Read Batak Dairi Josua 8 Bible Online

Josua 8 - Batak Dairi bible

Josua 8

¹Idokken JAHOWA mo taba si Josua, “Pepulung mo karina soridadumu, janah laus mo ko rasken dekket kalak i mi Ai. Ulang rembekbekken janah ulang mbiar. Naing Kuberèken ngo bamu kemenangen meraloken raja Ai. Itaban kono mo ginemgemna, kutana dekket nagerrina.

²Kennah bakinenmu taba Ai dekket rajana tosè bagè pemakinmu taba Jeriko dekket rajana arnia. Tapi ukum sikali èn ndorok mo buaten ndènè ugas-ugasenna dekket pinakanna gabè milik ndènè. Kebbasi mo lako menjuhap kuta i sintempu i podi nai.”

³Nai kebbas mo si Josua lako berkat mi Ai rasken dekket karina soridaduna. Ipilih mo 30.000 kalak perbabang sitokona kalohon, nai ipeberkat mo kalak i tupung berngin, janah iperèntahken mo bagèen bai kalak idi, “Ciboni mo kè kettan balik kuta i, tapi ulang ndaohsu;

⁴janah kebbas mo kènè lako menjuhap.

⁵Kujolmiti pè kuta i rasken dekket anak buahku. Mula karuar kalak Ai lako mengalo kami, mèter kupakulah kami mo mperrus bagè sitikanna i.

⁶Dak ijalang kalak i mo kami soh ndaoh i kuta idi nai, janah idokdok ngo kami mperrus bagè sitikanna i.

⁷Tikan bagidi mo kennah mendarat kènè i bekkas percibonien ndènè nai, janah menaban kuta i. Isohken JAHOWA Dèbata ndènè mo i taba kènè.

⁸Enggo kessa itaban kènè, lekkup kènè mo kuta i, rembang bagè siniperèntahken JAHOWA. Idi mo ulaen ndènè.”

⁹Enggo kessa i ipasulak si Josua mo kalak i janah laus mo kalak i mengerimrim kettan kesunduten kuta Ai, i kellang-kellang Ai dekket Betel, nai menggepgep mo kalak i i sidi. Tapi ukum si Josua mermalam ngo i perundung-undungen bangsa Israel.

¹⁰Njengkas kalohon ndungo mo si Josua janah memerèntah soridaduna asa merpulung. Nai iuluken rasken dekket pe- ngulu-pengulu bangsa Israel mo soridadu i mi Ai.

¹¹Merdalan mo bala pergunggung i rebbak dekket si Josua menuju pengkeruhen mbellen kuta Ai, nai merundung-undung mo kalak i kettan Utara, i sidi lot sada lembeng kellang-kellang kalak i dekket kuta Ai.

¹²Idokken ma ngo lebih kurang 5.000 kalak mengerimrim kettan kesunduten kuta i, i kellang-kellang Ai dekket Betel.

¹³Asa bagèen mo ibakin persusun soridaduna i: Markas simbellenna ibakin mo kettan Utara kuta idi janah soridadu sidèbanna kettan kesunduten, tapi ukum si Josua laus mo mi lembeng i bernginkenna i.

¹⁴Idah raja Ai kessa mo pengèkut si Josua, mèter isudu mo merkebbas. Rasken mo ia mendarat dekket karina soridaduna menuju mi lembeng Jordan lako menjuhap kalak Israel i bekkas sinderrangna i. Oda satdar ia, sigejap nai ijuhap mo ia i podi nai.

¹⁵Ipakulah si Josua dekket dengnganna mo bagè tupung sondar kalak i balik mi podi; mperrus mo kalak i menuju padang ngkerrah-kerring.

¹⁶Karina anak laki silot i kuta Ai, iperèntahken lako mengeletlet si Josua dekket soridaduna i. Tapi makin iletlet kalak i si Josua, makin ndaohna mo kalak idi i kutana nai.

¹⁷Karina kalak sini kuta Ai karuar lako menjalang kalak Israel, gabè ibelli kalak i mo kuta i dalngah, oda lot perjagana.

