Read Batak Dairi Josua 7 Bible Online

Josua 7 - Batak Dairi bible

Josua 7

¹Enggo iperèntahken JAHOWA bai bangsa Israel, karina silot i kuta Jeriko kennah itumpatken, sada poda ndorok buaten. Tapi oda ngo iuèi perèntah idi. Sada kalak daholi mergerar si Agan mengelausi perèntah i, gabè melaga kalohon mo JAHOWA taba bangsa Israel. (Bapa si Agan mergerar si Karmi janah empungna daholi mergerar si Zabdi i horong Zerah ibas marga Juda nai).

²Sinderrangna i ipasulak si Josua mo barang piga-piga kalak i Jeriko nai mi Ai, imo sada kuta kettan kebincaren Betel, i gembar Bet-Awen. Ipasulak ngo kalak i lako memereso ladang i. Enggo kessa idalanken kalak i ulaen i,

³balik mo kalak i janah memagahken taba si Josua. Nina kalak i mo, “Oda perlu karina kita laus mengkubu Ai. Pasulak sambing mo naga dua barang tellu ribu kalak. Ulang pella pasulak karina soridadu mi sidi lako mergeraha, kumerna kèdèk ngo kuta idi.”

⁴Jadi pellin tellu ribu kalak sambing ngo kessa laus mengkubu kuta i, tapi talu ngo kalak i gabè sondar balik.

⁵Ipellet kalak Ai mo kalak i ipengkeruhen kuta Ai nai soh mi bekkas pertambangen, janah ibunuh mo kira-kira tellupulu ennem kalak bai kalak i nai i pispis delleng. Nai gabè ringgodoren mo kalak Israel janah mbiar.

⁶Bonek kalohon mo ukur si Josua dekket pengulu-pengulu bangsa Israel gabè iribaki kalak i mo olesna, janah sujud mo kalak i sidari tip soh berngin i hadeppen Pèti Perpadanen JAHOWA dekket mencircirken cirabun mi takal kalak i pertanda merbonek atè.

⁷Nina si Josua mo taba JAHOWA, “Ialè JAHOWA Dèbatangku! Lako merkadè ngo iarak Ko kami soh mi kèpar Laè Jordan ènda? Mada ngo lako menohken kami taba kalak Amori? Asa matè kami? Lotien mo kami merian i sadènang sambing, i kèpar Laè Jordan!

⁸Alè JAHOWA! Enggo mo mondar kalak Israel ibakin musuh. Bagèndari pè kadè mo sikennah dokenkenku?

⁹Idengkoh kalak Kanaan dekket karina kalak silot i ladang èn mo nahan tersèngèt mi si. Ikubu janah ibunuh kalak i mo kami karina! Nai bakunè mo pemaingMu lako mempertahanken kesangapenMu?”

¹⁰Ialoi JAHOWA mo si Josua, “Kèkè mo ko! Oda lot gunana dak sujud ko bagi mi tanoh!

¹¹Enggo mengulaken dosa kalak Israel. Enggo kin ngo Kuperèntahken asa iuèi kalak i padanna dekket Aku, tapi ilausi kalak i ngo i! Ugasen sipatut siapenken enggo gabè ibuati kalak i. Menangko ngo kalak i janah iboniken rebbak dekket ugasenna asa ulang terbettoh.

¹²Kumarna i ngo asa oda tahan kalak idi lako mendempakken musuh. Mondar ngo kalak i talu ibaing musuh kumarna kalak i sendiri pè enggo ihukum lako siapenken. Oda nè Kudengani kènè, mula oda dèng isiapken kènè ugas-ugasen siso ndorok buaten idi.

¹³Bagèndari pè kèkè mo ko, Josua! Uras mo bangsa Israel janah dokken mo kalak i kebbas lako menghadep Aku. Dokken mo kalak i asa kebbas baremben, kumarna Aku JAHOWA Dèbata Israel naing mendokken bagènda taba kalak i: ‘Alè kènè kalak Israel! Ugasen-ugasen sienggo Kuperèntahken taba kènè lako isiapken, dèba lot deng bai ndènè. Sidekkah oda dèng iambongken kènè ugas-ugasen idi, oda mergong kènè lako mengalo musuh!’

