Read Batak Dairi Josua 6 Bible Online

Josua 6 - Batak Dairi bible

Josua 6

¹I kuta Jeriko enggo mo ijaga pèntu pengkeruhenna selloh janah ikonci mendè asa ulang terbaing kalak Israel mbengket mi kuta i. Sada kalak poda iduè mbengket barang pè mendarat i kuta i nai.

²Nina JAHOWA mo taba si Josua, “Bagèndari mo Kusohken bamu kuta Jeriko rasken dekket rajana bak karina soridaduna siberrani-berrani i.

³Kono dekket soridadumu kennah merotor mengkulilingi kuta i sikali sidari sidekkah ennem ari.

⁴Pitu kalak imam, gennep mersiembah sarunèna, kennah merdalan i lebbè Pèti Perpadanen i. I ari pepituken, kono dekket soridadumu kennah mengkulilingi kuta idi pitu kali ninganna bagidi isempul imam-imam mo sarunèna.

⁵Enggo kessa bagi, kennah isempul imam-imam idi mo sarunèna menèmpur. Idengkoh kènè kessa sora sarunè menèmpur i, mènter karina mo soridadu i kennah mersurak nggang kalohon, nai merentuh mo dingding kuta i. Nai karina mo kènè kennah mènter memengketti kuta i.”

⁶Nai itenggoi si Josua mo karina imam, janah idokken mo, “Dokong kènè mo Pèti Perpadanen idi, pitu kalak bai ndènè nai kennah merdalan i lebbèna ninganna merembah sarunè.”

⁷Nai idokken si Josua mo soridaduna merotor mengkulilingi kuta i, itebenai barisen pengabal kettan lebbè simerdalan i lebbè Pèti Perpadanen JAHOWA.

⁸Rembang mi perèntah si Josua, berkat mo nuhnuhen pengabal kettan lebbè mengelebbèi imam-imam simenempul sarunè, ièkutken imam-imam simerosong Pèti Perpadanen, nai iujungi nuhnuhen pengabal kettan podi. Ninganna merdalan i kalak i, dak ngo merempet sarunè ipersora.

¹⁰Enggo kin ngo iperèntahken asa ulang mengerana soridadu agia singkebabah kata pè barang pè mersurak, mula oda tentang idokken si Josua.

¹¹Bagidi mo si Josua mendokken soridaduna merembah Pèti Perpadanen mengkulilingi kuta i sikali, enggo kessa i balik mo kalak i mi perundung-undungen, janah merberngin i sidi.

¹²Sibarembenkenna, njengkas kalohon, kèkè mo si Josua janah pedua kaliken merbaris ma mo nola imam-imam bak soridadu mengkulilingi kuta i tosè bagè perbaris kalak i i lebbènkenna i: mula-mula nuh- nuhen pengabal kettan lebbè, kessa i imam sipitu simenempul sarunè, iudut nola mo dekket imam-imam simerosong Pèti Perpadanen, janah perpodi nuhnuhen pengabal kettan podi. Ningan bagidi menerrus mo sarunè merkata.

¹⁴I ari peduaken, ikulilingi kalak i mo kuta i sikali ma nai balik mo mi perundung-undungen. Bagi mo ibakin kalak i gennep ari sidekkah ennem ari.

¹⁵I ari pepituken njengkas mo kalak i kèkè tikan mbincar mataniari, nai merbaris mo kalak i mengkulilingi kuta Jeriko pitu kali tosè bagè sienggona. Pellin i ari pepituken i sambing ngo kessa ikulilingi kalak i kuta i pitu kali.

¹⁶Tupung pepitu kaliken, enggo kessa isempul imam-imam sarunèna, ibakin si Josua mo gorè taba karina pulungen i asa mersurak. Nina si Josua mo, “Enggo isohken JAHOWA kuta ènda taba kènè!

¹⁷Karina kuta dekket sagumanna sinna kennah isiapken karinana sikira pèlèen bai JAHOWA. Pellin si Rahab, daberru sibabi jalang i dekket sincelketna sambing ngo kessa ndorok ibelli nggelluh, kumarna enggo itolong mata-matanta.

¹⁸Oda ndorok buaten barang kadè sambing pè ibas karina sipatut tumpatenken. Mula lot ibuat kènè, sempa mo jèkat dekket mara mi perundung-undungen Israel.

¹⁹Karina ugasen pirak, emmas, tembaga, dekket bessi kennah ikellini bai JAHOWA, janah ipennep ibas bekkas pemeneppen ugasen milik JAHOWA.”

²⁰Nai isempul imam-imam mo sarunèna. Janah idengkoh kalak Israel kessa sora sarunè idi, mersurak mo kalak i nggang kalohon, nai merumpak mo dingding pagar batu kuta Jeriko. Mènter karina mo soridadu Israel menangkih, janah memengketti kuta i nai itaban mo.

²¹Karina sinikuta i, situa-tua simenguda, daholi daberru, ibunuh merkitè peddang. Pinakan lembu, biri-biri dekket kalodè pè ibunuh karina.

²²Nina si Josua mo taba mata-mata sidua kalak i, “Lakè mo mi bages daberru sibabijalang idi, janah arahken kènè mo kalak idi mi ruar rebbak dekket sincelketna bagè sienggo ijandiken kènè tabasa.”

²³Nai laus mo mata-mata i duana, janah memabai si Rahab mi ruar rasken dekket bapana, inangna, kaka-anggi bak turangna, dekket sincelketna. Karina sincelket si Rahab i dekket naposona ibabai mi ruar mi bekkas mènak i gembar perundung-undungen Israel.

²⁴Nai ilekkup soridadu kalak Israel mo karinana kuta i dekket silot i kuta i, laènken ugasen-ugasen emmas, pirak tembaga dekket bessi. Ukum ugasen idi ibuat kalak idi ngo, janah iembah mi bekkas pemeneppen ugasen milik JAHOWA.

²⁵Tapi ukum si Rahab daberru sibabijalang i bak karina sincelketna ibelli si Josua ngo nggelluh, kumarna enggo itolong mata-mata sinipasulak si Josua i mi Jeriko. (Soh mi ari sidari èn lot dèng ngo tong pinempar si Rahab idi i Israel).

²⁶Sinderrangna i mo iruapken si Josua rarangen ènda, “Barang isè mersura-sura naing menasai kuta Jeriko ènda, kenna sempetta JAHOWA ngo ia. Barang isè simemajek batu cendina mago mo dukakna situaen, janah barang isè simemahan pèntu pengkeruhenna mago mo dukakna siampun-ampun.”

²⁷Idengani JAHOWA ngo si Josua, janah gabè termurmur mo gerar si Josua i suberri nagerri i.