Read Batak Dairi Josua 9 Bible Online

Josua 9 - Batak Dairi bible

Josua 9

¹Sar mo berita tersèngèt kemenangen-kemenangen Israel soh taba karina raja sikan kesunduten Laè Jordan — sini delleng, i pispis delleng, dekket i kendet arur biding Laut Tengah soh mi Delleng Libanon kettan Utara; imo raja-raja Het, Amori, Kanaan, Feris, Hewi dekket Jebus.

²Karina raja-raja idi merarih janah mersada lako mengalo si Josua dekket bangsa Israel.

³Tapi ukum kalak Gibeon i bangsa Hewi nai, enggo mendengkoh tersèngèt barang bakunè ibaing si Josua taba Jeriko dekket Ai.

⁴Nai ipesada kalak i mo takina lako mengakkali si Josua merkitè memakin i babo kalodè kalak i; tèmpus-tèmpusen mumuk, dekket bekkas-bekkas sienggo buruk sinibahan ipas bebak nai. Janah sikira bekkel, ibahan kalak idi mo nditak pingpingen sienggo ngkerrah-ngkerrah janah ipemocip.

⁵Ipakkè kalak i mo oles ompak-ampik bak cipatu sienggo buruk janah idongkap-dongkap.

⁶Merpakèen bagi mo kalak i laus mendahi si Josua i perundung-undungen i Gilgal janah mendokken tabasa dekket taba kalak Israel, “Roh ngo kami i nagerri ndaoh nai naing mahan padan dekket kènè.”

⁷Tapi nina kalak Israel mo, “Mahan kadè nami merpadan dekket kènè? Njolmit ngo sendah bekkas ndènè i sènda nai!”

⁸Idokken kalak idi mo, “Uè ngo kami mengulaken barang bakunè sambing iperèntahken Tuan nami.” “Isè ngo kènè? Janah i nagerri dikè nai?” nina si Josua mengkuso kalak i.

⁹Ialoi kalak i mo, “Roh i nagerri sindaoh kalohon nai ngo kami, Tuan nami, kumerna kudengkoh kami tersèngèt JAHOWA Dèbata sinisembah ndènè alè Tuan nami. Kudengkoh kami ngo tersèngèt karina sinibaingNa i Mesir,

¹⁰dekket tersèngèt bakunè ibaing taba sidua kalak raja Amori kettan kebincaren Jordan, imo si Sihon raja Hesybon bak si Og raja Basan simerian i Asytarot.

¹¹Ipasulak pengulu-pengulu bak karina pengisi nagerri nami ngo kami pepadaken bekkel lako berkat mi sèn lako mendahi kènè tuan nami, janah memagahken, ukum kami patu ngo taba kènè tuan nami. Kumerna i, kupengido kami mo masèh atè ndènè lako maing padan dekket kami.

¹²Idah kènè mo tuan nami, roti bekkel nami èn. Sinderrang berkat kami, mpeddas dèng ngo roti èn. Tapi bagèndari, idah kènè mo! Enggo pingpingen janah mocip.

¹³Janah rimbaru dèng ngo bekkas anggur ènda sinderrangna kusini kami; tapi bagèndari idah kènè mo! Enggo ompak-ampik. Pakèen nami dekket cipatu nami pè enggo mercèdaen kumarna daohna perdalanen nami.”

¹⁴Nai ijalo kalak Israel mo cituk ipas pangaen kalak Gibeon idi nai, janah oda pella ikusoken taba JAHOWA tersèngèt mi si.

¹⁵Ibahanken si Josua mo perpadanen peralè-alèenken dekket kalak Gibeon i, janah merjandi oda bunuhenna kalak i. Pengulu-pengulu bangsa Israel pè, mersumpah ngo lako pesautken padan i.

¹⁶Tapi keppèken, i ari petelluken enggo kessa ibahanken perpadanen idi, enggo mo soh kalak Israel mi kuta Gibeon, Kefira, Beerot dekket Kiryat-Jearim i ladang kalak i. Nai terbettoh mo oda ngo keppè ndaoh bekkas kalak idi i Gilgal nai.

¹⁸Tapi mak ndorok bunuhen kalak Israel kalak i, kumerna enggo mersumpah pengulu-pengulu Israel taba kalak i ibagasen gerar JAHOWA Dèbata Israel. Ngut-nguten mo karina bangsa Israel ganaenkenna i taba pengulu kalak i.

¹⁹Tapi ialoi pengulu-pengulu idi mo, “Bakunè bakinen! Enggo sanga merjandi kami bai kalak i ninganna mersumpah merkitè gerar JAHOWA Dèbata Israel. Bagèndari pè oda ndorok kita memakin jahat taba kalak i.

²⁰Oda ndorok kita memunuh kalak i kumerna enggo merpadan kita; janah mula siosè nola padanta idi ihukum Dèbata ngo kita.

²¹Asa, belli mo kalak i nggelluh, tapi karina mo kita memakin kalak i gabè tukkang menaka sebban dekket tukkang petaruh laè lako banta karina.” Bagidi mo ihatorken pe- ngulu-pengulu idi.

²²Nai itenggoi mo kalak Gibeon i menghadep taba si Josua. Nina si Josua mo, “Kasa iakkal-akkali kènè kami janah mendokken nagerri ndènè ndaoh kalohon, keppèken i sèn sambing ngo?

²³Kumerna bagidi pemaing ndènè, ihukum Dèbata ngo kènè. Dak gabè hamba mo bangsa ndènè, tukkang menaka sebban dekket tukkang petaruh laè keperluen Bages Dèbatangku.”

²⁴Ialoi kalak idi mo, “Kubakin kami pè bagidi kumerna kudengkoh kami ukum JAHOWA Dèbata sinisembah Tuan i enggo pasulakken si Musa, naposoNa i, pesakatken bai Tuan i karina nagerri ènda dekket memunuh karina pengisina sinderrang itaban Tuan i tanoh idi. Mbiar ngo kami tah cidahari ibunuh kami, idi ngo sebabna asa kubaing kami karina tersèngèt mi sèn.

²⁵Bagèndari pè ibagasen kuasa Tuan i ngo kami. Baing mo bai nami barang bakunè sambing dok atè Tuan i selloh.”

²⁶Gabè bagèen mo ibaing si Josua: iondingi ngo kalak i janah oda ipadiat kalak Israel memunuh kalak i.

²⁷Tapi ibakin mo kalak i gabè hamba — imo tukkang menaka sebban dekket tukkang petaruh laè lako bai kalak Israel dekket keperluen mi langgaten JAHOWA. Soh bagèndari ngo kalak i tong mengulaken ulaen idi i bekkas sinipilih JAHOWA gabè bekkas pemojien tabasa.