¹⁴Kumarna i, alè Josua, bagahken mo taba kalak i, ceggen baremben perèsoen mo kalak i gennep-gennep marga. Mula Kuhunjuk kessa sada marga, karina horong ibas marga idi kennah roh mi lebbè merhorong-horong. Janah mula Kuhunjuk sada horong, karina pejabu-jabu ibas horong idi kennah roh mi lebbè merpanganken bana. Nai nola ma mula Kuhunjuk sada jabu, gennep kalakna ibas sisimpangaen idi kennah mi lebbè mo mersada-sada kalak.

¹⁵Nai kalak sinihunjuk janah tuhu memoniken ugas-ugasen sinigerra idi kennah ilekkup kerri rebbak dekket sisimpangansa dekket karina silot bana; kumarna ia ngo simengosè padan i janah mengulaken kejahaten mbellen i tengah-tengah bangsa Israel.”

¹⁶Sibarembenkenna, njengkas kalohon, idokken si Josua mo bangsa Israel roh mi lebbè mermarga-marga, nai kenna mo tupung marga Juda.

¹⁷Nai idokken si Josua mo marga Juda roh mi lebbè, merhorong-horong, janah kenna mo horong si Zerah. Nai idokken nola mo horong si Zerah roh mi lebbè, mersada-sada jabu, janah kenna mo simpangaen si Zabdi.

¹⁸Enggo kessa bagi idokken si Josua mo simpangaen si Zabdi roh mi lebbè sada-sada kalak; nai terdapet mo si Agan, dukak si Karmi, kempu si Zabdi.

¹⁹Nina si Josua mo taba si Agan, “Alè pa, pertuhu mo janah bagahken mo tangkas i sèn i hadeppen JAHOWA, Dèbata Israel kadè ngo sienggo ibahanken ko. Bagahken mo taba aku, ulang perso.”

²⁰“Tuhu ngo,” nina si Agan, “Enggo mengulaken dosa aku taba JAHOWA, Dèbata Israel. Bagèen mo ulah-ulahku:

²¹Ibas ugas-ugasen sienggo sirampasi, kuidah mo sada Jubah merandal kalohon, tennunen Babilon, bagi ma dekket pirak kira-kira dua kilo, dekket emmas matah lebbih sitengah kilo. Ngkelleng kalohon ngo atèngku midah ugasen i, nai kubuat mo janah kuboniken ibas tanoh i undung-undungku; pirak imo kubakin kan terruh kalohon.”

²²Nai isudu si Josua mo pasulakken jelma mi undung-undung si Agan. Tuhuna dapet mo ugasen rarangen i i sidi karina itanem, janah pirakna ibaing kan terruh kalohon.

²³Ibuat kalak i mo ugas-ugasen idi janah iembah mi lebbè si Josua bak karina kalak Israel. Nai igamparken mo ugas-ugasen idi i hadeppen JAHOWA.

²⁴Nai itangkup si Josua dekket karina bangsa Israel mo si Agan, janah iembah mo ia mi Napa Kesusahen, rasken karina dukakna, lembuna, kalodèna, biri-birina, undung-undung dekket karina silot bana dekket pirak, jubah dekket emmas tinangkona i.

²⁵Nai nina si Josua mo taba si Agan, “Kasa gabè perohken kesusahen kono banta? Bagèndari pè ipesempa JAHOWA mo kesusahen taba kono!” Nai ibentiri karina kalak Israel mo si Agan rebbak dekket simpangansa merkitè batu soh matè. Ilekkup mo kerri karina hartana dekket ugas-ugasen tinangkona i.

²⁶Enggo kessa bagi itamburi kalak i mo bekkas i dekket batu mbuè kalohon janah sakat ari sidari èn tong dèng ngo lot i sidi. Kumernaken i ngo bekkas idi tong igerari Napa Kesusahen. Nai malap mo laga JAHOWA.