Read Batak Dairi Josua 5 Bible Online

Josua 5 - Batak Dairi bible

Josua 5

¹Karina raja Amori sikan kesunduten Laè Jordan, dekket karina raja Kanaan sinibiding Laut Tengah mendengkoh enggo ipekerrah JAHOWA Laè Jordan sidekkah bangsa Israel menuberangi laè i. Nai gabè buradan mo kalak i janah ringgodoren kumernaken kalak Israel i.

²Sinderrangna i nina JAHOWA mo taba si Josua, “Bahan mo raut ipas batu nai, nai baing mo kerja pertakkilen bai kalak Israel.”

³Nai iulaken si Josua mo perèntah JAHOWA, itakkil mo kalak Israel i bekkas sinigerarenna Uruk Pertakkilen.

⁴Sinderrangna mbungkas kalak Israel i Mesir nai, karina anak laki enggo kin ngo itakkil. Tapi sinderrang marjap-arjap kalak idi i padang gurun empatpuluh tahun dekkahna, sada kalak dèng pè oda dukak-dukak kalak i daholi lot itakkil. Janah i punca siempatpuluh tahun i, karina anak laki sinderrang mbungkas i Mesir nai sienggo tuk umurna lako dekket gabè soridadu enggo matè karinana, kumerna oda menguèi perèntah JAHOWA. Jadi rembang mi bulaban JAHOWA, oda iduè kalak i mengidah nagerri nduma janah nggabur i siniperbagahNa bai empung kalak i.

⁷Kumernaken i ngo asa karina anak laki bai kalak i nai oda dèng itakkil. Cundut sirembaru èn mo sinitakkil si Josua.

⁸Enggo kessa pul kalak i karina itakkil, kom i perundung-undungen i mo kalak i mèma njuah ugah kalak i.

⁹Nina JAHOWA mo taba si Josua, “Sidari èn mo enggo Kupatakken kinilèa ndènè kumarna hamba i Mesir.” Kumarna i ngo asa igerari bekkas idi Gilgal soh mi bagèndari.

¹⁰Ninganna merundung-undung i Gilgal i kendet njolmit mi Jeriko, ipèstaken bangsa Israel mo Paskah tupung ciboen i ari sipuluh empat i bulan idi.

¹¹Sibarembenkenna ipangan kalak i mo hasil nagerri Kanaan i, imo perlebbè merumang: roti siso meragi dekket nditak pinanggang.

¹²Sidarinkenna i ma mo oda nèngè merdabuhen manna i langit nai, janah mentadi mo kalak Israel kipangan manna. Mungkah i sidi nai mo ipangan kalak i hasil tanoh Kanaan i.

¹³Tikan sikali i gembar Jeriko ngo si Josua. Sintempu mèter idah mo sada kalak anak laki cènder i lebbèna merpeddang sintak. Ijolmiti si Josua mo anak laki i, janah mengkusoken, “Dengngan ngo kono barang alo?”

¹⁴“Dengngan poda janah alo ma poda,” nina mengaloi. “Roh aku mi sèn pakalima soridadu JAHOWA ngo.” Mendengkoh i mèter sujud mo si Josua menembahsa. Nina si Josua mo, “Naposo Tuan i ngo aku. Kadè mo sindorok kubaing bai Tuan i?”

¹⁵Ialoi pakalima soridadu JAHOWA idi mo, “Talkasi mo cipatu mi; tanoh simbadia ngo tanoh bekkasmu cènder idi.” Nai italkasi si Josua mo cipatuna.