung ndènè, janah menembah dèbata sidèban ngo kalak i. Sada bai kalak idi nai imo si Terah, bapa si Abraham dekket si Nahor.

³Nai Kuembah mo si Abraham, bapa empung ndènè idi, i nagerri kèpar Efrat i nai, janah Kupasulak mo ia mengagahi karina nagerri Kannaan. Kuberèken ngo bana nterrem pinempar. Mula-mula Kuberèken ngo si Isak tabasa,

⁴nai bai si Isak Kuberrè mo dua anak imo si Jakob dekket si Esau. Kuberèken mo bai si Esau tanoh uruk Edom gabè milikna, tapi ukum si Jakob empung ndènè idi, mbungkas ngo mi Mesir, rebbak dekket dukak-dukakna.

⁵Kessa i nola Kupasulak mo si Musa dekket si Aron, janah menempaken kesusahen mbellen taba Mesir, nai Kuperuar mo kènè i sidi nai.

⁶Kuembah mo empung ndènè idi karuar i Mesir nai, nai ijalang kalak Mesir mo kalak i merkurèta perang bak soridadu merkuda. Janah soh kessa empung ndènè idi mi Laut Arngo,

⁷tenggo-tenggo mo kalak i tabaKu mengido tolong. Nai Kubakin mo gellap i kellang-kellang kalak i dekket kalak Mesir, janah Kutungkupi kalak Mesir idi dekket laè Laut, gabè lenneng mo kalak i karina. Enggo ibettoh kènè karina barang bakunè sikubakin meradepken Mesir. Ndekkah kalohon ngo kènè merian i gurun pasir.

⁸Nai Kuarak mo kènè mi nagerri kalak Amori simerian kettan kebincaren Laè Jordan. Ialo kalak i mo kènè, tapi mennang ngo kènè Kubakin mengalo kalak i. Itaban kènè mo nagerri kalak i, janah Kupetumpat mo kalak i.

⁹Nai kèkè mo raja Moab, imo si Balak anak si Zipor mengalo kènè. Ipasulak mo jelma mendahi si Bileam anak si Beor janah mengidoken asa isumpahi si Bileam kènè.

¹⁰Tapi oda Kuuèi sinipergeddo si Bileam, gabè ipasu-pasu nola mo kènè. Bagidi mo Aku paluahken kènè bai si Balak nai.

¹¹Kessa i nola isuberrangi kènè mo Laè Jordan, janah sakat mo kènè mi Jeriko. Ialo kalak Jeriko mo kènè, bagi ma bang kalak Amori, kalak Feris, Kanaan, Het, Girgasi, Hewi dekket Jebus. Tapi mennang ngo kènè Kubakin meraloken kalak i karina.

¹²Sidangna kèkè kènè lako mengalo kalak i, ringgodoren janah buradan mo kalak i Kubakin, gabè mperrus mo duana raja kalak Amori idi bai ndènè nai. Oda ngo peddang dekket panah ndènè memakin kènè mennang.

¹³Tanoh siKuberèken bai ndènè, ijalo kènè ngo i oda pella sanga ledja iakap kènè. Janah karina kuta siKuberèken bai ndènè oda ngo kènè memajek idi. Tapi bagèndari enggo kènè merian i sidi, janah kènè ma ngo mengakapken rasana buah anggur bak buah zaitunna, keppèken oda ngo kènè menuan idi.’ ”

¹⁴“Asa bagèndari pè,” nina si Josua nola menguduti, “pesangap kènè mo JAHOWA. Uèi kènè mo Ia ibagasen mbersih penarihen ndènè nai janah setia. Pesisi kènè mo dèbata-dèbata sidèban sinisembah empung ndènè arnia i Mesopotamia dekket i Mesir. Pellin JAHOWA mo uèi kènè.

¹⁵Ukum oda ngo iuèi kènè JAHOWA, dokken kènè mo rana ndènè bagendari, tah isè ngo uèen ndènè: tah dèbata sidèban sinisembah empung ndènè i Mesopotamia arnia ngo barang dèbata kalak Amori i nagerri siniianen ndènè bagèndari. Tapi ukum kami — aku bak denganku — sada jabu pellin JAHOWA ngo Uèen nami.”

¹⁶Nai ialoi bangsa Israel i mo, “Barang bakunè pè oda nggèut kami menadingken JAHOWA lako menguèi dèbata-dèbata sidèban!