¹⁸Nai idokken JAHOWA mo taba si Josua, “Pekèkè mo kujurmu janah asaken taba Ai; Kusohken mo kuta i bamu bagèndari.” Iulaken si Josua mo perèntah JAHOWA idi.

¹⁹Ibakin si Josua kessa tanganna mi babo, kèkè mo soridadu siciboni idi janah menjuhap kuta Ai, nai itaban mo. Terrus ilekkup kalak i ngo kuta i.

²⁰Itulihken kalak Ai mo mi podi, janah idah kalak i mo cèmber mercèmpul sakat mi langit. Idah si Josua dekket soridaduna ma mo cèmber idi janah ibettoh kalak i mo enggo itaban nuhnuhen soridadu sidebanna i kuta i. Jadi kumessing mo si Josua dekket soridaduna lako menjuhap dekket memunuh kalak Ai. Kalak Israel sini kuta Ai idi pè merrohen ma mo janah dekket menjuhap, gabè terkubu mo kalak Ai janah oda nè ndorok mperrus. Sada kalak poda lot maluah bai kalak idi nai, karina ngo matè ibunuh kalak Israel,

²³laènken raja Ai. Itangkup ngo ia janah iembah menghadep si Josua.

²⁴Enggo kessa dung soridadu musuh ibunuh kalak Israel simenjalang kalak i i padang dakkir balik mo kalak i mi kuta Ai, lako memunuhi karina kalak silot i sidi.

²⁵Ukum si Josua, dak tong ngo iasaken kujurna dempak Ai, oda ipesusur pèma terbunuh karinana kalak Ai. I sidarinkenna i matè mo karina pengisi kuta Ai — 12.000 kalak buèna, anak laki dekket daberru.

²⁷Pinakan dekket ugas-ugasen sinirampasen kalak i i kuta i, ibuati kalak Israel mo gabè milik kalak i, rembang bagè sinidokken JAHOWA taba si Josua.

²⁸Ilekkup si Josua mo kuta Ai, janah ibelli bagi gabè puntung soh bagèndari.

²⁹Igantung mo raja kuta i ibas tihang, janah ibelli i sidi soh ciboen. Tikan sundut mataniari, idokken si Josua mo kalak lako pesusurken bangkè i janah mengambongken mi lebbè pengkeruhen kuta i. Nai itèmbun mo bekkas i dekket batu mbuè kalohon. I sidi dèng ngo batu-batu idi soh bagèndari.

³⁰Kessa i ipajek si Josua mo sada langgaten i Delleng Ebal bai JAHOWA, Dèbata Israel.

³¹Rembang bagè sienggo ihatorken ibas Bukku si Musa, naposo JAHOWA idi ngo langgaten i ibahan, lako bai kalak Israel, “Sada langgaten ipas batu siso nung dèng idakdak merkitè bessi.” I babo langgaten i mo ipèlèken kalak Israel bai JAHOWA: pèlèen situtungen bagima dekket pèlèen perdamèen kalak i.

³²I sidi mo isaksiken kalak Israel, isuratken si Josua ipas batu langgaten idi salinen pati-patin JAHOWA silot ibas bukku si Musa.

³³Cènder mo i kacimbang mbellah Pèti Perpadanen JAHOWA kalak Israel, rasken pengulu-pengulu, lubalang-lubalang, perhukum, bagi dekket kalak sidèban simerian i tengah kalak i, mendempakken imam-imam Lewi simerosong Pèti Perpadanen i. Sitengah ibas kalak i nai mendempakken Delleng Gerizim, janah sitengah nai mendempakken mi Delleng Ebal. Enggo kin ngo itennahken si Musa, naposo JAHOWA idi, asa iulaken kalak i bagidi, mula enggo kessa dapet katikana kalak i menjalo pasu-pasu sinijandiken JAHOWA.

³⁴Nai ijakaken si Josua mo nggang-nggang karina patien rembang bagè sitersurat ibas Bukku Patiin, bagi dekket kata pasu-pasu bak sumpah pè.

³⁵Karina perèntah si Musa ijakaken si Josua mo taba karina bangsa Israel simertumpu i sidi, bang daberru, anak-anak, dekket kalak sidèban simerian i tengah-tengah kalak idi.