Read Batak Dairi Josua 4 Bible Online

Josua 4 - Batak Dairi bible

Josua 4

¹Enggo kessa turèpar karina bangsa i, nina JAHOWA mo mbang si Josua,

²“Pilih mo sipuluh dua kalak, sada kalak i gennep marga nai.

³Dokken mo kalak i memuat batu sipuluh dua i tengah-tengah laè Jordan i nai, tupung i bekkas imam-imam cènder i nai. Dokken mo kalak i merembah batu-batu i soh mi bekkas ndènè mermalam berngin bon.”

⁴Nai idiloi si Josua mo sisipuluh dua kalak siterpilih i,

⁵nai idokken mo, “Laus mo kènè mi tengah Laè Jordan, mi lebbè Pèti Perpadanen JAHOWA Dèbata ndènè. Tersada mo kènè mendokong batu i sidi nai — sipuluh dua mo batu buèna rembang dekket bilangen marga-marga i bangsa Israel.

⁶Batu idi mo mahan pernèngèten bangsa èn meradepken kadè sienggo ipehana JAHOWA. Ipodi ari mula lot dukak-dukak ndènè mengkusoken kadè lapaten batu-batu idi bai ndènè,

⁷kennah bagahken kènè taba kalak i magahken tersennak ngo Laè Jordan sinderrang iembah Pèti Perpadanen JAHOWA meneberangi laè i. Batu-batu idi mo dak tong pesèngètken bangsa Israel tersèngèt kadè simasa i sèn.”

⁸Iulaken sisipuluh dua kalak i mo perèntah si Josua. Rembang bagè sinidokken JAHOWA bai si Josua, ibuat kalak i mo sipuluh dua buèna batu itengah-tengah laè Jordan — nai rembang mi buè bilangen marga-marga bangsa Israel — nai iembah kalak i mo mi bekkas perundung-undungen kalak i.

⁹I tengah-tengah laè Jordan idi ma, isusun si Josua ma ngo sipuluh dua batu tupung i bekkas cènder imam-imam idi merosong Pèti Perpadanen i. (I sidi dèng ngo batu-batu idi soh bagèndari).

¹⁰Dak tong ngo cènder imam-imam idi i tengah-tengah Jordan mèma pul iulaken kalak i karina siniperèntahken JAHOWA bai kalak i merkitè si Josua. Rembang ngo karina idi mi peddah si Musa mbang si Josua. Isudu bangsa Israel mo menurèpari Laè Jordan.

¹¹Enggo kessa soh karina mi kèpar, merdalan mo imam-imam simerosong Pèti Perpadanen idi i lebbè kalak i.

¹²Rembang mi siniperèntahken si Musa, lubalang-lubalang i marga Ruben nai, marga Gad dekket sitengah i marga Manasye nai, enggo lebbèen menurèpari laè.

¹³Karina 40.000 kalak anak laki mersinjata janah enggo kebbas lako geraha. I hadeppen JAHOWA turèpar kalak i menuju mi napa kendet i gembar Jeriko.

¹⁴Arinkenna i ngo ipehana JAHOWA simasa simemaingken gabè merkebiaren bangsa Israel taba si Josua sada kalak mbelgah. Ipesangap kalak i ngo ia sidekkah nggelluhna bagè penghormati kalak i bai si Musa.

¹⁵Nai idokken JAHOWA mo si Josua

¹⁶asa iperèntahken imam-imam simerosong Pèti Perpadanen i mendarat i Laè Jordan i nai.

¹⁷Iulaken si Josua mo kadè sinidokken JAHOWA tabasa.

¹⁸Soh kessa imam-imam i mi biding mengolihi nola mo laè i menjarir janah merginja bagè mulana.

¹⁹Soh mo bangsa Israel mi kèpar Laè Jordan i ari sipuluh bulan sada, janah merundung-undung mo kalak idi i Gilgal kan kebincaren Jeriko.

²⁰I sidi mo isusun si Josua batu sipuluh dua sinibuatna i Jordan nai.

²¹Nai nina si Josua mo taba bangsa Israel, “Mula ikusoken dukak-dukak ndènè i podi ari tersèngèt lapaten batu-batu ènda,

²²bagahken kènè mo bai kalak i, merdalan i tanoh ngkerrah ngo bangsa Israel tikan menurèpari laè Jordan ènda.

²³Sukutken taba kalak i, ipekerrah JAHOWA Dèbata ndènè ngo Laè Jordan i lako bai ndènè, soh mi karina kènè suberrang, tosè bagè tikanNa ipekerrah Laut Arngo tikala i bai nami,

²⁴asa karina kalak sini dunia èn bettoh-betohen bakunè belgahna kuasa JAHOWA. Janah merkitè bagidi ipesangap kènè mo JAHOWA Dèbata ndènè soh mi amman sumendah.”