¹⁷JAHOWA Dèbatanta ngo sipaluahken empungta dekket kita sendiri i perhambaen Mesir nai. Enggo mo siidah kelengangen-kelengangen sinibakin JAHOWA. Dak tong ngo ijamoti JAHOWA kita ibas karina perdalanenta, memellus nagerri ndèba.

¹⁸Janah sinderrang sibengketti pè nagerri èn, ipuari JAHOWA ngo karina kalak Amori simerian i sèn. Asa, naing ngo JAHOWA dak tong uèen nami, kumerna Ia ngo Dèbatanta.”

¹⁹Nai idokken si Josua nola mo, “Tapi katèngku tah oda ngo tellap kènè lako me- nguèi JAHOWA, kumerna Dèbata simbadia ngo Ia, janah pellin Ia ngo kessa JAHOWA. Oda uè Ia lot saingenna. Mula itadingken kènè Ia janah menembah taba dèbata sidèban, oda nè nggèut Ia mengampuni dosa ndènè. Balikna, gabè ialo janah ihukum mo kènè. Iripasken mo kènè, tukasi pè mendè Ia arnia meradepken kènè.”

²¹Nai ialoi kalak Israel idi mo, “Mada! Oda uè kami menguèi dèbata sidèban. Pellin JAHOWA ngo kessa siuèen nami!”

²²Nai nina sm Josua mo, “Mula bagi, kènè sendiri ngo saksina magahken tutus pekkadè ndènè pellin JAHOWA ngo siuèen ndènè.” “Imo tuhu,” nina kalak i, “kami sendiri mo saksina.”

²³“Mula bagidi, patakken kènè mo dèbata bangsa-bangsa sidèban silot bai ndènè idi,” nina si Josua, “janah merpadan mo kènè magahken tuhu-tuhu ngo kènè setia menguèi JAHOWA, Dèbata Israel.”

²⁴Nai nina kalak i mo taba si Josua, “Pellin JAHOWA Dèbatanta ngo kessa naing uèen nami. Dak naing uèen nami ngo perèntah- perèntahNa.”

²⁵Asa tikan arienkenna i mo ibakin si Josua perpadanen dekket bangsa Israel i Sikhem; janah i sidi mo iberèken taba kalak i pati-patiin dekket hatoren-hatoren sikennah uèen kalak i.

²⁶Karina patiin dekket hatoren idi isuratken ibas bukku Patien Dèbata. Enggo kessa i ibuat mo sada batu mbellen, ipecènder mo idi i terruh kayu mbellen i bekkas simerkedekoen bai JAHOWA.

²⁷Enggo kessa i idokken si Josua mo katana taba kalak i karina, “batu ènda mo gabè saksinta. Karina rana siniruapken JAHOWA taba kita, enggo iruapken i hadeppen batu ènda. Asa, batu ènda mo gabè saksi meradepken kènè, lako pesèngètken kènè asa ulang ialo kènè Dèbata ndènè.”

²⁸Ujungna ipasulak si Josua mo kalak i molih; nai balik mo kalak i karina mi tanohna gennep.

²⁹Daoh-daoh arien matè mo si Josua anak si Nun naposo JAHOWA idi, tikan merumur siratus sipuluh tahun.

³⁰Ikuburken mo ia i tanohna sendiri i Timnat-Serah i uruk Efraim kettan utara Delleng Gaas.

³¹Sidekkah nggelluh si Josua, merpenguèi taba JAHOWA ngo bangsa Israel. Janah enggo kessa matè pè ia dak tong ngo kalak i menguèi JAHOWA sidekkah lot dèng i tengah-tengah kalak i pengendeng sienggo menaksiken sendiri karina sinibaing JAHOWA bai bangsa Israel.

³²Tulan-tulan si Josep siniembah bangsa Israel i Mesir nai, ikuburken mo i Sikhem i tanoh sinitokor si Jakob merharga siratus kèpèng pirak bai dukak-dukak si Hemor nai, bapa kalak Sikhem. Iwarisken ngo tanoh i bai pemparen si Josep.

³³Nai matè nola mo si Eleazar anak si Aron, janah ikuburken i Gibea, imo kuta sikettan aur uruk Efraim. Enggo iberèken kin kuta i bai si Pinehas, anak si Eleasar.